Գլուխ 3

   
1․ Եւ մանուկն Սամուէլ կայր ի սպասու Տեառն առաջի Հեղեայ քահանայի: Եւ բան Տեառն պատուական էր յաւուրսն յայնոսիկ. եւ ոչ գոյր տեսիլ որ գուշակէր:

2․ Եւ եղեւ յաւուր յայնմիկ ննջէր Հեղի ի տեղւոջ իւրում, եւ աչք նորա սկսան ծանրանալ, եւ ոչ կարէր տեսանել:

3․ եւ ճրագն Աստուծոյ չեւ եւս էր անցեալ: եւ Սամուէլ ննջէր ի տաճարին Տեառն` ուր էր տապանակն Աստուծոյ:

4․ Եւ կոչեաց Տէր եւ ասէ. Սամուէլ Սամուէլ: եւ ասէ. Աւասիկ եմ:

5․ եւ ընթացաւ առ Հեղի եւ ասէ. Աւասիկ եմ ես, զի՞ կոչեցեր զիս: եւ ասէ. Ոչ կոչեցի զքեզ, դարձիր անդրէն եւ ննջեա: եւ դարձաւ անդրէն եւ ննջեաց:

6․ Եւ յաւել Տէր միւս անգամ կոչել` եւ ասէ. Սամուէլ Սամուէլ: եւ յարեաւ Սամուէլ չոգաւ առ Հեղի երկրորդ անգամ եւ ասէ. Աւասիկ եմ, զի՞ կոչեցեր զիս: եւ ասէ. Ոչ կոչեցի զքեզ որդեակ իմ, դարձիր անդրէն` եւ ննջեա:

7․ Եւ Սամուէլ նախածանաւթ էր Աստուծոյ. եւ չեւ եւս յայտնեալ էր նմա բան Տեառն:

8․ Եւ յաւել Տէր միւս անգամ կոչել զՍամուէլ յերրորդում նուագին: եւ յարեաւ չոգաւ առ Հեղի` եւ ասէ. Աւասիկ եմ ես` զի՞ կոչեցեր զիս: եւ իմացաւ Հեղի` թէ Տէր կոչէ զմանուկն:

9․ Եւ ասէ Հեղի ցՍամուէլ. Դարձիր անդրէն եւ ննջեա որդեակ. եւ եղիցի եթէ կոչեսցէ զքեզ, ասասցես` խաւսեաց Տէր, զի լուիցէ ծառայ քո: եւ գնաց Սամուէլ` եւ ննջեաց ի տեղւոջ իւրում:

10․ Եւ եկն Տէր եկաց ի վերայ` եւ կոչեաց զնա, որպէս միանգամն եւ միւսանգամ. Սամուէլ Սամուէլ: եւ ասէ Սամուէլ. Խաւսեաց Տէր, զի լուիցէ ծառայ քո:

11․ Եւ ասէ Տէր ցՍամուէլ. Ահա ես առնեմ զբանս իմ ի մէջ Իսրայէլի. որպէս զի ամենայնի որ լսիցէ զնոսա` հնչեսցեն երկոքեան ականջք իւր:

12․ Յաւուր յայնմիկ յարուցից ի վերայ Հեղեայ զամենայն ինչ զոր խաւսեցայ ի վերայ տան նորա. սկսայց եւ կատարեցից:

13․ որպէս պատմեցի նմա, եթէ խնդրեցից վրէժ ի տանէ նորա մինչչեւ յաւիտեան. վասն անաւրէնութեան որդւոց նորա, զի հայհոյէին զԱստուած որդիք նորա, եւ նա ոչ խրատէր զնոսա:

14․ Եւ ոչ այնպէս. այլ երդուայ տանն Հեղեայ, թէ ոչ քաւեսցի անաւրէնութիւն տանն Հեղեայ խնկովք եւ զոհիւք մինչչեւ յաւիտեան:

15․ Եւ ննջեաց Սամուէլ մինչչեւ ցառաւաւտն. եւ կանխեաց ընդ առաւաւտն, եւ եբաց զդուրս տանն Տեառն: եւ Սամուէլ երկեաւ պատմել զտեսիլն Հեղեայ:

16․ Եւ ասէ Հեղի ցՍամուէլ. Սամուէլ որդեակ: եւ ասէ. Աւասիկ ես:

17․ եւ ասէ. Զի՞նչ է բանն խաւսեցեալ ընդ քեզ. մի թաքուցաներ յինէն: աւն եւ աւն արասցէ ընդ քեզ Աստուած, եւ աւն եւ աւն յաւելցէ` թէ թաքուսցես յինէն բան մի յամենայն բանից խաւսեցելոց յականջս քո:

18․ Եւ պատմեաց նմա Սամուէլ զամենայն բանսն, եւ ոչ թաքոյց ի նմանէ: եւ ասէ Հեղի. Տէր որ ինչ բարի է առաջի իւր ինքն արասցէ:

19․ Եւ մեծացաւ Սամուէլ. եւ էր Տէր ընդ նմա, եւ ոչ անկաւ յամենայն բանից նորա ի գետին:

20․ Եւ գիտաց ամենայն Իսրայէլ ի Դանայ մինչչեւ ցԲերսաբէէ` թէ հաւատարիմ է Սամուէլ ի մարգարէս Տեառն:

21․ Եւ յաւել Տէր գուշակել ի Սելով, թէ յայտնեցաւ Տէր Սամուելի ի Սելով ըստ բանին Տեառն. եւ հաւատարիմ եղեւ Սամուէլ` լինել ի մարգարէ Տեառն, յամենայն Իսրայէլ ի ծագաց երկրին մինչչեւ ի ծագս: Եւ Հեղի ծերացեալ էր յոյժ, եւ որդիք նորա երթային երթալով` եւ չար էր ճանապարհ նոցա: