1․ Եւ ժողովեցին այլազգիքն զբանակս իւրեանց ի պատերազմ, եւ գումարեցան ի Սոկքով Հրէաստանի. Եւ բանակեցան ընդ Սոկքով եւ ընդ Ազեկայ Յափեսդոմմին:
2․ Եւ Սաւուղ եւ արք Իսրայէլի` ժողովեցան եւ նոքա ի հովիտսն, եւ ճակատեցան ի պատերազմ ընդ դէմ այլազգեացն:
3․ Եւ այլազգիքն կային ի վերայ լերինն յայնմ կողմանէ, եւ Իսրայէլ կայր ի վերայ լերինն յայսմ կողմանէ, եւ հովիտն ի մէջ նոցա:
4․ Եւ ել այր զաւրաւոր ի ճակատէ այլազգեացն` Գողիադ անուն նորա ի Գեթայ: բարձրութիւն նորա վեց կանգուն եւ թզաւ:
5․ եւ սաղաւարտ ի գլուխ նորա: եւ զրահս վերտս զգեցեալ. եւ կշիռ զրահից նորա հինգ հազար սիկղ, պղնձւոյ եւ երկաթոյ:
6․ եւ սռնապանք պղնձիք ի վերայ բարձից նորա, եւ վահան պղնձի ի վերայ թիկանց նորա.
7․ եւ բուն գեղարդան նորա իբրեւ զստորի ոստայնանկաց. եւ տէգ նորա ի վեց հարեւր սկեղէ երկաթոյ. Եւ զինակիր նորա առաջի նորա երթայր:
8․ Եկն եկաց. ձայն ետ ի ճակատն Իսրայէլի` եւ ասէ ցնոսա. Ընդէ՞ր ելանէք ճակատել ի պատերազմ ընդ դէմ մեր, ո՞չ ապաքէն ես այլազգի եմ, եւ դուք եբրայեցիք ծառայք Սաւուղայ. ընտրեցէք դուք ձեզ այր մի եւ իջցէ առ իս,
9․ եթէ կարասցէ կռուել ընդ իս եւ հարկանել զիս` եղիցուք մեք ձեզ ի ծառայս. ապա թէ ես յաղթեցից եւ հարից զնա, եղիջիք դուք մեզ ի ծառայս եւ ծառայեսջիք մեզ:
10․ Եւ ասէ այլազգին. Ահաւասիկ ես նախատեցի զճակատդ Իսրայէլի յաւուր յայսմիկ. տուք այր մի, եւ ես եւ նա մենամարտեսցուք երկոքեան:
11․ Իբրեւ լուաւ Սաւուղ եւ ամենայն Իսրայէլ զբանս այլազգւոյն, զահի հարան եւ երկեան յոյժ:
12․ Եւ էր այր մի որդի առն եփրաթացւոյ, եւ նա ի Բեթղահեմէ Յուդայ, եւ անուն նորա Յեսսէ. եւ էին նորա որդիք ութ: եւ այրն յաւուրս Սաւուղայ ծերացեալ հասեալ յարս:
13․ Եւ գնացին երեք որդիքն Յեսսեայ մեծագոյնք, երթեալ զհետ Սաւուղայ ի պատերազմ: եւ անուանք որդւոց նորա երթալոց ի պատերազմ. Եղիաբ անդրանիկն նորա, եւ երկրորդն նորա Ամինադաբ, եւ երրորդն նորա Սամաա:
14․ եւ Դաւիթ էր կրտսեր. Եւ երեքին մեծագոյնքն երթեալ էին զհետ Սաւուղայ:
15․ Եւ Դաւիթ գնացեալ դարձաւ ի Սաւուղայ` արածել զոչխարս հաւր իւրոյ, ի Բեթղահէմ:
16․ Եւ մատուցեալ այլազգւոյն` կանխեալ եւ անագանեալ արձանանայր աւուրս քառասուն:
17․ Եւ ասէ Յեսսէ ցԴաւիթ ցորդի իւր. Առ դու եղբարց քոց զարդու փոխնդոյս այսորիկ, եւ զտասն նկանակս զայսոսիկ, եւ պնդեա ի բանակն եւ տուր եղբարց քոց:
18․ Եւ զտասն մաճառակս զկաթին` տացես հազարապետին. եւ տեսցես զողջոյն եղբարց քոց. եւ եթէ պէտք ինչ իցեն նոցա, իմասցիս:
19․ Եւ Սաւուղ` եւ ամենայն այր իսրայէլացի` էին ի հովիտս Կաղնւոյն, պատերազմեալ ընդ այլազգիսն:
20․ Եւ կանխեաց Դաւիթ ընդ առաւաւտն. եւ եթող զոչխարսն ի տուարածականսն: առ եւ գնաց` որպէս եւ հրամայեաց նմա Յեսսէ. եւ եկն ի տափարակն եւ ի զաւրն որ ելանէր ի ճակատն: Եւ աղաղակեցին ի պատերազմին.
21․ եւ ճակատեցան իսրայէլացիքն եւ այլազգիքն հանդէպ միմեանց` ճակատ առ ճակատ:
22․ Եւ եթող Դաւիթ զկարասին յինքենէ ի ձեռն վանապանին, եւ ընթացաւ ի ճակատն, եւ եկն եհարց զողջունէ եղբարցն իւրոց:
23․ Եւ մինչդեռ նա խաւսէր` ահա այրն յամինացի ելանէր, Գողիադ անուն նորա, փղշտացի ի Գեթայ` ի ճակատուց այլազգեացն. եւ խաւսեցաւ ըստ նմին բանից: եւ լուաւ Դաւիթ:
24․ Եւ ամենայն Իսրայէլ ի տեսանել իւրեանց զայրն` փախեան յերեսաց նորա, եւ զարհուրեցան յոյժ:
25․ Եւ ասէ այր Իսրայէլի. Եթէ տեսանէք զայրն զայն որ ելանէ, զի նախատել ելանէ զԻսրայէլ: եւ եղիցի այր որ սպանանիցէ զնա, մեծացուսցէ զնա արքայ` յոյժ մեծութեամբ, եւ զդուստր իւր տացէ նմա կնութեան. եւ զտուն հաւր նորա արասցէ ազատ ի մէջ Իսրայէլի:
26․ Եւ խաւսեցաւ Դաւիթ ընդ արսն որ շուրջ կային զնովաւ` եւ ասէ. Զի՞նչ առնիցէ առն որ հարկանիցէ զայլազգին զայն, եւ բառնայցէ զնախատինս յԻսրայէլէ. զի զի՞նչ է այլազգին այն անթլփատ, զի նախատեաց զճակատս Աստուծոյ կենդանւոյ:
27․ եւ խաւսեցաւ ընդ նմա ժողովուրդն ըստ նմին բանից` եւ ասէ. Այնպէս արասցէ առն` որ սպանանիցէ զնա:
28․ Իբրեւ լուաւ Եղիաբ եղբայր նորա երէց` զխաւսել նորա ընդ արսն, բարկացաւ սրտմտութեամբ Եղիաբ Դաւթի` եւ ասէ. Ընդէ՞ր բնաւ իջեր այսր, եւ յո՞յր ձեռն թողեր զսակաւ ոչխարսն յանապատի անդ. ես գիտեմ զհպարտութիւն քո` եւ զչարութիւն սրտի քոյ, զի վասն տեսանելոյ զպատերազմս իջեր:
29․ Եւ ասէ Դաւիթ. Եւ արդ` զի՞նչ արարի. ո՞չ ապաքէն բանք իցեն:
30․ եւ դարձաւ ի նմանէ ի մեւս կողմն` եւ խաւսեցաւ ըստ նմին բանից. եւ ետ նմա պատասխանի ժողովուրդն ըստ առաջնոյ բանիցն:
31․ Եւ լու եղեն բանքն զոր խաւսեցաւ Դաւիթ, եւ պատմեցին առաջի Սաւուղայ. եւ առ զնա առ ինքն:
32․ Եւ ասէ Դաւիթ ցՍաւուղ. Մի անկցի սիրտ Տեառն իմոյ ի վերայ իւր. ծառայ քո երթիցէ եւ մարտիցէ ընդ այլազգւոյն ընդ այնմիկ:
33․ Եւ ասէ Սաւուղ ցԴաւիթ. Գուցէ ոչ կարիցես երթալ կռուել ընդ այլազգւոյն. զի դու մանուկ ես, եւ նա այր պատերազմաւղ ի մանկութենէ իւրմէ:
34․ Եւ ասէ Դաւիթ ցՍաւուղ. Արածէր ծառայ քո զխաշինս հաւր իւրոյ, եւ յորժամ գայր առեւծ կամ արջ, եւ առնոյր ոչխար ի հաւտէ անտի,
35․ ելանէի զհետ նորա` եւ հարկանէի զնա, եւ կորզէի ի բերանոյ նորա. եւ եթէ յառնէր ի վերայ իմ, ունէի զփողից նորա` եւ հարկանէի եւ սպանանէի զնա:
36․ Զառեւծ եւ զարջ սատակէր ծառայ քո, եւ եղիցի այլազգին անթլփատ իբրեւ զմի ի նոցանէն. եւ արդ` ո՞չ երթայց սատակեցից զնա, եւ բարձից այսաւր զնախատինս յԻսրայէլէ. զի ո՞ ոք է այն անթլփատ` որ նախատեաց զբանակս Աստուծոյ կենդանւոյ:
37․ Եւ ասէ Դաւիթ. Տէր Աստուած` որ ապրեցոյց զիս ի ձեռաց առիւծուն, եւ ի ձեռաց արջոյն, նոյն ապրեցուսցէ զիս ի ձեռաց այլազգւոյն անթլփատին այնորիկ: Եւ ասէ Սաւուղ. Երթ` եւ Տէր եղիցի ընդ քեզ:
38․ եւ զգեցոյց Սաւուղ Դաւթի զվարապանակս իւր, եւ սաղաւարտ պղնձի ի գլուխ նորա, եւ ագոյց նմա զրահս:
39․ եւ ած Դաւիթ զսուսեր իւր ընդ մէջ ի վերայ վարապանակացն. եւ գթեաց ի գնալն մի անգամ եւ երկիցս. եւ ասէ Դաւիթ ցՍաւուղ. Ոչ կարեմ երթալ սոքաւք` զի չեմ հմուտ. եւ հանին զայն ի նմանէ:
40․ Եւ առ զցուպն իւր ի ձեռին իւրում. եւ ընտրեաց իւր հինգ քարինս ողորկս ի հեղեղատէն, եւ եդ զնոսա ի հովուական մախաղին յոր սովոր էր զքարն ժողովել, եւ զպարսն ի ձեռին իւրում. եւ մերձեցաւ առ այրն այլազգի:
41․ Եւ գնայր գայր այլազգին` եւ մերձենայր առ Դաւիթ. եւ այր վահանակիր առաջի նորա:
42․ Իբրեւ հայեցաւ այլազգին եւ ետես զԴաւիթ` արհամարհեաց զնա. զի էր պատանեակ խարտեաշ, եւ աչաւք գեղեցիկ:
43․ Եւ ասէ այլազգին ցԴաւիթ. Զիա՞րդ, շուն եմ ես, զի ցպով եւ քարամբք գաս ի վերայ իմ: Եւ ասէ Դաւիթ. Նա` եւ վատթար եւս ես քան զշուն: եւ նզովեաց այլազգին զԴաւիթ դիաւքն իւրովք:
44․ Եւ ասէ այլազգին ցԴաւիթ. Եկ առ իս եւ տաց զմարմին քո թռչնոց երկնից` եւ գազանաց երկրի:
45․ Եւ ասէ Դաւիթ ցայլազգին. Դու գաս ի վերայ իմ սրով եւ գեղարդեամբ եւ ասպարաւ, եւ ես` գամ ի վերայ քո անուամբ Տեառն զաւրութեանց ճակատուս Իսրայէլի` զոր նախատեցեր այսաւր:
46․ եւ փակեսցէ զքեզ Տէր այսաւր ի ձեռս իմ, եւ սպանից զքեզ. եւ առից զգլուխ քո ի քէն. եւ տաց զգէշ քո` եւ զդիակունս բանակի այլազգեացդ յաւուր յայսմիկ թռչնոց երկնից եւ գազանաց երկրի. եւ ծանիցէ ամենայն երկիր` թէ գոյ Աստուած ի մէջ Իսրայէլի:
47․ եւ ծանիցէ ամենայն եկեղեցիս այս` թէ ոչ սրով եւ գեղարդեամբ փրկէ Տէր: զի Տեառն է պատերազմ, եւ մատնեսցէ զձեզ Տէր ի ձեռս մեր:
48․ Եւ յարեաւ այլազգին` եւ եկն եւ մերձեցաւ ընդ դէմ Դաւթի: եւ աճապարեաց Դաւիթ` եւ ընթացաւ ի ճակատն ընդ դէմ այլազգւոյն:
49․ Եւ ձգեաց Դաւիթ զձեռն իւր ի մախաղն, եւ առ անտի քար մի, եւ պարսաքարեաց եւ եհար զճակատ այլազգւոյն. եւ եմուտ քարն ընդ սաղաւարտն ի ճակատն, եւ անկաւ ի վերայ երեսաց իւրոց յերկիր:
50․ Եւ զաւրացաւ Դաւիթ քան զայլազգին պարսիւքն եւ քարիւն , եւ եհար զայլազգին եւ սպան զնա. եւ սուր չէր ի ձեռին նորա:
51․ Եւ ընթացաւ Դաւիթ եւ հարաւ ի վերայ նորա, եւ առ զնորին սուսեր, եւ մերկաց զնա ի պատենից իւրոց, եւ սպան զնա եւ եհատ զգլուխ նորա: Իբրեւ տեսին այլազգիքն թէ մեռաւ զաւրաւորն նոցա` փախեան:
52․ եւ յարեան արք Իսրայէլի եւ Յուդայ, աղաղակեցին եւ յարձակեցան զհետ նոցա մինչչեւ ի մուտս Գեթայ, եւ մինչչեւ ի դրունս Ասկաղոնի: Եւ անկան վիրաւորք այլազգեացն զճանապարհայնն մինչչեւ ցդրունս Գեթայ եւ Ակկարոնի:
53․ եւ դարձան այք Իսրայէլի ասպատակեալքն զհետ այլազգեացն, եւ կոխեցին զբանակս նոցա:
54․ Եւ առ Դաւիթ զգլուխ այլազգւոյն, եւ եբեր զնա յԵրուսաղէմ. Եւ զզէն նորա եդ ի վանս իւրում:
55․ Եւ իբրեւ ետես Սաւուղ զԴաւիթ ելեալ ընդ դէմ այլազգւոյն, ասէ ցԱբեններ իշխան զաւրուն. Ո՞յր որդի է պատանեակդ այդ Աբեններ: եւ ասէ Աբեններ. Կենդանի է անձն քո արքայ` թէ գիտիցեմ:
56․ եւ ասէ արքայ. Հարց թէ ո՞յր որդի իցէ պատանեակդ:
57․ Եւ իբրեւ դարձաւ Դաւիթ ի հարկանելոյ զայլազգին, առ զնա Աբեններ` եւ ած զնա առաջի Սաւուղայ. եւ գլուխ այլազգւոյն ի ձեռին նորա:
58․ եւ ասէ ցնա Սաւուղ. Ո՞յր որդի ես` մանուկ դու: եւ ասէ Դաւիթ. Որդի ծառայի քոյ Յեսսեայ Բեթղահէմացւոյ:
Հաղորդում կայքում սխալի վերաբերյալ
Տվյալ հատվածում առկա է սխալ: