Գլուխ 5

   

1. Զի ամենա՛յն քահանայապետ ի մարդկանէ՛ առեալ, վասն մարդկան կայ յաստուածակո՛յս կողմն ա՛նդր. զի մատուսցէ պատարագս, եւ զո՛հս վասն մեղաց:

2. Չափո՛վ չարչարակից կարաւղ է լինել՝ տգիտա՛ց եւ մոլորելոց. քանզի եւ ինքն իսկ տկարութեամբ զգածեա՛լ է:

3. Վասն այնորիկ հա՛րկ է՝ որպէս վասն ժողովրդեանն, նոյնպէս եւ ընդ անձի՛ն մատուցանել պատարագս վասն մեղաց:

4. Եւ ո՛չ եթէ անձամբ ոք առնու պատիւ. այլ կոչեցեա՛լն յԱստուծոյ՝ որպէս եւ Ահարոն:

5. Նոյնպէս եւ Քրիստոս, ոչ եթէ անձին ինչ շուք եդ լինե՛լ քահանայապետ. այլ որ խաւսեցա՛ւն առ նա, թէ որդի՛ իմ ես դու, ես այսա՛ւր ծնայ զքեզ:

6. Որպէս եւ ի միւսումն ասէ. Դո՛ւ ես քահանայ յաւիտեա՛ն ըստ կարգին Մելքիսեդեկի:

7. Որ յաւուրս մարմնո՛յ իւրոյ՝ աղաւթս եւ պաղատանս առ ա՛յն որ կարաւղն էր ապրեցուցանել զնա, ուժգի՛ն գոչմամբ եւ արտասուաւք մատուցանէր. եւ լսելի լինէր առ լաւութեանն:

8. Թէպէտ եւ որդի է, ուսաւ ի չարչարանաց անտի զհնազանդութիւն:

9. Եւ իբրեւ կատարեցաւ՝ եղեւ ամենայն հնազանդելոց իւրոց պատճառք փրկութեանն յաւիտենից.

10. եւ անուանեցա՛ւ յԱստուծոյ քահանայապետ յաւիտենի՛ց ըստ կարգին Մելքիսեդեկի:

11. Վասն որոյ՝ բազում են մեզ բա՛նք, եւ դժուարապատում ի մեկնել. քանզի խաւթամիտք եղերուք լսելեաւք:

12. Փոխանակ զի պա՛րտ էր ձեզ լինել վարդապե՛տս վասն ժամանակին: Դարձեալ պիտո՛յ է ձեզ ուսանել՝ թէ զի՞նչ են նշանագի՛րք սկզբան բանիցն Աստուծոյ. եւ եղերուք կարա՛ւտք կաթին, եւ ո՛չ հաստատուն կերակրոյ:

13. Զի ամենայն որ կաթնկե՛ր է՝ տգէտ է բանին արդարութեան, քանզի տղա՛յ է:

14. Այլ կատարելո՛ցն է հաստատուն կերակուր. որոց՝ վասն ի չափսն հասանելոյ, ճաշակելիքն կի՛րթ են ընտրութեան բարոյ եւ չարի: