Գլուխ 2

1․ Հաստատեցաւ սիրտ իմ ի Տէր, եւ բարձրացաւ եղջեւր իմ յԱստուած իմ: ընդարձակեցաւ բերան իմ ի վերայ թշնամեաց իմոց. ուրախ եղէց ի փրկութեան քում:

2․ Զի ոչ գոյ սուրբ իբրեւ զՏէր. եւ ոչ գոյ արդար` իբրեւ զԱստուած մեր. եւ ոչ գոյ սուրբ բաց ի քէն:

3․ Մի պարծիք` եւ մի խաւսիք զամբարտաւանս. եւ մի ելցէ մեծաբանութիւն ի բերանոյ ձերմէ: զի Աստուած գիտութեանց Տէր, եւ Աստուած պատրաստէ զարուեստս իւր:

4․ Աղեղունք հզաւրաց տկարացան, եւ տկարք զգեցան զաւրութիւն:

5․ Լցեալք հացիւ` նուաղեցին. եւ քաղցեալք բնակեցան յերկրի: զի ամուլն ծնաւ եւթն, եւ բազմածինն նուաղեաց յորդւոց:

6․ Տէր մեռուցանէ եւ կեցուցանէ. իջուցանէ ի դժոխս եւ հանէ:

7․ Տէր աղքատացուցանէ եւ մեծացուցանէ. խոնարհեցուցանէ եւ բարձրացուցանէ,

8․ կանգնէ յերկրէ զտնանկն, եւ յարուցանէ զաղքատն յաղբեւաց: նստուցանել զնոսա ընդ զաւրաւորս ժողովրդեան. եւ աթոռ փառաց ժառանգեցուցանէ նոցա:

9․ Տայ զուխտս ուխտաւորի. եւ աւրհնեաց զամս արդարոց: զի ոչ իւրով զաւրութեամբ զաւրանայ այր հզաւր. Տէր տկար առնէ զհակառակորդս իւր` Տէր սուրբ է: Մի պարծեսցի իմաստունն յիմաստութիւն իւր. եւ մի պարծեսցի հզաւրն ի զաւրութիւն իւր. եւ մի պարծեսցի մեծատունն ի մեծութիւն իւր: այլ այնու պարծեսցի` որ պարծիցին, իմանալ եւ ճանաչել զՏէր, եւ առնել զիրաւունս եւ զարդարութիւն ի մէջ երկրի:

10․ Տէր ել յերկինս` եւ որոտաց, եւ ինքն դատի զծագս երկրի` որ արդարն է: տայ զաւրութիւն թագաւորաց մերոց. եւ բարձրացուսցէ զեղջեւր աւծելոյ իւրոյ:

11․ Եւ թողին զնա անդ առաջի Տեառն, եւ գնացին յԱրիմաթեմ ի տուն իւրեանց: Ե Եւ մանուկն Սամուէլ` կայր ի սպասու երեսաց Տեառն` առաջի Հեղեայ քահանայի:

12․ Եւ որդիքն Հեղեայ քահանայի` որդիք ժանտք, եւ ոչ ճանաչէին զՏէր:

13․ Եւ իրաւունք քահանային էին առ ի ժողովրդենէն` յամենայնէ որ զոհէր: գայր մանուկ քահանային մինչդեռ եփէր միսն, եւ երեքժանի մսահան ի ձեռին իւրում.

14․ եւ արկանէր զայն յաւազան, կամ ի սան մեծ պղնձի` կամ ի պոյտն, եւ զամենայն որ ինչ գայր ի մսահանն` առնոյր իւր քահանայն: Ըստ այսմ աւրինակի առնէին ամենայն Իսրայէլի որ գային զոհել ի տուն Տեառն ի Սելով:

15․ եւ մինչ չեւ ճարպն ճենճերեալ էր` գայր մանուկ քահանային, եւ ասէր ցայրն որ զոհէրն. Տուր միս խորովելոյ քահանային, եւ ոչ առնում ի քէն միս եփեալ ի սանէ:

16․ Եւ ասէր այրն որ զոհէր. Ճենճերեսցի նախ ճարպն որպէս աւրէն է, եւ ապա առցես քեզ յամենայնէ որոց եւ ցանկասցի անձն քո: եւ նա ասէր. Ոչ, բայց եթէ արդ տայցես. եւ եթէ ոչ տաս` ուժգին առից:

17․ Եւ էին այն մեղք մեծամեծք յոյժ մանկանցն առաջի Տեառն:

18․ Եւ Սամուէլ մանուկն պաշտէր առաջի Տեառն, արկեալ զիւրեւ եփուդ:

19․ եւ կրկնոց փոքրիկ առնէր նմա մայրն իւր, եւ տանէր նմա աւուրց յաւուրս յելանել ընդ առն իւրում զոհել զզոհ աւուրցն:

20․ Եւ աւրհնեաց Հեղի զԵղկանա եւ զկին նորա, եւ ասէ. Հատուսցէ քեզ Տէր զաւակ ի կնոջէդ յայդմանէ փոխանակ փոխոյն զոր ետուր Տեառն: եւ գնաց այրն ի տեղի իւր:

21․ Եւ այց արար Տէր Աննայի, եւ յղացաւ եւ ծնաւ եւս երիս ուստերս եւ երիս դստերս: Եւ մեծացաւ մանուկն Սամուէլ առաջի Տեառն:

22․ Եւ Հեղի ծերացեալ էր յոյժ, եւ լսէր զամենայն ինչ զոր առնէին որդիք նորա ընդ որդիսն Իսրայէլի. եւ ո՞րպէս ննջեցուցանէին զկանայս ուխտաւորս առ դրան խորանին վկայութեան:

23․ Եւ ասէ ցնոսա. Ընդէ՞ր առնէք ըստ բանին ըստ այնմիկ, զոր ես լսեմ բանս ի բերանոյ ամենայն ժողովրդեանն Տեառն:

24․ Մի որդեակք, զի ոչ է բարւոք լուրն զոր ես լսեմ, առ ի չծառայելոյ ժողովրդեանն Աստուծոյ:

25․ Զի եթէ մեղանչելով մեղանչիցէ այր` առն, կացցեն յաղաւթս վասն նորա առ Տէր. եւ եթէ Տեառն մեղանչիցէ, ո՞վ կացցէ յաղաւթս վասն նորա: Եւ ոչ լսէին ձայնի հաւրն իւրեանց: զի կամելով կամէր Տէր եղծանել զնոսա:

26․ Եւ մանուկն Սամուէլ երթայր եւ մեծանայր ¡. եւ հաճոյ էր Աստուծոյ եւ մարդկան:

27․ Եւ եկն հրեշտակ Աստուծոյ առ Հեղի եւ ասէ. Այսպէս ասէ Տէր. յայտնելով յայտնեցայ ամենայն տան հաւր քոյ մինչդեռ էին նոքա յերկրին Եգիպտացւոց ծառայք տան փարաւոնի.

28․ եւ ընտրեցի զտուն հաւր քոյ յամենայն գաւազանացն Իսրայէլի քահանայանալ ինձ, եւ ելանել առ սեղանն իմ, արկանել խունկս, եւ կրել զեփուդն առաջի իմ: եւ ետու տան հաւր քոյ զամենայն զառ ի հրոյն որդւոցն Իսրայէլի ¡ ի կերակուր:

29․ Եւ ընդէ՞ր հայեցար ի խունկս իմ եւ ի զոհս իմ ժպիրհ ակամբ. եւ փառաւորեցեր զորդիսն քո քան զիս, աւրհնելով զպտուղ ամենայն զոհիցն Իսրայէլի` որ է առաջի իմ:

30․ Վասն այդորիկ այսպէս ասէ տէր Աստուած Իսրայէլի. Ասացի թէ տուն քո եւ տուն հաւր քոյ շրջեսցին առաջի իմ մինչչեւ ցյաւիտեան: եւ արդ` ասէ Տէր. քաւ լիցի ինձ. այլ զփառաւորիչս իմ փառաւորեցից, եւ որ արհամարհէն զիս` անարգեսցի:

31․ Ահա աւուրք եկեսցեն, եւ սատակեցից զզաւակ քո, եւ զզաւակ տան հաւր քոյ. եւ մի եղիցի ծեր ի տան քում:

32․ եւ հայեսցիս ստէպ ¡ կողկողագին յամենայն բարութիւնս` ¡ զոր արասցէ տէր Աստուած Իսրայէլի. եւ մի եղիցի ծեր ի տան քում զամենայն աւուրս:

33․ Եւ այր ոչ սատակեցից ի սեղանոյ իմմէ, առ ի սորելոյ աչաց իւրոց, եւ մաշելոյ զանձն նորա: եւ ամենայն մնացորդք տան քոյ անկցին սրով արանց:

34․ եւ այն նշանակ լիցի քեզ` որ եկեսցէ ի վերայ երկոցուն որդւոցն քոց Ոփնեայ եւ Փենեհեսի. ի միում աւուր մեռցին երկոքեան:

35․ Եւ յարուցից ինձ քահանայ հաւատարիմ. որ զամենայն ինչ ի սրտի իւրում եւ յանձին իւրում արասցէ. եւ շինեցից նմա տուն հաւատարիմ. եւ շըջեսցի առաջի աւծելոյ իմոյ զամենայն աւուրս:

36․ Եւ եղիցի` ամենայն որ մնայցէ ի տան քում, եկեսցէ երկիր պագանել նմա դանգի միոջ արծաթոյ , եւ նկանակի միոյ հացի. եւ ասիցէ. Ընկեա զիս ի տեղի մի քահանայութեան քոյ, զի կերայց հաց: