Գլուխ 8

1․ Եւ եղեւ իբրեւ ծերացաւ Սամուէլ, կացոյց զորդիս իւր դատաւորս Իսրայէլի:

2․ Եւ այս են անուանք որդւոց նորա. անդրանկանն Յովէլ, եւ անուն երկրորդին Աբիա. դատաւորք ի Բերսաբէէ:

3․ Եւ ոչ գնացին որդիք նորա զճանապարհս նորա, եւ թիւրեցան զհետ զաւշաքաղութեան. եւ առնուին կաշառ եւ թիւրէին զիրաւունս:

4․ Եւ ժողովեցան ամենայն արք Իսրայէլի` եւ եկին առ Սամուէլ յԱրիմաթեմ,

5․ եւ ասեն ցնա. Դու աւադիկ ծերացար. եւ որդիք քո ոչ գնան զճանապարհ քո: եւ արդ` կացո ի վերայ մեր թագաւոր դատել զմեզ որպէս եւ այլ ազգք:

6․ Եւ չար թուեցաւ բանն յաչս Սամուելի. զի ասացին թէ տուր մեզ թագաւոր դատել զմեզ: եւ յաղաւթս եկաց Սամուէլ առ Տէր:

7․ Եւ ասէ Տէր ցՍամուէլ. Լուր ձայնի ժողովրդեանդ, որպէս եւ խաւսեցան ընդ քեզ: զի ոչ եթէ զքեզ անարգեցին, այլ զիս մերժեցին չթագաւորել ի վերայ նոցա:

8․ ըստ ամենայն գործոց զոր արարին ընդ իս` յաւրէ յորմէ հանի զնոսա յԵգիպտոսէ մինչչեւ ցայսաւր. եւ թողին զիս եւ ծառայեցին աստուածոց աւտարաց, նոյնպէս առնեն նոքա եւ ընդ քեզ:

9․ Եւ արդ` լուր ձայնի նոցա. բայց դնելով դնիցես վկայութիւն նոցա, եւ պատմեսցես նոցա զիրաւունս թագաւորի` որ թագաւորեսցէ նոցա:

10․ Եւ խաւսեցաւ Սամուէլ զամենայն պատգամս Տեառն առ ժողովրդեանն` որ խնդրեցին ի նմանէ թագաւոր,

11․ եւ ասէ. Այս ինչ լիցին իրաւունք թագաւորին որ թագաւորեսցէ ի վերայ ձեր. զուստերս ձեր առցէ, եւ արասցէ կառավարս եւ հեծեալս, եւ սուրհանդակս առաջի կառաց իւրոց:

12․ եւ կացուսցէ զնոսա իւր հազարապետս, եւ հարիւրապետս. եւ հնձել զհունձս նորա, եւ կթել զկութս նորա, եւ առնել նմա զէնս` եւ անաւթս կառաց:

13․ եւ զդստերս ձեր առցէ յիւղագործս, եւ ի խորտկարարս, եւ ի հացեփեացս:

14․ Եւ զանդս ձեր, եւ զայգիս ձեր, եւ զձիթենիս ձեր զազնիւս առցէ. եւ տացէ ստրկաց իւրոց:

15․ եւ զսերմանս ձեր, եւ զայգիս ձեր տասանորդեսցէ, եւ տացէ ներքինեաց իւրոց, եւ ստրկաց իւրոց:

16․ Եւ զծառայս ձեր, եւ զաղախնայս ձեր, եւ զանդեայս ձեր զազնիւս, եւ զէշս ձեր` առցէ եւ տասանորդեսցէ ի գործ իւր:

17․ եւ զհաւտս ձեր տասանորդեսցէ. եւ դուք եղիջիք նմա ծառայք:

18․ Եւ աղաղակեսջիք յաւուր յայնմիկ յերեսաց թագաւորին ձերոյ` զոր ընտրեցէք ձեզ, եւ ոչ լուիցէ ձեզ Տէր յաւուրսն յայնոսիկ. զի դուք ձեզէն ընտրեցէք ձեզ թագաւոր:

19․ Եւ ոչ կամեցաւ ժողովուրդն լսել Սամուելի. եւ ասեն ցնա. Ոչ այդպէս է, այլ թագաւորեսցէ ի վերայ մեր.

20․ եւ եղիցուք եւ մեք իբրեւ զայլ ազգս, եւ դատեսցէ զմեզ թագաւորն մեր, եւ ելցէ առաջի մեր եւ պատերազմեսցի զպատերազմ մեր:

21․ Եւ լուաւ Սամուէլ զամենայն բանս ժողովրդեանն. եւ խաւսեցաւ զնոսա յականջս Տեառն:

22․ Եւ ասէ Տէր ցՍամուէլ. Լուր ձայնի նոցա` եւ թագաւորեցո նոցա թագաւոր: եւ ասէ Սամուէլ ցարս Իսրայէլի. Երթիցէ իւրաքանչիւր ոք ի քաղաք իւր: