Գլուխ 1

   
1. Բազո՛ւմ մասամբք, եւ բազում աւրինակաւք կանխաւ խաւսեցաւ Աստուած ընդ հարսն մեր մարգարէիւք.
2. ի վախճան աւուրցս այսոցիկ՝ խաւսեցաւ ընդ մեզ որդւո՛վն, զոր եդ ժառա՛նգ ամենայնի. որով եւ զյաւիտեանսն արար:
3. Որ է լոյս փառաց՝ եւ նկարագի՛ր էութեան նորա. որ կրէ՛ զամենայն բանիւ զաւրութեան իւրոյ. սրբութիւն մեղաց մերոց արարեալ, նստա՛ւ ընդ աջմէ մեծութեանն ի բարձունս:
4. Այնչափ առաւել եղեալ քան զհրեշտակս, որչափ լա՛ւ եւս քան զնոսա անուն ժառանգեաց:
5. Քանզի ցո՞ երբէք ասաց ի հրեշտակաց. որդի իմ ես դու, ես այսաւր ծնայ զքեզ: Եւ դարձեալ՝ թէ ես եղէց նմա ի հայր, եւ նա եղիցի ինձ յորդի:
6. Այլ յորժամ միւսանգամ մուծցէ զանդրանիկն յաշխարհ, ասէ. երկի՛ր պագցեն նմա ամենայն հրեշտակք Աստուծոյ:
7. Այլ առ հրեշտակսն ասէ. Ո՛ արար զհրեշտակս իւր հոգիս, եւ զպաշտաւնեայս իւր բոց հրոյ:
8. Իսկ ցորդին ասէ. Աթո՛ռ քո Աստուած յաւիտեա՛նս յաւիտենից. գաւազան ուղղութեան, գաւազան արքայութեան քոյ:
9. Սիրեցեր զարդարութիւն, եւ ատեցեր զանաւրէնութիւն. վասն ա՛յսորիկ աւծ զքեզ Աստուած, Աստուած քո իւղով ուրախութեան՝ առաւե՛լ քան զընկերս քո:
10. Եւ դու Տէր իսկզբանէ՛ զերկիր հաստատեցեր. եւ գործք ձեռաց քոց երկի՛նք են:
11. Նոքա կորնչին՝ եւ դու կաս եւ մնա՛ս. ամենեքեան իբրեւ զձորձս մաշեսցին,
12. իբրեւ զվերարկու. գալարե՛սցես զնոսա իբրեւ զհանդերձ, եւ գալարեսցի՛ն. բայց դու նո՛յն իսկ ես՝ եւ ամք քո ո՛չ պակասեսցեն:
13. Ցո՞ երբէք ասաց ի հրեշտակաց. նի՛ստ ընդ աջմէ իմմէ, մինչեւ եդից զթշնամիս քո պատուանդան ոտից քոց:
14. Ոչ ապաքէն ամենեքեան հոգիք են հարկաւո՛րք՝ որ առաքին ի սպասաւորութիւն վասն այնոցիկ՝ որ ժառանգելոցն են զփրկութիւն: