Գլուխ 2

1․ Զ Եւ ել հրեշտակ Տեառն ի Գաղգաղա ի Լալետղն, եւ ի Բեթէլ, եւ ի տունն Իսրայէղի, եւ ասէ ցնոսա. Այսպէս ասէ Տէր: Տէր էհան զձեզ յԵգիպտոսէ, եւ ած զձեզ յերկիրդ` զոր երդուաւ հարցն ձերոց տալ ձեզ, եւ ասէ ցձեզ. Ոչ ցրուեցից զուխտն իմ որ ընդ ձեզ յաւիտեան:

2․ Եւ մի դնիցէք ուխտ ընդ բնակիչսդ երկրիդ այդորիկ, եւ մի ընդ դիս նոցա, եւ մի երկիր պագանիցէք նոցա. այլ զդրաւշեալս նոցա խորտակեսջիք, եւ զսեղանս նոցա կործանեսջիք. եւ ոչ լուարուք ձայնի իմում. քանզի արարէք զայն:

3․ Եւ ասացի էթէ ոչ յաւելից փոխեալ զժողովուրդն զոր ասացի սատակել, եւ ոչ բարձից զնոսա յերեսաց ձերոց. եւ եղիցին ձեզ ի վտանգս. եւ դիք նոցա եղիցին ձեզ ի գայթագղութիւն:

4․ Եւ եղեւ իբրեւ խաւսեցաւ հրեշտակն Տեառն զբանս զայսոսիկ առ ամենայն որդիսն Իսրայէղի. ամբարձին ժողովուրդն զձայնս իւրեանց` եւ լացին:

5․ եւ վասն այնորիկ կոչեցաւ տեղւոյն այնորիկ անուն Լալաւնք. եւ զոհեցին անդ Տեառն:

6․ Եւ արձակեաց Յեսու զժողովուրդն. եւ գնացին որդիքն Իսրայէլի յիւրաքանչիւր տունս իւր, եւ յիւրաքանչիւր ժառանգութիւն իւր` ժառանգել զերկիրն:

7․ Եւ ծառայեաց ժողովուրդն Տեառն զամենայն աւուրս Յեսովեա, եւ զամենայն աւուրս ծերոցն, որ միանգամ երկայնակեցք եղեն ընդ Յեսուայ. որ գիտակ լեալ էին ամենայն մեծամեծ գործոց Տեառն` զոր արար յԻսրայէլ:

8․ Եւ վախճանեցաւ Յեսու որդի Նաւեայ ծառայ Տեառն. որդի հարիւր եւ տասն ամաց:

9․ եւ թաղեցին զնա ի լերինն ժառանգութեան նորա, ի Թամնաթարէս ի լերինս Եփրեմայ ի հիւսւսոյ ի լերինն Գայասու:

10․ եւ ամենայն ազգն այն յաւելան առ հարս իւրեանց: Եւ յարեաւ այլ ազգ յետ նոցա որք ոչ ճանաչէին զՏէր, եւ ոչ զգործս Տեառն զոր արար ի մէջ Իսրայէղի:

11․ Եւ արարին որդիքն Իսրայէղի չար առաջի Տեառն. եւ պաշտեցին զԲաաղիմ.

12․ եւ թողին զՏէր Աստուած հարց իւրեանց, որ էհան զնոսա յերկրէն Եգիպտացւոց եւ գնացին զհետ աստուածոց աւտարաց, աստուածոց ազգացն որ շուրջ զնոքաւք, երկիր պագին նոցա. եւ բարկացուցին զՏէր:

13․ Եւ թողին զնա եւ պաշտեցին զԲահաղ, եւ զԱստարատսն:

14․ Եւ բարկացաւ սրտմտութեամբ Տէր Իսրայէղի, եւ մատնեաց զնոսա ի ձեռս աւարառուացն, եւ աւարեցին զնոսա, եւ ետ զնոսա ի ձեռս թշնամեաց իւրեանց շուրջանակի. եւ ոչ կարացին կալ ընդդէմ թշնամեաց իւրեանց ամենեցունց` ընդ որս պոռնկեցան:

15․ Եւ ձեռն Տեառն էր նոցա ի չարութիւն` որպէս խաւսեցաւ Տէր, եւ որպէս երդուաւ Տէր, եւ նեղեաց զնոսա յոյժ:

16․ Եւ յարոյց նոցա դատաւորս, եւ փրկեաց զնոսա Տէր ի ձեռաց աւարառուաց նոցա. սակայն եւ նոցա ոչ լուան:

17․ զի պոռնկեցան զհետ աստուածոց աւտարաց, եւ երկիր պագին նոցա. եւ բարկացուցին զՏէր. եւ խոտորեցան վաղվաղակի ի ճանապարհէն ընդ որ գնացին հարք նոցա լսել պատուիրանաց Տեառն. եւ ոչ արարին այնպէս:

18․ Եւ յորժամ յարոյց նոցա դատաւորս Տէր. եւ էր Տէր ընդ դատաւորին. եւ փրկեաց զնոսա ի ձեռաց թշնամեաց նոցա զամենայն աւուրս դատաւորին. զի մխիթարեցաւ Տէր ի հեծութենէ նոցա յերեսաց պաշարողացն նոցա ոչ չարչարէին զնոսա:

19․ Եւ լինէր իբրեւ մեռանէր դատաւորն, դառնային միւսանգամ եղծանել առաւել քան զհարսն իւրեանց, երթալ զհետ աստուածոց աւտարաց, պաշտել զնոսա եւ երկիր պագանել նոցա. եւ ոչ ընգեցին  ի բաց զարուեստսն իւրեանց, եւ ոչ հատան ի խիստ ճանապարհէն իւրեանց:

20․ Եւ բարկացաւ սրտմտութեամբ Տէր Իսրայէղի եւ ասէ. Փոխանակ զի եթող ազգդ այդ զուխտ իմ զոր պատուիրեցի հարց դոցա, եւ ոչ լուան ձայնի իմում:

21․ եւ ես ոչ յաւելից բառնալ զայր յերեսաց նոցա, յազգացն զոր եթող Յեսու որդի Նաւեայ:

22․ Եւ եթող փորձել նովաւ զԻսրայէլ, եթէ զգուշանայցեն ճանապարհին Տեառն գնալ ընդ նա, զոր աւրինակ զգուշացան հարք նոցա, էթէ ոչ:

23․ Եւ եթող Տէր զազգսն զայնոսիկ, չբառնալ զնոսա վաղվաղակի. եւ ոչ մատնեաց զնոսա ի ձեռս յԵսովայ: