Գլուխ 1

   
1․ Եւ այր մի էր յԱրիմաթեմայ, ի Սիփայ` ի լեռնէ Եփրեմի. եւ անուն նորա Եղկանա: Որդի Յերեմիելի, որդւոյ Հեղեայ որդւոյ Թովկեայ, ի Նասիբ Եփրեմի:

2․ Եւ էին նորա երկու կանայք. անուն միումն Աննա, եւ անուն երկրորդին` Փեննանա. եւ էին Փեննայի որդիք, եւ Աննայի ոչ գոյր որդի:

3․ Եւ ելանէր այրն աւուրց յաւուրս ի քաղաքէ իւրմէ յԱրիմաթեմայ` երկիր պագանել, եւ զոհել տեառն Աստուծոյ զաւրութեանց ի Սելով: եւ անդ Հեղի` եւ երկու որդիք նորա Ոփնի եւ Փենէես` քահանայք Տեառն:

4․ Եւ եղեւ աւր մի եւ զոհեաց Եղկանա. եւ ետ Փենանայի կնոջ իւրում, եւ ուստերաց նորա եւ դստերաց նորա մասունս.

5․ եւ Աննայի ետ մասն մի. զի ոչ գոյր նորա որդի: Բայց զԱննա սիրէր Եղկանա` առաւել քան զՓեննանա. եւ Տէր փակեաց զարգանդ նորա:

6․ զի ոչ ետ նմա որդի, ըստ նեղութեան իւրում, եւ ըստ տրտմութեան անձին իւրոյ. եւ տրտմեալ էր վասն այնորիկ` զի փակեաց Տէր զարգանդ նորա առ ի չտալոյ նմա որդի:

7․ Եւ այնպէս առնէր ամի ամի յելանելն նորա ի տուն Տեառն. եւ տրտմէր եւ լայր` եւ ոչ ուտէր:

8․ Եւ ասէ ցնա Եղկանա այր իւր. Աննա: եւ ասէ ցնա. Աւասիկ եմ տէր: եւ ասէ ցնա. Զի՞ է քեզ զի լաս, եւ ընդէ՞ր ոչ ուտես, եւ ընդէ՞ր հարկանէ զքեզ սիրտ քո. ո՞չ լաւ եմ ես քեզ քան զտասն որդի:

9․ Եւ յարեաւ Աննա յետ ուտելոյ նորա ի Սելով. եւ եկաց առաջի Տեառն: եւ Հեղի քահանայ նստէր աթոռով առ սեամս տաճարին Տեառն:

10․ Եւ նա ցաւագին անձամբ եկաց յաղաւթս առ Տէր: եւ ելաց լալով եւ ասէ.

11․ Ադոնայ Տէր, Ելովէ Սաբաւովթ. եթէ հայելով հայեսցիս ի տառապանս աղախնոյ քոյ, եւ յիշեսցես զիս. եւ տացես աղախնոյ քում զաւակ առն, տաց զնա նուէր առաջի քո մինչչեւ ցաւր մահուան իւրոյ. եւ գինի եւ արբեցութիւն մի արբցէ, եւ երկաթ մի ելցէ ի գլուխ նորա:

12․ Եւ եղեւ իբրեւ յաճախեաց կալ յաղաւթս առաջի Տեառն. եւ Հեղի քահանայ միտ դնէր բերանոյ նորա.

13․ եւ նա խաւսէր ի սրտի իւրում, եւ շրթունք իւր ոչ շարժէին, եւ բարբառ իւր ոչ լինէր լսելի: եւ լուաւ նմա Տէր: Եւ համարեցաւ զնա Հեղի արբեալ.

14․ եւ ասէ ցնա պատանեակն Հեղեայ. Մինչչեւ յե՞րբ կայցես յարբեցութեան, թափեա ի քէն զգինիդ քո, եւ գնա յերեսաց Տեառն:

15․ Եւ պատասխանի ետ Աննա` եւ ասէ. Ոչ այդպէս Տէր, այլ կին վշտագնեալ եմ ես ոգւով, եւ գինի եւ արբեցութիւն ոչ է իմ արբեալ. եւ հեղում զանձն իմ առաջի Տեառն:

16․ մի համարիր զաղախին քո դուստր ժանտ, զի ի բազում տրտմութենէ եւ ի տխրութենէ իմմէ վարանեալ կամ մինչչեւ ցայժմ:

17․ Ետ նմա պատասխանի Հեղի` եւ ասէ. Երթ ի խաղաղութիւն, եւ Աստուած Իսրայէլի տացէ քեզ զամենայն խնդրուածս քո զոր խնդրեցեր ի նմանէ:

18․ եւ ասէ Աննա. Եգիտ աղախին քո շնորհս առաջի քո: Եւ գնաց կինն զճանապարհս իւր, եւ եմուտ ի վանս իւր` եւ կերաւ ընդ առն իւրում, եւ խաւսեցաւ, եւ երեսք իւր այլ ոչ եւս տխրեցան:

19․ եւ կանխեցին ընդ առաւաւտն երկիր պագին Տեառն, եւ գնացին զճանապարհս իւրեանց: եւ եմուտ Եղկանա ի տուն իւր յԱրիմաթեմ. եւ մերձեցաւ առ Աննա կին իւր: Եւ յիշեաց զնա Տէր, եւ յղացաւ:

20․ եւ եղեւ ի ժամանակի աւուրցն, եւ ծնաւ որդի, եւ կոչեաց զանուն նորա Սամուէլ` ասէ. Զի ի տեառնէ Աստուծոյ զաւրութեանց խնդրեցի զսա:

21․ Եւ ել այրն Եղկանա եւ ամենայն տուն նորա զոհել ի Սելով զզոհ աւուրցն. եւ զուխտս իւր, եւ զամենայն տասանորդս իւր տարաւ:

22․ Եւ Աննա` ոչ ել ընդ նմա. զի ասաց ցայր իւր. թէ Մինչչեւ ելցէ անդր մանուկս յորժամ հատուցից զսա ի ստենէ. եւ յանդիման լիցի առաջի Տեառն, եւ նստցի անդ մինչչեւ ցյաւիտեան:

23․ Եւ ասէ ցնա Եղկանա այր իւր. Արա որ ինչ բարի թուի առաջի աչաց քոց. նիստ աստէն մինչչեւ հատուսցես զդա ի ստենէ. եւ Տէր հաստատեսցէ որ ինչ ել ի բերանոյ քումմէ: Եւ նստաւ կինն եւ սնոյց զորդին իւր` մինչչեւ հատոյց զնա ի ստենէ:

24․ Եւ ել ընդ նմա ի Սելով երեմենեաւ զուարակաւ, եւ պանիւք եւ արդուաւ նաշհւոյ, եւ սափորով գինւոյ. եւ մտին ի տուն Տեառն ի Սելով. եւ մանուկն ընդ նոսա.

25․ եւ մատուցին առաջի Տեառն: եւ սպան հայրն նորա զզոհն` զոր առնէր աւուրց յաւուրս Տեառն: Եւ մատոյց զմանուկն. եւ սպան զզուարակն վասն փրկութեան մանկանն:

26․ Եւ մատոյց Աննա մայր մանկանն զմանուկն առ Հեղի, եւ ասէ. Յիս Տէր իմ. կենդանի է անձն քո. ես այն կինն եմ, որ կացի առաջի քո ընդ քեզ`

27․ կալ յաղաւթս առ Տէր վասն մանկանս այսորիկ. եւ ետ Տէր զխնդրուածս իմ, զոր խնդրեցի ի նմանէ:

28․ Եւ տամ զդա փոխ Տեառն` զամենայն աւուրս որչափ եւ կեցցէ. եւ եղիցի դա` փոխ Տեառն: եւ պագին երկիր անդ Տեառն: Եւ յաղաւթս եկաց Աննա` եւ ասէ: