1․ Այսուհետեւ եւ մեք՝ որ այսչափ շուրջ զմեւք մածեալ ունիմք զբազմութիւն վկայից, զհպարտութիւն զամենայն ի բա՛ց ընկեսցուք եւ զմեղս կարեւորս. համբերութեա՛մբ ընթասցուք ի պատերազմ որ առաջի կայ մեզ:
2․ Հայեսցո՛ւք ի զաւրագլո՛ւխն հաւատոց եւ ի կատարիչն Յիսուս. որ փոխանակ ուրախութեանն որ նմա առաջի կայր, յա՛նձն առ զխաչն, արհամարհեա՛ց զամաւթն, նստաւ ընդ աջմէ աթոռոյն Աստուծոյ:
3․ Աղէ՝ ածէ՛ք զմտաւ, որ զայսպիսի համբերութիւն՝ ի մեղաւորաց հակառակութենէ անտի կրեաց. զի մի՛ աշխատք լինիցիք անձամբք ձերովք՝ եւ լքանիցիք:
4․ Զի չե՛ւեւս արեամբ չափ պատերազմեալք՝ հակառակ կացէք մեղացն,
5․ եւ մոռացարուք զմխիթարութիւնն՝ որ ընդ ձեզ իբրեւ ընդ որդեակս խաւսի: Որդեա՛կ իմ՝ մի՛ լքանիր ի խրատո՛ւ Տեառն. եւ մի՛ վհատիցիս յանդիմանեալ ի նմանէ:
6․ Զի զոր սիրէ Տէր՝ խրատէ, տանջէ՛ զամենայն որդի զոր ընդունի:
7․ Ի խրատու համբերութեան կայք, իբրեւ յորդի՛ս մատուցեալ է ի ձեզ Աստուած. ո՞ր որդի է՝ զոր ո՛չ խրատիցէ հայր:
8․ Զի եթէ առանց խրատու լինիցիք, որով ամենեքին բաժանորդք եղեն. ապա խո՛րթք իցէք՝ եւ ո՛չ որդիք:
9․ Զի եթէ ի մարմնաւոր հարցն մերոց զոր ունիմք խրատիչս՝ պատկառե՛մք, ո՞րչափ եւս առաւել հնազանդեսցուք հաւրն հոգւոց՝ եւ կեցցուք:
10․ Զի սոքա առ սակա՛ւ ժամանակս ըստ կամա՛ց իւրեանց խրատեն. իսկ նա՝ վասն աւգտի, առ ի ընդունելո՛յ զսրբութիւն նորա:
11․ Ամենայն խրատ առ ժամանակն ո՛չ ուրախութեան թուի՝ այլ տրտմութեա՛ն. բայց յետոյ պտո՛ւղ խաղաղութեան՝ նովաւ կրթեցելոցն հատուցանէ յարդարութիւն:
12․ Վասն որոյ զձեռս լքեալս՝ եւ զծունկս կթոտս՝ հաստատեցէ՛ք.
13․ եւ զշաւիղս ուղի՛ղս արարէք ոտից ձերոց, զի մի՛ որ կաղն իցէ գլորիցի, այլ մանաւանդ բժշկեսցի՛:
14․ Զխաղաղութեան զհետ երթա՛յք ընդ միմեանս՝ եւ զսրբութեան. առանց որոյ ո՛չոք տեսանիցէ զՏէր:
15․ Զգո՛յշ լերուք, գուցէ ոք յետնեա՛լ գտանիցի ի շնորհացն Աստուծոյ: Մի՛ ոք արմատ դառնութեան ի վեր երեւեալ նեղիցէ, եւ նովաւ բազումք պղծիցին:
16․ Մի՛ ոք պոռնիկ եւ պիղծ իբրեւ զԵսաւ. որ ընդ միոյ կերակրոյ զանդրանկութիւնսն վաճառեաց:
17․ Գիտէ՛ք՝ զի թէպէտ եւ յետոյ կամեցաւ ժառանգել զաւրհնութիւնսն, խոտա՛ն գտաւ. զի եւ ապաշխարութեան տեղի ո՛չ եգիտ. թէպէտ եւ արտասուա՛ւք խնդրեաց զնա:
18․ Զի ո՛չ էք մատուցեալ առ լեառն շաւշափելի, որ հրովն վառեալ էր, եւ միգով, եւ մառախղով, եւ խաւարաւ, եւ մթով.
19․ ուր փողն հնչէր եւ բարբառ պատգամացն. ուստի որք լուանն՝ հրաժարեցին, զի մի՛ կրկնեսցի առ նոսա բանն:
20․ Քանզի ո՛չ հանդարտէին հրամանին. թէպէտ եւ գազան մերձենայր ի լեառնն՝ քարկո՛ծ լինէր:
21․ Եւ այնպէս ահագին էր տեսիլն, զի եւ Մովսէս ասէր, թէ զահի հարեալ եմ եւ դողամ:
22․ Այլ մատուցեալ էք ի Սիովն լեառն, եւ ի քաղաք Աստուծոյ կենդանւոյ յԵրուսաղէմ՝ յերկի՛նս, եւ ի բիւրաւո՛ր բանակս հրեշտակաց,
23․ եւ յեկեղեցի՛ս անդրանկաց գրելոց յերկինս, եւ առ դատաւո՛րն ամենեցուն Աստուած, եւ յոգիս արդարոց կատարելոց.
24․ եւ ի նորոց կտակարանաց միջնորդն Յիսուս, եւ ի հեղո՛ւմն արեան նորա՝ որ առաւել խաւսի քան զՀաբելին:
25․ Զգո՛յշ լերուք՝ գուցէ՛ հրաժարիցէք յայնմանէ որ խաւսեցաւն. զի եթէ նոքա ո՛չ կարացին զերծանել, հրաժարեալք յայնմանէ՝ որ յերկրին հրաման տայր. ո՞րչափ եւս առաւել մե՛ք՝ եթէ յերկնաւորէն թիկունս դարձուցանիցեմք:
26․ Որոյ ձայնն զերկիր շարժեա՛ց յայնժամ. եւ այժմ խոստացեալ է՝ եւ ասէ. միւսանգամ շարժեցից ո՛չ միայն զերկիր՝ այլ եւ զերկինս:
27․ Այլ միւսանգամն յայտ առնէ զշարժելոցն՝ իբրեւ զեղելոց փոփոխումն, զի հաստատո՛ւն կացցեն անշարժքն:
28․ Վասն որոյ թագաւորութիւն անշարժ ընկալեալ, պի՛նդ կալցուք զշնորհսն, որով պաշտեմք զԱստուած հաճութեամբք՝ ահիւ եւ դողութեամբ.
29․ քանզի Աստուած մեր հո՛ւր ծախիչ է:
Հաղորդում կայքում սխալի վերաբերյալ
Տվյալ հատվածում առկա է սխալ: