Գլուխ 17

   
1․ Եւ եղեւ այր ի լեռնէ Եփրեմայ, եւ անուն նորա Ամիքայ:

2․ Եւ ասէ ցմայր իւր. Զհազար եւ զհարիւր արծաթոյն զոր առեր առ քեզ, եւ երդուար` եւ ասես յականջս իմ թէ ահա արծաթն առ իս է, ես առի զայն: եւ ասէ մայրն նորա. Աւրհնեալ լիցի որդեակ իմ ի Տէր:

3․ Եւ դարձոյց անդրէն զհազար եւ զհարիւր արծաթոյն առ մայր իւր: եւ ասէ մայր նորա. Սրբելով սրբեսցի արծաթն Տեառն ի ձեռանէ իմմէ, առանձինն. առնել դրաւշեալ եւ ձուլածոյ. եւ արդ` դարձուցից զնա առ քեզ:

4․ եւ դարձոյց զարծաթն առ մայր իւր: Եւ առ մայր նորամ արծաթոյ, եւ ետ զայն ցձուլածիչն. եւ արար զայն դրաւշեալ եւ ձուլածոյ. եւ եղեւ ի տան Միքայի:

5․ եւ տուն Միքայի` տուն Աստուածոյ նմայ: եւ արար Եփուտ, եւ Թերափ. եւ ելից զձեռն միոյ յորդւոց իւրոց, եւ եղեւ նմա ի քահանայ:

6․ Յաւուրսն յայսոսիկ ոչ գոյր թագաւոր Իսրայէղի. եւ այր իւրաքանչիւր զհաճոյ աչաց իւրոց առնէր:

7․ Եւ եղեւ պատանեակ մի ի Բեթղէէմ Յուդայ, եւ ինքն Ղեւտացի. եւ բնակէր նա անդ:

8․ Եւ գնաց այր ի քաղաքէ Բեթղէեմի Յուդայ պանդխտանալ ուր եւ գտանիցէ. եւ եկն մինչչեւ ցլեառնն Եփրեմայ, եւ մինչչեւ ցտունն Միքայ, առնել զճանապարհ իւր:

9․ Եւ ասէ ցնա Միքա. Ուստի՞ գաս: եւ ասէ ցնա. Ղեւտացի եմ ես ի Բեթղէեմէ Յուդայ, եւ երթամ պանդխտանալ` ուր եւ գտանիցեմ:

10․ Եւ ասէ ցնա Միքա. Նիստ առ իս, եւ լեր ինձ ի հայր եւ ի քահանայ. եւ ես տաց քեզ տասն արծաթոյ` աւուրց յաւուրս, եւ զոյգս ձորձոց, եւ ռոճիկ որով կայցես: Եւ չոգաւ Ղեւտացին.

11․ եւ սկսաւ պանդխտանալ առ առնն. եւ եղեւ նմա պատանեակն իբրեւ զմի յորդւոց նորա:

12․ Եւ ելից Միքա զձեռս Ղեւտացւոյն, եղեւ նմա պատանեակն ի քահանայ, եւ ի տան Միքայ:

13․ Եւ ասէ Միքա. Այժմ գիտացի` էթէ բարի արար ինձ Տէր. զի եղեւ ինձ Ղեւտացի քահանայ:

14․ Յաւուրս յայսոսիկ ոչ գոյր թագաւոր Իսրայէղի: