1․ Եւ գնաց Աբիմելէք որդի Յորոբոյաղա ի Սիկիմ առ եղբարս մաւր իւրոյ, եւ խաւսեցաւ ընդ նոսա, եւ ընդ ամենայն ազգատոհմս ի տան հաւր մաւր իւրոյ` եւ ասէ:
2․ Խաւսեցարուք յականջս ամենայն արանց Սիկիմացւոց. ո՞ր լաւ իցէ, իշխել ձեզ եւթանասուն արանց ամենեցունց որդւոցն Յերոբոաղայ, էթէ տիրել ձեզ առն միոջ. եւ յիշեցէք, զի ոսկր ձեր եւ մարմին ձեր եմ ես:
3․ Եւ խաւսեցան զնմանէ եղբարք մաւր նորա` յականջս ամենայն արանցն Սիկիմացւոց զամենայն զբանս զայսոսիկ: եւ միտեցաւ սիրտ նոցա զկնի Աբեմելեքա, զի ասացին թէ եղբայր մեր է:
4․ եւ ետուն նմա եւթանասուն արծաթ ի տանէ Բահաղու Բերիթայ ուխտին: Եւ վարձեցաւ նոքաւք Աբեմելէք արս սկայս եւ զարհուրեցուցիչս, եւ գնացին զհետ նորա:
5․ եւ եմուտ ի տուն հաւր իւրոյ յԵփրա, եւ կոտորեաց զեղբայրս իւր, զորդիսն Զերոբոաղա, արս եւթանասուն ի վերայ միոյ վիմի: Եւ մնաց Յովաթամ որդի Յորոբոյաղայ, քանզի թագեաւ որ էր կրսերն:
6․ եւ ժողովեցաւ ամենայն արք Սիկիմացւոց, եւ ամենայն տուն Մաաղովնա, եւ չոգան թագաւորեցուցին զԱբեմելեք ի թագաւոր, առ կաղնով կռուոյն որ ի Սկիմս:
7․ Եւ ազդ եղեւ Յովաթամայ. եւ գնաց ի վերայ գլխոյ լերինն ի Գարիզին. ամբարձ զձայն իւր, եւ ասէ ցնոսա. Լուարուք ինձ արք Սիկիմացւոց, եւ լուիցէ ձեզ Աստուած:
8․ Գնալով գնացին ծառք աւծանել իւրեանց թագաւոր, եւ ասեն ցձիթենին. Թագաւորեա ի վերայ մեր:
9․ Եւ ասէ ցնոսա ձիթենին. Թողեալ զպարարտութիւն իմ զոր փառաւորեաց յիս Աստուած եւ մարդիկ, եւ երթիցեմ իշխել ծառո՞ց:
10․ Եւ ասեն ծառք ցթզենի. Եկ թագաւորեա ի վերայ մեր:
11․ Եւ ասէ ցնոսա թզենի. Թողեալ զքաղցրութիւն իմ, եւ զբերս բարութեան իմոյ, եւ երթիցեմ իշխա՞ն լինել փայտի՞ց:
12․ Եւ ասեն ծառք ցորթ. Եկ թագաւորեա ի վերայ մեր:
13․ Եւ ասէ ցնոսա որթ. Թողեալ զգինի իմ եւ զուրախութիւն Աստուծոյ եւ մարդկան, եւ երթիցեմ իշխա՞ն լինել փայտի՞ց:
14․ Եւ ասեն ծառք ցդժնիկ. Եկ թագաւորեա ի վերայ մեր:
15․ եւ ասէ դժնիկ ցծառս, Էթէ արդարեւ աւծանէք զիս դուք թագաւորել ի վերայ ձեր. եկեայք ծածկեցարուք ընդ հովանեաւ իմով. էթէ ո՞չ ելանիցէ հուր ի դժնկէ աստի, եւ կերիցէ զեղեւնափայտ Լիբանանու:
16․ Եւ արդ` էթէ ճշմարտութեամբ եւ բովանդակութեամբ արարէք, եւ թագաւորեցուցէք զԱբեմելէք. եւ էթէ ո՞րպէս արարէք Յերովբոաղ եւ ընդ տուն նորա. եւ էթէ ըստ հատուցման ձեռին նորա հատուցէք նմա.
17․ որպէս ետ պատերազմ հայր իմ փոխանակ ձեր, եւ ընգեց զանձն իւր յառաջ, եւ ապրեցոյց զձեզ ի ձեռաց Մադիամու:
18․ եւ դուք յարեայք ի վերայ տան հաւր իմոյ այսաւր, եւ կոտորեցէք զորդիս նորա` արս եւթանասուն ի վերայ միոյ վիմի. եւ թագաւորեցուցէք զԱբեմելէք զորդի աղախնոյ նորա ի վերայ արանց Սիկիմացւոց, զի եղբայր ձեր է:
19․ էթէ ճշմարտութեամբ եւ բովանդակութեամբ արարէք ընդ յերոբոաղայ եւ ընդ տան նորա յաւուրս յայսմիկ` աւրհնեսջիք դուք, եւ ուրախ լիջիք յԱբեմելեք. եւ ուրախ լեցի եւ նա ի ձեզ:
20․ Ապա թէ ոչ` ելցի հուր յԱբեմելեքա` եւ կերիցէ զարս Սիկիմացւոց, եւ զտուն Մաաղովնայ ¡: ապա թէ ոչ` ելցէ հուր յարանց Սիկիմացւոց եւ ի տանէ Մաաղովնի` եւ կերիցէ զԱբիմելէք:
21․ Եւ փախեաւ Յովաթամ եւ զերծաւ, եւ գնաց ընդ ճանապարհն ի Բերայ. Եւ բնակեց անդ յերեսաց Աբեմելեքա եղբաւր իւրոյ:
22․ եւ իշխեաց Աբիմելէք ի վերայ Իսրայէղի ամս չորս:
23․ Եւ առաքեաց Տէր Աստուած ոգի չար ի մէջ Աբիմելէքա, եւ ի մէջ արանց Սիկիմացւոց: զտունն Աբիմելէքա
24․ ածել ի վերայ զանիրաւութիւն իւթանասնից որդւոցն Յորոբոյաղա. եւ հատուցանել զարիւն նոցա ի վերայ Աբեմելեքա եղբաւրն իւրեանց` որ կոտորեաց զնոսա. եւ ի վերայ արանց Սիկիմացւոց` զի զաւրացուցին զձեռս նորա կոտորել զեղբայրս իւր:
25․ Եւ գործեցին նմա դարան արք Սիկիմացւոց ի վերայ գլխոյ լերանց, եւ յափշտակէին զամենեսին որ անցանէին առ նոքաւք ընդ ճանապարհն: եւ եղեւ ազդ Աբիմելէքա:
26․ Եւ եկն Գաաղ որդի Աբեդայ եւ եղբարք նորա. եւ անցին ի Սիկիմ, եւ վստահ եղեն ի նա արք Սիկիմացւոց.
27․ եւ ելին յանդաստանսն եւ կթեցին զայգիս իւրեանց, եւ հարին հնձանս եւ արարին պարանցիկս, եւ մտին ի տուն աստուածոյն իւրեանց. եւ կերան եւ արբին` եւ անիծին զԱբեմելէք:
28․ Եւ ասէ Գաաղ որդի Աբեդա` զի ծառայեմք նմա. ո՞չ նա է որդի Յորոբոաղայ, եւ զեբուղ ծառայ իւր ուստիկան նորա, հանդերձ արամբք Եմովրայ հաւր Սիքեմայ. եւ զի՞ է` զի ծառայիցեմք նմա:
29․ եւ ո՞ տայր զժողովուրդս զայս ի ձեռս իմ, եւ փոխէի զԱբեմելէք. եւ ասէ ցԱբիմելէք, Բազմացո զզաւրս քո` եւ ել ինձ:
30․ Եւ լուաւ Զեբուղ իշխան քաղաքին` զբանս Գաաղայ որդւոյ յԱբեդայ, եւ սրտմտեցաւ բարկութեամբ:
31 եւ առաքեաց առ Աբեմելէք հրեշտակս պատարագաւք` եւ ասէ. Ահաւասիկ Գաաղ որդի Աբեդայ եւ եղբարք նորա եկին ի Սիկիմ, եւ պաշարեն զքաղաքս ի վերայ քո:
32․ եւ արդ` արի զցայգ դու եւ զաւրդ քո որ ընդ քեզ է, եւ դարանամուտ լեր յանդաստանին.
33․ եւ եղիցի ընդ առաւաւտն ի ծագել արեգական, կանխեսցես եւ հասցես զքաղաքաւս. եւ ահա սա` եւ զաւրս որ է ընդ սմա ելանէ առ քեզ. եւ արասցես ընդ սա որպէս ինչ գտցէ ձեռն քո:
34․ Եւ յարեաւ Աբիմելէք եւ ամենայն զաւրն որ ընդ նմա զցայգ. եւ մտին ի դարան զՍիկիմաւ չորք առաջք:
35․ Եւ եղեւ ընդ առաւաւտն, ել Գաաղ որդի Աբեդայ` եւ եկաց ի մուտս դրան քաղաքին: Եւ յարեաւ Աբիմելէք եւ ամենայն զզաւրն որ ընդ նմա ի դարանացն:
36․ եւ ետես Գաաղ որդի Աբեդայ զզաւրն, եւ ասէ ցԶեբուղ. Ահաւանիկ զաւր իջանէ ի գլխոյ լերանցն. եւ ասէ ցնա Զեբուղ. զստուեր լերանցն տեսանես դու իբրեւ զմարդիկ:
37․ Եւ յաւել եւս Գաաղ եւ ասէ. Ահաւանիկ զաւր իջանէ ընդ ծովակողմն առ պորտով երկրին. եւ առաջ գա ընդ ճանապարհ կաղնոյն դիտանոցաց:
38․ Եւ ասէ ցնա Զեբուղ. Արդ` ո՞ւր է բերան քո որ ասէիր, թէ Ո՞վ է Աբեմելէք, զի ծառայեսցուք նմա. ո՞չ աւանիկ այն է զաւրն` զոր դուն աղարտէիրն. արդ` ել տուր ընդ նմա պատերազմ:
39․ Եւ ել Գաաղ առաջի ամենայն Սիկիմացւոց, եւ մարտեաւ ընդ Աբեմելեքա:
40․ եւ հալածեաց զնա Աբիմելէք. եւ փախեաւ յերեսաց նորա, եւ անգան վիրաւորք բազում մինչ ցդրունս քաղաքին:
41․ Եւ նստաւ Աբիմելէք յարիմ, եւ էհան Զեբուղ զԳաաղ եւ զեղբարս նորա` զի մի բնակեսցեն ի Սիկիմ:
42․ Եւ եղեւ ի վաղիւ անդր` եւ ել ժողովուրդն ի դաշտն, եւ եղեւ ազդ Աբիմելեքա.
43․ եւ առ զզաւրն` եւ բաժանեաց յերիս առաջս, եւ եմուտ նոքաւք ի դարան: եւ ետես` եւ ահա զաւր ելանէր ի քաղաքէ անտի. եւ յարեաւ ի վերայ նոցա` եւ էհան զնոսա:
44․ Եւ Աբեմելէք եւ գունդքն որ ընդ նմա` ճակատեցան եւ կացին առ դրան քաղաքին. եւ երկու գունդքն սփռեցան ի վերայ ամենայնի որ յանդաստանսն էին, եւ հարին զնոսա:
45․ Եւ Աբիմելէք պատերազմէր ընդ քաղաքին զաւրն զայն ողջոյն, եւ առին զքաղաքն, եւ զժողովուրդն որ ի նմա կոտորեցին, եւ զքաղաքն կործանեցին` եւ աղարտ վարեցին:
46․ Եւ լուան ամենայն արք աշտարակին Սիկիմացւոց, եւ եկին յամրոց տանն Բեթէղ Բարիթեայ:
47․ Եւ ազդ եղեւ Աբիմելեքա` էթէ ժողովեցան ամենայն արք աշտարակին Սիկիմացւոց:
48․ Եւ ել Աբիմելէք ի լեռն Սեղմովն, ինքն եւ ամենայն զաւրն որ ընդ նմա. եւ առ Աբիմելէք տապար ի ձեռն իւր, եւ կոտորեաց բեռն մի փայտ` եւ առ զայն եւ եդ զայն ի վերայ ուսոց իւրոց: եւ ասէ ցզաւրն իւր որ ընդ նմա, Զինչ տեսանէք զիս զոր առնիցեմ, արասջիք եւ վաղվաղակի եւ դուք իբրեւ զիս:
49․ Կոտորեցին եւ նոքա ամենեքին իւրաքանչիւր ոք բեռն մի փայտ, եւ բարձին եւ գնացին զհետ Աբեմելեքա. եւ եդին ի վերայ ամրոցին, եւ այրեցին ի վերայ նոցա զամրոցն հրով: եւ մեռան ամենայն արք աշտարակին Սիկիմացւոց` իբրեւ հազար մի ընդ այր եւ ընդ կին:
50․ Եւ չոգաւ Աբիմելէք ի Թեբէս, եւ նստաւ շուրջ զնովաւ. եւ առ զնա:
51․ եւ աշտարակ մի էր հզաւր ի մէջ քաղաքին եւ բարձր. եւ փախեան անդր ամենայն արք եւ կանայք, եւ ամենայն գլխաւորք քաղաքին, եւ փակեցին ընդ դէմ իւրեանց, եւ ելին ի տանիս աշտարակին:
52 Եւ եկն Աբիմելէք մինչչեւ ցաշտարակն, եւ մարտեան ընդ նմա, եւ մերձեցաւ Աբիմելէք ի դրունս աշտարակին:
53 Եւ ընկէց կին մի բեկոր երկան մի ի վերայ գլխոյն Աբեմելեքա, եւ մանրեաց զգագաթն նորա:
54․ Եւ աղաղակեաց վաղվաղակի առ պատանին կապարճակիր իւր` եւ ասէ ցնա. Մերկեա զսուր քո եւ սպան զիս. գուցէ ասիցեն թէ կին սպան զնա: եւ խոցեաց զնա պատանին իւր, եւ մեռաւ Աբիմելէք:
55․ Եւ ետես այր Իսրայէլացի` էթէ մեռաւ Աբիմելէք, գնացին այր իւրաքանչիւր տեղի իւր:
56․ Եւ դարձոյց Աստուած զչարիս Աբիմելէքա զաւր արար հաւր իւրում կոտորելով զեւթանասուն եղբայրս իւր:
57․ եւ զամենայն չարիսն արանցն Սիւքեմա դարձոյց Աստուած ի գլուխս նոցա: եւ եկին ի վերայ նոցա անէծքն Յովաթամայ որդւոյն Յերոբոաղայ:
Հաղորդում կայքում սխալի վերաբերյալ
Տվյալ հատվածում առկա է սխալ: