Գլուխ 8

   

1. Եւ բանից գլո՛ւխ խաւսիցս, այսպիսի ունիմք քահանայապետ, որ նստա՛ւ ընդաջմէ մեծութեանն աթոռոյն յերկինս,

2. սրբութեանցն պաշտաւնեայ, եւ խորանին ճշմարտութեան՝ զոր Տէրն կանգնեաց՝ եւ ո՛չ մարդ:

3. Զի ամենայն քահանայապետ վասն մատուցանելո՛յ զզոհս եւ զպատարագս կայ. ուստի հա՛րկ է եւ նմա՛ ունել զոր մատուցանիցէ:

4. Զի թէ է՛ր յերկրէ, թերեւս չէ՛ր իսկ քահանայ. զի գոյի՛ն որ մատուցանէին ըստ աւրինացն պատարագ.

5. որք առակա՛ւ եւ աւրինակա՛ւ պաշտէին երկնաւորա՛ցն. որպէս եւ հրամայեցաւ Մովսիսի՝ յորժամ գործելո՛ց էր զվրան ժամուն. տեսջի՛ր՝ ասէ, արասցե՛ս զամենայն ըստ աւրինակի՛ն որ ցուցաւ քեզ ի լերինն:

6. Բայց արդ՝ առատագո՛յն եւս պաշտաման եհաս Յիսուս, որչափ լաւագո՛յն եւս ուխտի է՛ միջնորդ՝ որ ի յառաւե՛լ աւետիսն աւրինադրեցաւ:

7. Զի եթէ առաջինն անարա՛տ էր, ապա երկրորդին տեղի ո՛չ խնդրէր:

8. Նա՝ աւասիկ բամբասէ՛ զնոսա՝ եւ ասէ. Ահաւասիկ աւուրք եկեսցեն՝ ասէ Տէր, եւ կատարեցից ի վերայ տա՛նն Իսրայէլի եւ ի վերայ տանն Յուդայ՝ ուխտ նո՛ր.

9. ո՛չ ըստ ուխտին զոր եդի ընդ հարս նոցա՝ յաւուրն յորում առի ի ձեռն՝ հանե՛լ զնոսա յերկրէն Եգիպտացւոց. եւ զի նոքա ո՛չ կացին յուխտին իմում, եւ ես անփո՛յթ արարի զնոցանէ՝ ասէ Տէր ամենակալ:

10. Այլ ա՛յս է ուխտն զոր եդից տանդ Իսրայէլի յետ աւուրցն այնոցիկ՝ ասէ Տէր. տաց զաւրէնս իմ ի մի՛տս նոցա, եւ ի սիրտս նոցա գրեցից զնոսա. եւ եղէց նոցա Աստուած, եւ նոքա եղիցին ինձ ի ժողովուրդ:

11. Եւ ո՛չ եւս ուսուցանիցեն իւրաքանչիւր զքաղաքակից իւր, եւ իւրաքանչիւր զեղբայր իւր, եւ ասիցեն թէ ծանի՛ր զՏէր. զի ամենեքի՛ն ծանիցեն զիս ի փոքրկա՛նց մինչեւ ցմեծամեծս նոցա:

12. Զի քաւի՛չ եղէց անաւրէնութեանց նոցա. եւ զմեղս նոցա՝ եւ զանաւրէնութիւնս այլ ո՛չ եւս յիշեցից:

13. Արդ՝ ասելո՛վն նոր. հնացո՛յց զառաջինն. եւ որ հնանա՛յն եւ ծերանայ՝ մե՛րձ է յապականութիւն: