1. Եւ այր Իսրայէղի երդուան ի Մասեփա, եւ ասեն. Այր ոք ի մէնջ մի տացէ զդուստր իւր Բենիամենի կնութեան:
2. Եւ եկին ամենայն ժողովուրդն ի Մասեփայ ի Բեդէլ. եւ նստան անդ մինչչեւ ցերեկոյ առաջի Աստուծոյ. Եւ ամբարձին զձայնս իւրեանց եւ լացին լալիւն մեծ:
3. եւ ասեն. Ընդէ՞ր Տէր Աստուած Իսրայէղի` եղեւ այս յԻսրայէղի, բնաջինջ լինել այսաւր յԻսրայէլէ ցեղի միոյ:
4. Եւ ել վաղիւ անդր կանխեաց ժողովուրդն եւ շինեաց անդ սեղան, եւ մատուցին ողջակէզս փրկութեան:
5. Եւ ասեն որդիքն Իսրայէղի. Ո՞ է որ ոչ ել յայլ եկեղեցի յամենայն ցեղիցն Իսրայէղի առ Տէր: զի երդումն մեծ էր այնմ, որ ոչ ելանէր առ Տէր ի Մասեփա. եւ ասէին թէ մահու մեռցի:
6. Եւ մխիթարեցան որդիքն Իսրայէղի ի վերայ Բենիամենի եղբաւր իւրեանց, եւ ասեն. Բարձաւ այսաւր ցեղ մի յԻսրայէլէ.
7. եւ զի՞նչ արասցուք մնացելոցն առանց կանանց, եւ մեք երդուաք ի Տէր` չտալ նոցա ի դստերաց մերոց կանայս:
8. Եւ ասեն. Ո՞ ոք մի ի ցեղից Իսրայէղի որ ոչ ել առ Տէր ի Մասեփա: եւ ահա չէր ոք եկեալ Յաբիսայ Գաղաադու ի բանակ եկեղեցւոյն:
9. Եւ անց ի հանդիսի ժողովուրդն. եւ ոչ գոյր անդ այր ի տանէ Յաբիսայ Գաղաադու:
10. Եւ առաքեցին անդր ժողովուրդն երկոտասան հազար արանց զաւրութեան: եւ պատուիրեցին նոցա` եւ ասեն. Երթայք եւ հարէք զբնակիչս Յաբիսայ Գաղաադու սրով սուսերի:
11. եւ այս բան է զոր առնիցէք. զամենայն արու, եւ զամենայն կին` որ գիտիցէ զանկողին արուի, նզովեսջիք:
12. Եւ գտին ի տանէ Յաբիսայ Գաղաադու չորեք հարիւր աղջիկ կոյս` որ ոչ գիտէին զայր յանկողինս արուի: եւ ածին զնոսա ի բանակն ի սելով, որ է յերկիրն քանանացւոց:
13. Եւ առաքեաց յամենայն ժողովուրդն եւ խաւսեցան ընդ որդիսն Բենիամենի` որ ի վիմին Ռեմմովնա, եւ կոչեցին զնոսա ի խաղաղութիւն:
14. Եւ դարձաւ Բենիամին առ որդիսն Իսրայէղի ի ժամանակին յայնմիկ: Եւ ետուն նոցա կանայս զայնոսիկ` որ էին ի կանանցն Յաբիսայ Գաղաադու. եւ հաճոյ թուեցան նոցա այնպէս:
15. Եւ ժողովուրդն մխիթարեցաւ ի վերայ Բենիամենի. զի արար Տէր խրամատութիւն ի մէջ ցեղիցն Իսրայէղի:
16. Եւ ասեն ծերք ժողովրդեանն. Զի՞նչ արասցուք եւ վասն այլոցն անկանացն. զի սակաւեցաւ կին ի Բենիամենէ:
17. Եւ ասեն. Ժառանգութիւն զերծեալ է Բենիամենի, եւ ջնջեսցի ցեղն յԻսրայէլէ:
18. եւ մեք ոչ կարեմք տալ նոցա կին ի դստերաց մերոց. զի երդուաք որդիք Իսրայէղի` եւ ասեմք, թէ Անիծեալ լիցի որ տացէ կին Բենիամենի:
19. Եւ ասեն. Ահա տաւն է ի սելով աւուրց յաւուրս. որ է ի հիւսւսոյ Բեդէլայ, ընդ արեւելս ճանապարհին որ հանէ ի Բեթղա ի Սիկիմ, եւ ի հարաւոյ Լիբանանու Ղեբովնայ:
20. Եւ պատուիրեցին որդւոցն Բենիամենի` եւ ասեն. Երթայք եւ դարանամուտ լերուք յայգեստանի.
21. եւ յորժամ տեսանիցէք թէ ելանիցեն դստերք բնակչացն սելովայ պար առեալ պարուք, ելջիք յայգեստանէն, եւ յափշտակիջիք այր իւրաքանչիւր կին ի դստերացն սելովայ. եւ երթիջիք յերկիր Բենիամենի:
22. Եւ եղիցի յորժամ գայցեն հարք նոցա կամ եղբարք նոցա դատել ընդ ձեզ, ասասցուք նոցա` թէ Ողորմեցաք նոցա. զի ոչ առ այր զկին իւր ի պատերազմին, զի եւ ոչ դուք ետուք նոցա թէ յանցանք ինչ իցեն:
23. Եւ արարին այնպէս որդիքն Բենիամենի, եւ առին կանայս ըստ թուոյ իւրեանց, ի պարաւորացն զորս յափշտակեցին. եւ գնացին` եւ դարձան յիւրաքանչիւր ժառանգութիւն իւրեանց, եւ շինեցին իւրեանց քաղաքս եւ բնակեցին ի նմա:
24. Եւ գնացին անտի որդիքն Իսրայէղի ի ժամանակի յայնմիկ այր յիւրաքանչիւր ցեղի իւր, եւ յազգատոհմ իւր. եւ ելին անտի այր յիւրաքանչիւր ժառանգութիւն իւր: Յաւուրս յայնոսիկ ոչ գոյր թագաւոր Իսրայէղի. եւ այր իւրաքանչիւր զհաճոյ աչաց իւրոց առնէր: Առաջի դատաւոր Գոդոնիէլ որդի Կինեզի յետ ութ ամի ծառաելոյ Քուսարաթիմա դատել զԻսրայէլ ամս քառասուն: Արդ` ի ցեղէն Բենիամենի յետ ութուտասն ամի ծառայելոյ Եգղոմ թագաւորին Մովաբու դատեաց զԻսրայէլ ամս ութսուն: Դեբորա եւ Բարաք ի ցեղէն Նեփթաղիմայ յետ քսան ամի ծառաելոյ Եաբին թագաւորին Քանանու դատեց զԻսրայէլ քառասուն ամ: Գեդէոն ի ցեղէն Մանասէի յետ եւթն ամի ծառաելոյ Մադիամու դատեաց զԻսրայէլ քառասուն ամ: Աբիմելեք եղբայր ասպանն երեք ամ: Թողա ի ցեղէն Իսաքարու դատեց զԻսրայէլ քսան եւ երեք ամ: Յաիր Գաղադացի դատեց զԻսրայէլ քսան եւ երկու ամ: Յեփթաէ Գաղադացի յետ ծառաելոյ որդւոցն Ամմովնա ութուտասն ամ դատեց զԻսրայէլ վեց ամ: Եսէոն Բեթղեէմացի եւթն ամ: Ելոմ Զաւբողնի տասն ամ: Ադովն որդի Ելլիքէ` ութ ամ: Սամիսոն ի Դանա յետ քառասուն ամի ծառաելոյ այլազգեցն դատեց զԻսրայէլ քսան ամ. կարծել յետ այս որ աննշան զժամսն որպէս յառաջն ի Յեսու մինչչեւ ցԳոդոնիէլ: Իսկ նշանել ժամք դատաւորացն ամք չորս հարիւր տասն:
Հաղորդում կայքում սխալի վերաբերյալ
Տվյալ հատվածում առկա է սխալ: