Գլուխ 5

   
1․ Եւ աւրհնեաց Դեբբովրա, եւ Բարակ որդի Աբիենէեմայ յաւուր յայնմիկ` եւ ասեն:

2․ Ի սկսանել զաւրավարացն Իսրայէղի, մտադիւրութեամբ ժողովրդեանն աւրհնեցէք զՏէր:

3․ Լուարուք թագաւորք` եւ ունկնդիր լերուք նախարարք. ես Տեառն երգեցից, եւ սաղմոս ասացից Աստուծոյ Իսրայէղի:

4․ Տէր յելանել քոյ ի Սէիրայ, եւ ի չուել քում յանդաստանացն Եդովմայ, երկիր շարժեցան եւ երկինք խռովեցաւ, եւ ամբք ցաւղեցին ջուր:

5․ լերինք շարժեցան յերեսաց Տեառն Եղոյայ Սինայի, յերեսաց Տեառն Աստուծոյ Իսրայէղի:

6․ Յաւուրս Սամեգերայ որդւոյ Անաթայ` աւուրս յայելի, պակասեցին թագաւորք գնացին ընդ շաւեղս, գնացին ընդ ճանապարհս կամակորս:

7․ Պակասեցին փարազուք բնակեալ ի մէջ Իսրայէղի` պակասեցին, մինչչեւ յարեւ Դեբովրա, մինչչեւ յարեաւ մայր Իսրայէղի:

8․ Ցանկացան իբրեւ գարեղէն նկանակի աստուածոց սնոտեաց: յայնժամ պատերազմեցան քաղաքք իշխանաց: ծածկութեամբ նորոց գեղերդանց, քառասուն հազար այր ի մէջ Իսրայէղի:

9․ Սիրտ իմ ի վերայ կարգելոցն Իսրայէղի: զաւրաւորք ժողովրդեանդ աւրհնեցէք զՏէր:

10․ Հեծեալք յերիվարս մէջաւրէի, եւ սպիտակաց. երթեալք յատեանս ատենակալաց: Տուք ձայն բարբառոյ,

11․ նուագածուաց, ի մէջ ցնծացելոց: անդ կացեն արդարութիւն Տեառն: զարդարութիւնս զաւրացոյ ի մէջ Իսրայէղի: յայնժամ էջ ի քաղաքս ժողովուրդն Տեառն:

12․ Զարթիր զարթիր Դեբբովրա. զարթո զբիւրաւորս հանդերձ ժողովրդեամբ: զարթիր զարթիր խաւսեաց երգովք: Զաւրացեալս յարիցես Բարակ. երգեսցես զգերութիւն քո` որդի Ենէեմայ:

13․ Յայնժամ մեծաւ զաւրութիւն նորա: Տէր ընկրկեաց ինձ զզաւրագոյնս քան զիս:

14․ Ժողովուրդ Եփրեմայ պատժեաց զնոսա հովիտս: եղբայր քո Բենիամին` քոյին ժողովրդովք: Յինէն ի Մաքիր իջին խուզարկուք: եւ ի Զաբողովնէ զաւրացուցիչք, գաւազանաւ պատմութեան դպրի:

15․ Եւ զաւրավարք Իսաքարու ընդ Դեբբովրա եւ ընդ Բարակայ: եւ ապա Բարակ ի հովիտսն տարածեաց զոտս իւր. ի բաժինս Ռովբենի մեծամեծ ճգնութիւն սրտի:

16․ Ընդէ՞ր նստիցին ի մէջ Մոսփաթեմա. լսել զշնչիւնս տագնապողաց, անցանել ի կողմն Ռովբենի: Մեծամեծք յարուցեալ կան հետազաւտութիւնք սրտի:

17․ Գաղաադ` յայնկոյս Յորդանանու բնակեաց: եւ Դան` ընդէ՞ր բնաւ պանդխտեցաւ ի նաւս: Ասեր` բնակեց առ եզր ծովուց, եւ ի կիրճս նորա բնակեսցէ:

18․ Զաբողովն` ժողովուրդ անձնանախատ ի մահ: եւ Նեփթաղիմ ի բարձունս ագարակի:

19․ Հասին թագաւորք նոցա` եւ ճակատեցան. յայնժամ պատերազմեցան թագաւորք Քանանացւոց ի Թանաք ի վերայ ջրոց Մակեդովդա: Զագահութիւն արծաթոյ ես ոչ առի:

20․ Յերկնից ճակատեցան աստեղք` յիւրաքանչիւր յաւրինածոց, ետուն պատերազմ ընդ Սիսարայ:

21․ Հեղեղատն Կիսովնի մերժեաց զնոսա. հեղեղատն Կադեսիմայ, հեղեղատն Կիսովնի: Կոխեսցէ զնոսա անձն իմ:

22․ ոտն իմ զաւրասցի զաւրութեամբ: Յայնժամ կարթակոտոր եղեն գարշապարք երիւարացն Մարդդարովթա: եւ հերքեսցեն գարշապարք իմ զհպարտութիւնս զարհուրանաց նոցա:

23․ Նզովեցէք զՄարովղ` ասէ հրեշտակն Տեառն, անիծանելով անիծէք զբնակիչս նորա. զի ոչ եկին յաւգնութիւն Տեառն: աւգնական Տէր ի մէջ նահատակաց հզաւրն:

24․ Աւրհնեսցի ի կանայս յայել կին Քաբերայ Կինեցւոյ. աւրհնեսցի ի կանանց ի խորանի իւրում:

25․ Ջուր խնդրեաց, եւ ետ կաթն դաշխուրանաւ զաւրաւորաց. մատոյց կոգի:

26․ Զձեռն իւր ձախ ձգեաց ի ցիցն, եւ զաջ իւր ի սպառսպուռ ջախջահանս անպիտանացուցանել, եւ վախճանեցոյց զՍիսարա: Վարսեաց ընդ ծամելիս նորա, անցոյց ցից ընդ գլուխ նորա, եւ սատակեաց:

27․ Ի մէջ ոտից նորա անկաւ ծանրացեալ, եւ նիրհեցոյց ի մէջ ծնգաց իւրոց. յորում կորացաւ մինչչեւ զգետնեցաւ` անդ անկաւ չուառականն:

28․ Մայրն Սիսարայ հայեցեալ դէտ ակն ունէր ի վանդակապատ պատուհանէն. քանզի տեսանէր զդարձեալսն ի Սիսարաէ. վասն զի յայտնեցան կառք նորա ի Գալոյ, ընդէ՞ր յամեցին հետք կառաց նորա:

29․ Կանայք իմաստունք իշխանաց նորա, ետուն անդրէն պատասխանի նմա` եւ ասեն ¡: եւ ինքն անձամբ անձին առնէր իւր պատասխանի:

30․ Ոչ գտանիցեն զնա աւարաբաշխ, առնել զսէր բարեկամաց ի գլուխ արանց. եւ եդեալ զաղիս նորա: Կապուտ երանգւոցն Սիսարայ ի կապուտ երանգւոցն գոյնագոյն նկարուց, նարաւտ պէսպէս նկարացուց. անէր պարանոցին նորա կապուտ:

31․ Այսպէս կորիցեն ամենայն թշնամիք քո Տէր: եւ որք սիրիցեն զնա` իբրեւ զելս արեգական ի զաւրութեան նորա:

32․ Եւ դադարեաց երկիրն ամս քառասուն: