1․ Եւ եղեւ ընդ մտանել Դաւթի եւ արանց նորա ի Սիկիլակ յաւուրն երկրորդի: եւ Ամաղէկ ասպատակեաց ի հարաւակողմն, եւ ի Սիկիլակ. եւ եհար զՍիկիլակ եւ այրեաց զնա հրով.
2․ եւ գերեաց զկանայս եւ զամենայն ինչ որ ի նմա ի փոքուէ մինչչեւ ցմեծ. եւ ոչ սպանին զայր եւ զկին, այլ գերեցին եւ գնացին զճանապարհս իւրեանց:
3․ Եւ եկն Դաւիթ եւ արք իւր ի քաղաքն. եւ ահա այրեցեալ էր քաղաքն, եւ կանայք նոցա եւ ուստերք եւ դստերք իւրեանց գերեալք:
4․ եւ ամբարձին Դաւիթ եւ արք նորա զձայնս իւրեանց եւ լացին, մինչչեւ ոչ եւս գոյր ի նոսա զաւրութիւն լալոյ:
5․ եւ երկոքին կանայքն Դաւթի գերեցան, Աքինովամ Յեզրայելացի, եւ Աբիգեա կին Նաբաղու Կարմելացւոյ:
6․ Եւ նեղեցաւ Դաւիթ յոյժ. զի ասաց ժողովուրդն քարկոծել զնա. եւ զայրացեալ էր ոգի ամենայն ժողովրդեանն իւրաքանչիւր ի վերայ ուստերաց եւ դստերաց իւրեանց: Եւ զաւրացաւ Դաւիթ ի տէր Աստուած իւր.
7․ եւ ասէ Դաւիթ ցԱբիաթար քահանայ` որդի Աքիմելեքայ. Մատո զեփուդդ. եւ մատոյց Աբիաթար զեփուդն առ Դաւիթ:
8․ եւ եհարց Դաւիթ ի Տեառնէ, եւ ասէ. Պնդեցայ՞ց զկնի Գեդդուրայն այնորիկ, եթէ հասանիցե՞մ նոցա: եւ ասէ ցնա Տէր. Պնդեաց եւ հասանելով հասանես, եւ թափելով թափեսցես:
9․ Եւ գնաց Դաւիթ եւ չորեքարեւր արքն որ ընդ նմա, եւ եկին մինչչեւ ցհեղեղատն Բոսորայ. եւ աւելորդքն զտեղի առին:
10․ եւ պնդեցաւ Դաւիթ չորեքարեւր արամբք. եւ երկերիւր այր մնացին որք նստան յայնկոյս հեղեղատին Բոսորայ:
11․ Եւ գտին այր մի եգիպտացի յանդին եւ կալան զնա, եւ ածին առ Դաւիթ յանդն. եւ ետուն նմա հաց եւ կերաւ, եւ արբուցին նմա ջուր:
12․ եւ ետուն նմա կոտոր մի պաղատտաց, եւ երկուս չամչեայս` եւ կերաւ. եւ հաստատեցաւ այնու ոգի նորա. քանզի չէր կերեալ հաց, եւ ոչ արբեալ ջուր զերիս տիւս եւ զերիս գիշերս:
13․ Եւ ասէ ցնա Դաւիթ. Ո՞յր ես դու, եւ ուստի՞ ես: եւ ասէ պատանեակն. Եգիպտացի եմ ես ծառայ առն Ամաղեկացւոյ, եւ եթող զիս տէր իմ. զի նքողեցայ ես այս երրորդ աւր:
14․ եւ մեք ասպատակեցաք ի կողմանս հարաւոյ Քերեթայ, եւ ի կողմանս Հրէաստանի, եւ ի հարաւակողմ Քաղեբայ, եւ զՍիկիլակ այրեցաք հրով:
15․ Եւ ասէ ցնա Դաւիթ. Եթէ իջուցանիցե՞ս զիս ի Գեդդուրն յայն. եւ ասէ ցնա Եգիպտացին. Երդուիր ինձ եթէ ոչ սպանցես զիս, եւ ոչ մատնեսցես զիս ի ձեռս Տեառն իմոյ, եւ իջուցից զքեզ ի Գեդդուրն: եւ երդուաւ նմա.
16․ եւ իջոյց զնա անդր: Եւ ահա նոքա ցրուեալ էին ընդ երեսս ամենայն երկրի, ուտէին եւ ըմպէին. եւ տաւնէին ամենայն աւարաւքն մեծամեծաւք, զոր առին յերկրէն այլազգեաց, եւ յերկրէն Յուդայ:
17․ Եւ եհաս ի վերայ նոցա Դաւիթ. եւ եհար զնոսա Դաւիթ յելանելոյ արուսեկին մինչչեւ ցերեկոյ` եւ ի վաղիւ անդր, եւ ոչ ապրեցաւ ի նոցանէ այր. բայց միայն պատանեակք չորեքարեւր հեծան յուղտս եւ փախեան:
18․ Եւ թափեաց Դաւիթ զամենայն ինչ զոր առին ամաղեկացիքն. եւ զերկոսին կանայս իւր թափեաց Դաւիթ:
19․ եւ ոչ սխալեցաւ ի նոցանէ ի փոքուէ մինչչեւ ցմեծ. եւ յուստերաց եւ ի դստերաց, եւ յաւարէն մինչչեւ ցամենայն ինչ զոր առին ի նոցանէ` զամենայն ինչ դարձոյց Դաւիթ:
20․ Եւ առ Դաւիթ զամենայն հաւտս եւ զանդեայս, եւ տանէր առաջի աւարին. եւ աւարին անուն կոչէր` թէ այս աւար Դաւթի է:
21․ Եւ եկն Դաւիթ առ երկերիւրսն լքեալս յերթալոյ զկնի Դաւթի, եւ նստոյց զնոսա ի հեղեղատին Բոսորայ. եւ ելին ընդ առաջ Դաւթի եւ ընդ առաջ զաւրուն որ ընդ նմա: եւ մատեաւ Դաւիթ առ զաւրն, եւ եհարց զողջունէ նորա ի խաղաղութիւն:
22․ Եւ պատասխանի ետուն նմա ամենայն արք ժանտք եւ անզգամք յարանց պատերազմողաց որք երթեալ էին ընդ Դաւթի, եւ ասեն. Եթէ զի ոչ եղեն հետամուտ ընդ մեզ, ոչ տացուք դոցա յաւարէ աստի զոր թափեցաք. բայց եթէ զիւրաքանչիւր զկին եւ զորդիս առցեն եւ գնասցեն ի բաց:
23․ Եւ ասէ Դաւիթ. Մի արասցի այդպէս եղբարք իմ, յետ մատնելոյ զնոսա մեզ Տեառն, եւ պահելոյ զմեզ. եւ մատնեաց Տէր ի ձեռս մեր զգեդդուրն եկեալ ի վերայ մեր:
24․ եւ ո՞ անսասցէ` բանիցդ ձերոց այդոցիկ, զի ոչ ինչ են ընդ հատ ի ձէնջ. քանզի ըստ մասին երթալոյն ի պատերազմ, նոյնպէս եղիցի մասն վանապանին. ըստ նմին աւրինակի բաժանեսցին:
25․ Եւ եղեւ յաւրէ յայնմանէ եւ անդր` իբրեւ աւրէնք եւ իրաւունք` ի մէջ Իսրայէլի մինչչեւ ցայսաւր:
26․ Եւ եկն Դաւիթ ի Սիկիլակ. եւ առաքեաց յաւարէ անտի ծերոցն Յուդայ, եւ ընկերաց իւրոց, եւ ասէ. Այդ ձեզ աւրհնութիւն յաւարէ թշնամեաց Տեառն,
27․ որ ի Բեթելդ էք, եւ յՌամաթ հարաւոյ, եւ որք յԵթեր,
28․ եւ յԱրոեր, եւ որք յԵփթամովթ, եւ որք յԵսթամա.
29․ եւ որք յԵրաքէլ, եւ որք ի քաղաքս Յերեմելացւոյն, եւ որք ի քաղաքս Կինեցւոյն.
30․ որք ի Հռամա, եւ որք ի Բովրանս, եւ որք յԱնաթաք.
31․ եւ որք ի Քեբրոն. եւ որք յամենայն տեղիս` ընդ որ շրջեցաւ Դաւիթ ինքն եւ արք իւր:
Հաղորդում կայքում սխալի վերաբերյալ
Տվյալ հատվածում առկա է սխալ: