Գլուխ 26

1․ Եւ եկին զիփացիքն ի Մառայլէն առ Սաւուղ ի բլուրն` եւ ասեն. Ահա Դաւիթ թաքուցեալ է առ մեզ ի բլրին Եքեղատու` հանդէպ Յեսեմոնեայ:

2․ Եւ յարեաւ Սաւուղ էջ յանապատն Զիփայ, եւ ընդ նմա երեք հազարք արանց ընտրելոց յԻսրայէլէ` խնդրել զԴաւիթ յանապատին Զիփայ:

3․ եւ բնակեցաւ Սաւուղ ի բլրին Եքեղատու հանդէպ Յեսեմոնայ ի վերայ ճանապարհին: Եւ Դաւիթ նստէր յանապատին: իբրեւ ետես Դաւիթ թէ եկն Սաւուղ զկնի նորա յանապատն,

4․ առաքեաց Դաւիթ լրտեսս. եւ գիտաց եթէ եկեալ է Սաւուղ պատրաստութեամբ ի Կեիլա:

5․ Եւ յարեաւ Դաւիթ գաղտ եւ եկն ի տեղին ուր նստէր Սաւուղ ¡. եւ ետես Դաւիթ զտեղին ուր ննջեաց Սաւուղ. եւ անդ Աբեններ որդի Ներեայ զաւրավար նորա: եւ Սաւուղ ննջէր ի պաղպաջունսն. եւ զաւրն բանակեալ էր շուրջ զնովաւ:

6․ Պատասխանի ետ Դաւիթ եւ ասէ ցԱբիմելէք Քետացի, եւ ցԱբեսսա որդի Շարուհեայ եղբայր Յովաբայ, եւ ասէ. Ո՞ մտցէ ընդ իս առ Սաւուղ ի բանակն: եւ ասէ Աբեսսա. Ես մտից ընդ քեզ:

7․ Եւ մտին Դաւիթ եւ Աբեսսա ի զաւրն զցայգ. եւ ահա Սաւուղ ննջէր ի պաղպաջունսն, եւ գեղարդն ցցեալ յերկիր ի սնարից նորա. եւ Աբեններ եւ զաւրն ննջէին շուրջ զնովաւ:

8․ Եւ ասէ Աբեսսա ցԴաւիթ. Փակեաց Տէր այսաւր զթշնամիս քո ի ձեռս քո. արդ` հարից զսա գեղարդամբս յերկիր մի անգամ եւ ոչ կրկնեցից:

9․ Եւ ասէ Դաւիթ ցԱբեսսա. Մի հարկաներ զդա. զի ո՞վ իցէ որ ձգիցէ զձեռն իւր յաւծեալ Տեառն եւ սրբիցի:

10․ եւ ասէ Դաւիթ. Կենդանի է Տէր. բայց եթէ Տէր խրատեսցէ զդա: եւ կամ թէ աւր իւր եկեսցէ եւ մեռցի: կամ թէ ի պատերազմ մտցէ եւ յաւելցի:

11․ քաւ լիցի ինձ ի Տեառնէ ձգել զձեռն իմ յաւծեալ Տեառն: բայց արդ` առ զգեղարդնդ ի սնարից դորա, եւ զկուժ ջրոյդ, եւ գնասցուք ի մեզ:

12․ Եւ առ Դաւիթ զգեղարդն եւ զկուժ ջրոյն ի սնարից նորա, եւ գնացին յինքեանս: եւ ոչ ոք էր որ տեսանէր, եւ ոչ որ գիտէր, եւ ոչ ոք էր որ յառնէր. Զի ամենեքեան ի քուն էին, քանզի թմբրութիւն ի Տեառնէ անկաւ ի վերայ նոցա:

13․ Եւ անց Դաւիթ յայն կողմն, եւ եկաց ի վերայ գլխոյ լերինն ի բացեայ, եւ բազում ճանապարհ էր ի մէջ նոցա:

14․ Բարբառեցաւ Դաւիթ ի զաւրն, եւ խաւսեցաւ ընդ Աբեններեայ եւ ասէ. Ո՞չ տաս պատասխանի Աբեններ: եւ ասէ. Ով ես դու որ կոչես զիս առ արքայ:

15․ եւ ասէ Դաւիթ ցԱբեններ. Ոչ ապաքէն այր քաջ ես դու, եւ ո՞վ է իբրեւ զքեզ ի մէջ Իսրայէլի. եւ ընդէ՞ր ոչ պահես զՏէր քո զարքայ. զի եմուտ ոմն ի զաւրուէդ սպանանել զտէր քո զարքայ:

16․ չէ բարի բանդ զոր արարեր. կենդանի է Տէր զի որդիք մահու էք դուք` որ պահէք զտէր ձեր զարքայ զաւծեալ Տեառն: եւ արդ` աւասիկ գեղարդնն արքայի եւ կուժ ջրոյն ո՞ւր է որ առ սնարս նորա կային:

17․ Եւ ծանեաւ Սաւուղ զձայնն Դաւթի եւ ասէ. Այդ ձա՞յն քո է որդեակ իմ Դաւիթ: եւ ասէ Դաւիթ. Ծառայ քո եմ տէր իմ արքայ:

18․ եւ ասէ. Ընդէ՞ր է այդ տէր իմ, զի մտեալ ես զկնի ծառայի քոյ: զի՞ մեղայ, եւ զի՞ գտաւ յիս վնաս:

19․ Եւ արդ` լուիցէ տէր իմ արքայ զբանս ծառայի իւրոյ: եթէ Աստուծոյ շարժեալ է զքեզ ի վերայ իմ, ճենճերեսցի զոհ քո. եւ եթէ որդւոց մարդկան` անիծեալ լիցին դոքա առաջի Տեառն. զի մերժեցին զիս այսաւր չհաստատել ինձ ի ժառանգութեան Տեառն. ասեն. Երթ ծառայեա աստուծոց աւտարաց:

20․ եւ արդ` մի անկցի արիւն իմ յերկիր առաջի երեսաց Տեառն, զի ելեալ է թագաւոր Իսրայէլի խնդրել զանձն իմ, որպէս ընթանայցէ ագռաւ ընդ լերինս:

21․ Եւ ասէ Սաւուղ. Մեղայ, դարձիր որդեակ իմ Դաւիթ, զի ոչ արարից քեզ չար. փոխանակ զի պատուական է անձն իմ առաջի աչաց քոց. եւ ես յայսմ աւուր ժամանակի զրախնդիր եւ յանցաւոր եմ յոյժ:

22․ Պատասխանի ետ Դաւիթ եւ ասէ. Ահաւասիկ գեղարդնն արքայի, անցցէ մի ոք ի մանկտւոյդ եւ առցէ զսա:

23․ եւ Տէր հատուսցէ իւրաքանչիւր ումեք ըստ արդարութեանց իւրոց եւ ըստ հաւատարմութեան. թէ որպէ՞ս մատնեաց զքեզ Տէր այսաւր ի ձեռս իմ. եւ ոչ կամեցայ ձգել զձեռն իմ յաւծեալ Տեառն:

24․ եւ որպէս մեծացաւ անձն քո աստ այսաւր առաջի աչաց իմոց, այնպէս մեծասցի անձն իմ առաջի Տեառն. եւ ամրացուսցէ զիս, եւ ապրեցուսցէ զիս յամենայն նեղութէնէ:

25․ Եւ ասէ Սաւուղ ցԴաւիթ. Աւրհնեալ ես դու որդեակ իմ Դաւիթ, եւ առնելով արասցես, եւ զաւրանալով զաւրասցիս: Եւ գնաց Դաւիթ զճանապարհ իւր. եւ Սաւուղ դարձաւ ի տեղի իւր: