Գլուխ 15

   
1․ Եւ եղեւ յետ աւուրց, յաւուրս հնձոց ցորենոյ, այց արար Սամիսովն կնոջ իւրում, առել ուլ մի յայծեաց. եւ ասէ. Մտից առ կին իմ ի սենեակ: եւ ոչ եթող զնա հայր նորա մտանել առ նա:

2․ Եւ ասէ հայր նորա. Ասելով ասացի` թէ ատեցեր զնա, եւ ետու զնա ընկերի քում. ո՞չ աւասիկ քոյր նորա կրսեր լաւագոյն է քան զնա. եւ եղիցի սա քեզ փոխանակ նորա:

3․ Եւ ասէ ցնա Սամիսովն. Անպարտ եմ ես միանգամայն յայլագեացդ. էթէ արարից ինչ ես չարութիւն ընդ դոսա:

4․ Եւ գնաց Սամիսովն, եւ կալաւ երեք հարիւր աղուէսս. եւ առ ջահս, եւ կապեաց զնոսա ձետ ընդ ձետ, եւ եդ զջահսն ի մէջ երկուց ձետոց, եւ կապեաց ի միջոցին զջահսն:

5․ եւ ելոյց հուր ի ջահսն, եւ արձակեաց յոճ այլազգեացն. եւ այրեաց զաւրանն, եւ զյառաջագոյն հնձեալսն` ի բարդից մինչչեւ ցկանկնաւորս, եւ ցայգիս եւ ցձիթենիս:

6․ Եւ ասեն այլազգիքն. Ո՞ արար զայս: Եւ ասեն. Սամիսովն փեսայ Թեմնացւոյն. զի էհան զկին նորա` եւ ետ ընկերի նորա: եւ ելին այլազգիքն եւ այրեցին զտուն հաւր նորա, եւ զկինն եւ զհայր նորա հրով:

7․ Եւ ասէ ցնոսա Սամիսովն. Եթէ դոյն չափ եւս առնիցէք, սակայն ոչ հաճեցայց. այլ վրէժ իւրաքանչիւր յումեքէ խնդրեցից:

8․ Եւ էհար զնոսա ի սրնոց մինչչեւ ցերանս հարուածս մեծամեծս: Եւ էջ եւ բնակեցաւ առ հեղեղատաւն յայրին Ետամայ:

9․ եւ ելին այլազգիքն, եւ բանակեցան առ Յուդայիւ, եւ անկան զՂեքաւ:

10․ Եւ ասէ ցնոսա այր Յուդայ. Ընդէ՞ր ելէք ի վերայ մեր: եւ ասեն այլազգիքն. Կապել զՍամիսովն ելաք, եւ առնել ընդ նա զոր աւրինակ արար ընդ մեզ:

11․ Եւ իջին չորս հազարք արանց ի Յուդայէ ի ծակ վիմին Էտեմայ. եւ ասեն ցՍամիսովն. Ո՞չ գիտես զի իշխեն մեզ այլազգիքն, եւ ընդէ՞ր արարեր զայս ընդ մեզ: Եւ ասէ ցնոսա Սամիսովն. Որպէս արարին ընդ իս, նոյնպէս արարի ընդ նոսա:

12․ Եւ ասեն ցնա. Կապել զքեզ եկաք, եւ մատնել զքեզ ի ձեռս այլազգեաց: եւ ասէ ցնոսա Սամիսովն. Երդուարուք դուք ինձ` չսպանանել զիս եւ տուք զիս ցնոսայ. եւ դուք մի երբէք պատահիցէք ինձ:

13․ Եւ երդուան նմա` եւ ասեն, Ոչ. այլ կապելով կապեսցուք զքեզ, եւ տացուք ի ձեռս նոցա. բայց մահու ոչ սպանցուք զքեզ: Եւ կապեցին զնա երիւք կապովք նորովք, եւ հանին զնա ի վիմէն.

14․ եւ եկն մինչչեւ ցծնաւտն. եւ այլազգիքն աղաղակեցին եւ ընթացան ընդդէմ նորա: Եւ յաջողեցաւ ի վերայ նորա հոգին Տեառն. եւ եղեն կարքն ի բազուկս նորա իբրեւ զխծուծ` յորժամ ի հուր հոտոտիցի, եւ հալածեցան կապանքն ի բազկաց նորա:

15․ Եւ եգիտ ծնաւտ մի իշոյ ընգեցեալ. ձգեաց զձեռն իւր եւ առ զնա. եւ էհար նովաւ հազար այր:

16․ Եւ ասէ Սամիսովն. Ծնաւտի իշոյ ջնջելով ջնջեցից զնոսա, զի ծնաւտիւ իշոյ կոտորեցի հազար այր:

17․ Եւ եղեւ իբրեւ կատարեաց զխաւսելն, ընգեց զծնաւտն ի ձեռանէ իւրմէ. եւ կոչեաց զտեղին զայն կոտորած ծնաւտի:

18․ Եւ ծարաւեցաւ յոյժ, եւ աղաղակեաց առ Տէր` եւ ասէ. Դու յաջողեցեր ձեռամբ ծառայի քոյ զփրկութիւնս զայս մեծ. եւ արդ մեռանիցիմք ի ծարաւոյ, եւ անկանիցի՞մ ի ձեռս անթլփատիցն:

19․ Եւ եբաց Տէր զծակ ծնաւտին, եւ ել ի նմանէ ջուր, եւ արբ. եւ դարձաւ ոգի նորա ի յինքն եւ զովացաւ: վասն այնորիկ կոչեաց զանուն նորա աղբեւր անուանել ծնաւտի մինչչեւ ցայսաւր:

20․ Եւ դատեաց զԻսրայէլ ամս քսան յաւուրս այլազգեացն: