Գլուխ 6

   
1․ Եւ արարին որդիքն Իսրայէղի չար առաջի Տեառն. եւ եդ զնոսա Տէր ի ձեռս Մադիամու ամս եւթն.

2․ եւ զաւրացաւ ձեռն Մադիամու ի վերայ Իսրայէղի: Եւ արարին իւրեանց որդիքն Իսրայէղի յերեսաց Մադիամու գոմս ի լերինս, եւ յայրս եւ յամուրս:

3․ Եւ լինէր իբրեւ վարէր այր Իսրայէղի. ելանէր Մադիամ եւ Ամաղէկ եւ որդիքն արեւելեայց հասանէին ի վերայ նոցա,

4․ եւ բնակին առ նոքաւք, եւ ապականէին զբերս երկրին մինչչեւ ի մուտս Գաղայ. եւ ոչ թողին դադար կենաց յԻսրայէղի. ոչխար, եւ արջառ, եւ էշ:

5․ Զի ինքեանք եւ խաշինք իւրեանց ելանէին, եւ զվրանս իւրեանց բերէին. եւ հասանէին իբրեւ զմարախ բազմութեամբ. եւ ոչ գոյր թիւ նոցա, եւ ուղտուց իւրեանց. եւ հասանէին յերկիրն Իսրայէղի ապականել զնա:

6․ եւ աղքատացաւ յոյժ Իսրայէլ յերեսաց Մադիամու: Եւ որդիքն Իսրայէղի աղաղակեցին առ Տէր:

7․ եւ եղեւ իբրեւ աղաղակեցին որդիքն Իսրայէղի առ Տէր վասն Մադիամու,

8․ առաքեաց Տէր այր մարգարէ առ որդիսն Իսրայէղի` եւ ասէ ցնոսա: Այսպէս ասէ Տէր Աստուած Իսրայէղի. Ես եմ որ հանի զձեզ յերկրէն Եգիպտացւոց, եւ կորզեցի զձեզ ի տանէ ծառայութեան.

9․ եւ փրկեցի զձեզ ի ձեռաց Եգիպտացւոց, եւ ի ձեռաց ամենայն նեղչաց ձերոց. եւ մերժեցի զնոսա յերեսաց ձերոց, եւ ետու ձեզ զերկիր նոցա:

10․ Եւ ասացի ձեզ. Ես եմ Տէր Աստուած ձեր, եւ մի երկնչիք յաստուածոց Ամուրհացւոցն, յորոց ի միջի դուք բնակեալ էք յերկրի նոցա. եւ ոչ լուարուք ձայնի իմում:

11․ Եւ եկն հրեշտակ Տեառն, եւ նստաւ ընդ կաղնեաւն` որ էր յԵփրեայ Յովասու հաւր Եսրայ, եւ Գեդեւովն որդի նորա ծեծէր ցորեան ի կալ, փախչել յերեսաց Մադիամու:

12․ Եւ երեւեցաւ նմա հրեշտակն Տեառն` եւ ասէ ցնա. Տէր ընդ քեզ հզաւր զաւրութեամբ.

13․ Եւ ասէ ցնա Գեդէովն. Յիս Տէր իմ. էթէ էր Տէր ընդ մեզ` ընդէ՞ր գտին զմեզ ամենայն չարիքս այսոքիկ. եւ ո՞ւր են ամենայն սքանչելիք նորա զոր պատմեցին մեզ հարքն մեր` եւ ասեն, Ոչ ապաքէն յԵգիպտոսէ էհան զմեզ Տէր. Եւ արդ` ընդէ՞ր մերժեաց զմեզ, եւ մատնեաց զմեզ ի ձեռս Մադիամու:

14․ Եւ հայեցաւ ի նա հրեշտակն Տեառն, եւ ասէ ցնա. Երթ զաւրութեամբ քոով այդուիկ, եւ փրկեսցես զԻսրայէլ ի ձեռաց Մադիամու. ո՞չ աւասիկ ես առաքեցի զքեզ:

15․ Եւ ասէ ցնա Գեդէովն. Յիս Տէր, եւ փրկեցից զԻսրայէլ. ահա հազարաւորն իմ խոնարհագոյն է ի մէջ Մանասէի. եւ ես կրսեր եմ ի տան հաւր իմոյ:

16․ Եւ ասէ ցնա. Տէր ընդ քեզ. եւ հարցես զՄադիամ իբրեւ զայր մի:

17․ Եւ ասէ Գեդէովն. Էթէ գտի շնորհս առաջի աչաց քոց, արասցես ինձ նշանս` էթէ դու խաւսեսցիս ընդ իս:

18․ մի գնայցես աստի` մինչչեւ եկից առ քեզ, եւ բերից զզոհս իմ, եւ եդից առաջի քո: եւ ասէ` Ես եմ, եւ նստայց աստ մինչչեւ դարձցիս առ իս:

19․ Եւ եմուտ Գեդէովն` եւ հասոյց ուլ մի յայծեաց, եւ արդու մի ալեր բաղարջ. Եւ զմիսն եդ ի վերայ խանի, եւ զարգանակն արկ ի պոյտն. եւ էհան առ նա ընդ կաղնեաւն եւ երկիր էպագ:

20․ Եւ ասէ ցնա հրեշտակն Տեառն. Առ դու զմիսդ` եւ զհացդ բաղարջ, եւ դիր ի վերայ վիմին այնորիկ. եւ հեղ զարդանակդ: եւ արար այնպէս:

21․ Եւ ձգեաց հրեշտակն Տեառն զծայր գաւազանին որ ի ձեռին իւրում, եւ հասոյց ի միսն եւ ի բաղարջն. եւ բորբոքեցաւ հուր ի վիմէ անտի, եւ եկեր զմիսն եւ զբաղարջսն. եւ հրեշտակն Տեառն գնաց յաչաց նորա:

22․ Եւ ետես Գեդեւովն էթէ հրեշտակ Տեառն է: եւ ասէ Գեդէովն` Ա. Ա. Տէր Տէր. զի տեսի զհրեշտակ Տեառն դէմ յանդիման:

23․ Եւ ասէ ցնա Տէր` Խաղաղութիւն ընդ քեզ. մի երկնչիր, ոչ մեռանիս:

24․ եւ շինեաց Գեդէովն անդ սեղան Տեառն. եւ կոչեաց զնա Խաղաղութիւն Տեառն մինչչեւ ցայսաւր: Եւ մինչ դեռ ինքն անդէն էր, յԵփրա հաւր իւրոյ Եսրեայ:

25․ եղեւ ի գիշերին յայնմիկ` եւ ասէ ցնա Տէր. առ քեզ զեզն զպարարակ հաւր քոյ, եւ զեզն զեւթնամեան զերկրորդն. եւ քակեսցես զսեղան Բահաղու որ է հաւր քոյ, եւ կոտորեսցես զանդառն որ զնովաւ.

26․ եւ շինեսցես սեղան Տեառն Աստուծոյ քում, որ երեւեցաւ քեզ ի գլուխ լերինն Մանովզայ, ի տեղւոջ պատերազմին. եւ առցես զեզն զերկրորդ, եւ հանցես յողջակէզ փայտիւք անդառին զոր կոտորեսցես:

27․ Եւ առ Գեդէովն երեքտասան այր ի ծառայից իւրոց, եւ արար որպէս խաւսեցաւ ընդ նմա Տէր: եւ եղեւ իբրեւ երկեաւ ի տանէ հաւր իւրոյ` եւ յարանց քաղաքին առնել ի տուէ, արար ի գիշերի:

28․ Եւ կանխեցին արք քաղաքին ընդ առաւաւտն, եւ ահա` կործանեալ էր սեղան Բահաղու. եւ անդառն որ զնովաւ` կոտորեալ, եւ եզն պարարակ հանեալ ողջակէզս ի սեղանն շինեալ:

29․ Եւ ասէ այր ցընկեր իւր. Ո՞ արար զիրս զայս. եւ յուզէին` եւ քննէին, եւ ասէին` էթէ Գեդէովն որդի Յովասու արար զիրդ զայդ:

30․ Եւ ասեն արք քաղաքին ցՅովաս, Հան արտաքս զորդին քո` եւ մեռցի. զի կործանեաց զսեղանն Բահաղու, եւ կոտորեաց զանդառն որ զնովաւ:

31․ Եւ ասէ Յովաս ցարսն յարուցեալսն ի վերայ նորա. Դո՞ւք այժմ դատիցիք վասն Բաաղու, կամ թէ ապրեցուցանիցէք զնա. որ վնասեաց նմա մեռցի մինչչեւ ցառաւաւտ. էթէ Աստուած իցէ` ինքն խնդրեսցէ զվրէժ անձին իւրոյ` զի կործանեցին զսեղան նորա:

32 Եւ կոչեաց զնա յաւուր յայնմիկ Յերոբոաղ, եւ ասէ, դատաստան Բահաղու. զի կործանեաց զսեղան նորա:

33․ Եւ ամենայն Մադիամ եւ Ամաղէկ, եւ որդիքն արեւելեայց ժողովեցան ի միասին, եւ եկին բանակեցան ի հովիտսն յԵզրայելի:

34․ Եւ հոգին Տեառն զաւրացոյց զԳեդէովն: եւ էհար փող եղջերեաւն. եւ խրախոյզ բարձ Աբիեզեր զկնի նորա:

35․ Եւ արձակեաց հրեշտակս ընդ ամենայն Մանասէ եւ գոչեաց եւ նա զկնի նորա: եւ արձակեաց հրեշտակս` յԱսեր, եւ ի Զաբողովն, եւ ի Նեփթաղիմ. եւ ելին ընդ առաջ նորա:

36․ Եւասէ Գեդէովն ցԱստուած. Մի բարկասցի ցասումն քո ինձ, եւ խաւսեցայց դարձեալ միւս անգամ. եւ փորձեցից միւս անգամ եւ գզաթուն. եւ եղիցի միւս անգամ ցամաքութիւն ի վերայ գզաթուն միայնոյ, եւ ի վերայ ամենայն երկրի լիցի ցաւղ:

40 Եւ արար Աստուած այնպէս ի գիշերին յայնմիկ. եւ եղեւ ցամաքութիւն ի վերայ գզաթին միայնւոյ. եւ ի վերայ ամենայն երկրի եղեւ անձրեւ։