Գլուխ 25

1․ Եւ մեռաւ Սամուէլ. եւ ժողովեցան ամենայն Իսրայէլ եւ կոծեցան զնա: եւ թաղեցին զնա ի տան իւրում յԱրիմաթեմ:  Եւ յարեաւ Դաւիթ եւ էջ յանապատն Մաոնայ:

2․ Եւ էր այր մի ի Մաոն, եւ հաւտք իւր ի Կարմելոս. եւ այրն մեծատուն էր յոյժ. եւ նորա էին ոչխարք երեք հազարք, եւ այծք հազար. եւ եղեն կտուրք հաւտիցն ի Կարմելոս:

3․ Եւ անուն նորա Նաբաղ եւ անուն կնոջ նորա Աբիգեա. եւ կին նորա առատ իմաստութեամբ եւ գեղեցիկ տեսլեամբ յոյժ. եւ այրն խիստ եւ չար խորհրդովք` եւ այր շնաբարոյ:

4․ Եւ լուաւ Դաւիթ յաւուր յայնմիկ եթէ կտրէ Նաբաղ Կարմելացի զհաւտս իւր,

5․ առաքեաց Դաւիթ մանկունս տասն, եւ ասէ Դաւիթ ցմանկունսն. Ելէք ի Կարմելոս` եւ երթայք առ Նաբաղ, եւ հարցէք յանուն իմ զողջունէ նորա:

6․ եւ ասասջիք` այսպէս ի սոյն աւուրս ո՞ղջ իցես դու եւ տուն քո, եւ ամենայն որ ինչ քո ողջ լիցի:

7․ Եւ արդ` աւասիկ լուայ եթէ կտուրք են հաւտից քոց որ ընդ մեզ էին յանապատի աստ, եւ ոչ արգելաք զդոսա, եւ ոչ խուեցաք զդոսա եւ ոչ իւիք զամենայն աւուրս որչափ եւ էին ընդ մեզ ի Կարմելոս:

8․ հարց ցմանկտիդ քո եւ պատմեսցեն քեզ: Եւ գտցեն մանկունքդ շնորհս առաջի աչաց քոց, զի ի բարի աւուր եկին, արդ` տացես որչափ ինչ եւ գտցէ ձեռն քո ծառայից քոց, եւ որդւոյ քում Դաւթի:

9․ Եւ եկին մանկունքն Դաւթի, եւ խաւսեցան զբանսն ընդ Նաբաղայ, ըստ ամենայն բանիցն այնոցիկ յանուն Դաւթի:

10․ Ըմբոստացաւ, եւ ետ պատասխանի ծառայիցն Դաւթի եւ ասէ. Ո Դաւիթ, կամ ո որդին Յեսսեայ. բազմացեալ են այսաւր ծառայք գնացականք իւրաքանչիւր յերեսաց տեառն իւրոյ:

11․ Արդ` առնուցում զհաց իմ եւ զգինի իմ եւ զզենլիս իմ զոր զենի կտրողաց իմոց պատրուճակս, եւ տայցեմ արանց զորս ո՞չ գիտիցեմ ուստի իցեն:

12․ Եւ դարձան մանկունքն Դաւթի ի ճանապարհ իւրեանց. եւ եկին պատմեցին Դաւթի ըստ բանիցն այնոցիկ:

13․ Եւ ասէ Դաւիթ ցարսն իւր. Ածէք ընդ մէջ իւրաքանչիւր զսուր իւր. եւ ածին ընդ մէջ այր իւրաքանչիւր զսուսեր իւր: ած ընդ մէջ եւ Դաւիթ զսուր իւր. եւ ելին զհետ Դաւթի իբրեւ արք չորեքարեւր. եւ երկերիւրն եւս անդէն նստան առ կարասին:

14․ Եւ Աբիգեայ` կնոջ Նաբաղայ պատմեաց միոմն ի մանկտւոյ անտի եւ ասէ. Ահա առաքեաց Դաւիթ հրեշտակս յանապատէն աւրհնել զՏէր մեր, եւ նա` խուսեաց ի նոցանէն.

15․ եւ արքն երախտաւոր էին մեզ յոյժ, եւ ոչ արգելին զմեզ, եւ ոչ իւիք խուեցին զմեզ որչափ եղեաք ընդ նոսա ի բացի.

16․ եւ իբրեւ զպարիսպ էին մեզ զցայգ եւ զցերեկ` զամենայն աւուրսն որչափ էաք ընդ նոսա, եւ արածէաք զխաշինսն:

17․ Եւ արդ` գիտասցես եւ տեսցես զինչ գործեսցես. զի վճարեալ է չարութիւն ի վերայ Տեառն մերոյ, եւ ի վերայ ամենայն տան նորա. եւ նա` այր ժանտ է, եւ ոչ գոյ խաւսել ընդ նմա:

18․ Եւ աճապարեաց Աբիգեա, եւ առ երկերիւր նկանակ, եւ երկուս ամանս գինւոյ, եւ հինգ ոչխար հասուցեալ, եւ հինգ արդու փոխնդոյ, եւ կայթ մի չամիչ, եւ պաղատիտս երկերիւր. եւ եդ ի վերայ իշոյ:

19․ եւ ասէ ցմանկտին իւր. Երթայք յառաջագոյն քան զիս, եւ ես գամ զկնի ձեր. եւ առն իւրում Նաբաղայ ոչ եհան ի վեր:

20․ Եւ եղեւ ընդ ելանել նորա յէշն, եւ ընդ իջանել ընդ զանխուլ լերինն, եւ ահա Դաւիթ եւ արք նորա իջանէին ընդ առաջ նորա. եւ դիպեցաւ նոցա:

21․ Եւ ասէ Դաւիթ. Զուր ուրեմն պահեցի զամենայն ինչ Նաբաղու յանապատի անդ. եւ ոչ խուեցաք առնուլ յամենայնէ որ ինչ էր նորա եւ ոչ ինչ. եւ հատոյց ինձ չար երախտեաց իմոց:

22․ աւն եւ աւն արասցէ Աստուած Դաւթի, եւ աւն եւ աւն յաւելցէ, եթէ թողից յամենայնէ Նաբաղու մինչչեւ ցառաւաւտն` որ զորմով միզիցէ:

23․ Իբրեւ ետես Աբիգեա զԴաւիթ` փութացաւ եւ վազեաց յիշոյն, եւ անկաւ առաջի Դաւթի ի վերայ երեսաց իւրոց, եւ երկիր եպագ նմա յերկիր ¡:

24․ եւ անկաւ առ ոտս նորա եւ ասէ. Յիս տէր վնաս իմ. բայց խաւսեսցի աղախին քո յականջս քո, եւ լուիցես բանից աղախնոյ քոյ:

25․ մի դիցէ Տէր իմ զսիրտ իւր ի վերայ առն ժանտի Նաբաղայ. զի ըստ անուան նորա` եւ ինքն է: Նաբաղ անուն նորա` եւ անզգամութիւն ընդ նմա: Եւ ես աղախին քո ոչ տեսի զմանկունս քո զոր առաքեցեր:

26․ եւ արդ` կենդանի է Տէր եւ կենդանի է անձն քո. որպէս արգել զքեզ Տէր չգալ յարիւն անպարտ, այլ պահել զձեռն քո առ քեզ: եւ արդ` եղիցին իբրեւ զՆաբաղ թշնամիք քո` եւ որ խնդրիցեն Տեառն իմոյ չարիս:

27․ Եւ արդ` առ զաւրհնութիւնս զայս զոր եբեր աղախին քո Տեառն իմում. եւ տացես մանկտւոյդ որ կան առաջի Տեառն իմում:

28․ եւ բարձ զվնաս աղախնոյ քոյ: Զի առնելով արասցէ Տէր տեառն իմում տուն հաւատարիմ. զի զպատերազմ տեառն իմոյ Տէր պատերազմի, եւ չարութիւն մի երբէք գտցի ի քեզ:

29․ եւ ոչ յարիցէ մարդ հալածել զքեզ, եւ խնդրել զանձն քո. եւ եղիցի անձն տեառն իմոյ ծրարեալ ի ծրարի կենաց տեառն Աստուծոյ. եւ զանձն թշնամեաց քոց պարսաքարեսցես ի մէջ պարսատկաց:

30․ Եւ եղիցի յորժամ արասցէ Տէր տեառն իմում զամենայն բարիս զոր խաւսեցաւ ածել ի վերայ քո, եւ տացէ զքեզ պատուիրանաւ առաջնորդ ի վերայ Իսրայէլի:

31․ մի լիցի պղծութիւն եւ գայթագղութիւն ի սրտի տեառն իմոյ հեղուլ զարիւն արդար տարապարտուց, եւ պահեսցի ձեռն տեառն իմոյ առ իւր. եւ բարի արասցէ Տէր տեառն իմում. եւ յիշեսցես զաղախին քո բարի առնել նմա:

32․ Եւ ասէ Դաւիթ ցԱբիգեա. Աւրհնեալ տէր Աստուած Իսրայէլի որ առաքեացն զքեզ այսաւր այսր ընդ առաջ իմ.

33․ եւ աւրհնեալ բարք քո, եւ աւրհնեալ լիցիս դու որ արգելեր զիս այսաւր աստ չերթալ յարիւն, եւ պահել զձեռն իմ առ իս:

34․ Բայց կենդանի է տէր Աստուած Իսրայէլի, որ արգել զիս այսաւր յառնելոյ քեզ չարիս. զի թէ չէիր փութացեալ եւ եկեալ ընդ առաջ իմ. քանզի ասացի. թէ Ոչ մնասցէ Նաբաղայ մինչչեւ ցլոյս առաւաւտու որ զորմով միզիցէ:

35․ Եւ առ Դաւիթ ի ձեռաց նորա զամենայն ինչ զոր եբեր նմա. եւ ասէ ցնա. Ել ի տուն քո խաղաղութեամբ. տես զի լուայ ձայնի քում, եւ ակն առի երեսաց քոց:

36․ Եւ գնաց Աբիգեա առ Նաբաղ. եւ էր խրախութիւն ի տան նորա իբրեւ զխրախութիւն թագաւորի. եւ սիրտ Նաբաղու զուարճացեալ էր յինքեան, եւ ինքն արբեալ էր յոյժ. եւ ոչ պատմեաց նմա բան մի մեծ կամ փոքր մինչչեւ ցլոյս առաւաւտին:

37․ Եւ եղեւ ընդ առաւաւտն, իբրեւ սթափեցաւ Նաբաղ ի գինւոյ անտի, պատմեաց նմա կինն իւր զբանս զայսոսիկ. եւ մեռաւ սիրտ նորա ի նմա, եւ եղեւ իբրեւ զքար:

38․ եւ եղեն իբրեւ աւուրք տասն, եւ եհար Տէր զՆաբաղ, եւ մեռաւ:

39․ Եւ լուաւ Դաւիթ եթէ մեռաւ Նաբաղ, եւ ասէ. Աւրհնեալ տէր Աստուած որ դատեաց զդատաստանս նախատանաց իմոց ի ձեռաց Նաբաղայ, եւ զծառայ իւր ապրեցոյց ի ձեռաց չարեաց, եւ զչարութիւն Նաբաղայ դարձոյց Տէր ի գլուխ նորա: Եւ առաքեաց Դաւիթ եւ խաւսեցաւ ընդ Աբիգեա առնուլ զնա իւր կնութեան:

40․ եւ եկին ծառայքն Դաւթի առ Աբիգեա ի Կարմելոս, խաւսեցան ընդ նմա եւ ասեն. Դաւիթ առաքեաց զմեզ առ քեզ առնուլ զքեզ իւր կնութեան:

41․ Եւ յարեաւ երկիր եպագ ի վերայ երեսաց իւրոց յերկիր եւ ասէ. Ահաւասիկ կայ աղախին քո ի ստրկութիւն լուանալոյ զոտս ծառայից Տեառն իմոյ:

42․ եւ փութացեալ յարեաւ Աբիգեա, ել յէշ. եւ հինգ աղջիկ գնացին զհետ նորա, եւ չոգաւ զհետ ծառայիցն Դաւթի, եւ եղեւ նորա` կին:

43․ Եւ զԱքինովամ առ Դաւիթ յեզրայելէ. եւ էին նորա երկոքեան կանայք:

44․ Եւ Սաւուղ ետ զՄեղքող դուստր իւր զկին Դաւթի, Փաղտիելի որդւոյ Յեմեսսեայ Ռովմացւոյ: