1․ Եւ ժողովեցին այլազգիքն ամենայն զբանակս իւրեանց Յափեկ. եւ բանակեցաւ Իսրայէլ Յայենդովր Յեզրայելի:
2․ Եւ նախարարք այլազգեացն հարիւրաւորաւք եւ հազարաւորաւք: եւ Դաւիթ եւ արք իւր երթային յետոյ ընդ Անքուսայ:
3․ Եւ ասեն նախարարք այլազգեացն. Ո՞ են դոքա որ անցանենդ: եւ ասէ Անքուս ցնախարարս այլազգեացն. Ո՞չ դա է Դաւիթ ծառայ Սաւուղայ արքայի Իսրայէլի. եւ այս` երկու ամք են զի առ մեզ է, եւ ոչ ինչ գտի ի դմա յաւրէ յորմէ հետէ անկաւ ի մեզ մինչչեւ ցայսաւր:
4․ Եւ խոժոռեցան նմա նախարար այլազգեացն, եւ ասեն ցնա. Դարձո զայրն, եւ երթիցէ ի տեղի իւր ուր կացուցեր զնա անդ. եւ մի եկեսցէ ընդ մեզ ի պատերազմ, եւ մի լիցի դաւաճան բանակիս: եւ ի՞ւ հաճիցի դա ընդ Տեառն իւրում, եթէ ոչ գլխովք արանցդ այդոցիկ:
5․ Ո՞չ այդ Դաւիթ է, որում նուագէին ի պարըս. եւ ասէին. Եթէ եհար Սաւուղ զհազարս եւ Դաւիթ զբեւրս:
6․ Եւ կոչեաց Անքուս զԴաւիթ, եւ ասէ ցնա. Կենդանի է Տէր, զի ուղիղ եւ բարի ես դու յաչս իմ, եւ մուտ քո եւ ել ի բանակի աստ ընդ իս. եւ ոչ գտի ի քեզ չարութիւն յաւրէ յորմէ հետէ եկիր առ իս մինչչեւ ցայսաւր ժամանակի: Եւ յաչս նախարարացն ոչ թուիս դու բարւոք.
7․ եւ արդ` դարձիր եւ երթ ի խաղաղութիւն, եւ ոչ արասցես չարութիւն յաչս նախարարաց այլազգեացս:
8․ Եւ ասէ Դաւիթ ցԱնքուս. Զի՞նչ արարի քեզ. եւ զի՞նչ գտեր ի ծառայի քում յաւրէ յորմէ հետէ էի առաջի քո մինչչեւ ցայսաւր. զի՞ ոչ գայցեմ պատերազմել ընդ թշնամիս Տեառն իմոյ արքայի:
9․ Պատասխանի ետ Անքուս եւ ասէ ցԴաւիթ. Գիտեմ զի բարւոք թուիս դու յաչս իմ իբրեւ զհրեշտակ Աստուծոյ. այլ նախարարք այլազգեացն ասեն. Մի եկեսցէ ընդ մեզ ի պատերազմ:
10․ եւ արդ` կանխեա դու ընդ առաւաւտն, դու եւ ծառայք տեառն քոյ որ եկեալ են ընդ քեզ, եւ երթայք ի տեղին յորում կացուցի զձեզ. եւ բան ինչ յոռութեան մի դիցես ի սրտի քում, զի հաճոյ ես դու առաջի իմ. եւ վաղայարոյց լինիցիք ի ճանապարհ եւ լուսասցի ձեզ եւ գնասջիք:
11․ Եւ կանխեաց Դաւիթ եւ արք իւր գնալ ընդ առաւաւտն, եւ պահել զերկիր այլազգեացն: եւ այլազգիքն ելին պատերազմել ընդ Իսրայէլի:
Հաղորդում կայքում սխալի վերաբերյալ
Տվյալ հատվածում առկա է սխալ: