1․ Եւ Յեփթայեա Գաղատացի, էր հզաւր զաւրութեամբ, եւ նա որդի կնոջ պոռնկի. եւ ծնաւ Գաղաադու զՅեփթայէ:
2․ Եւ ծնաւ կինն Գաղաադու նմա որդիս. եւ հաստատեցան որդիք կնոջն, եւ մերժեցին զՅեփթայէ, եւ ասեն ցնա. Ոչ ժառանգեսցես ի տան հաւր մերոյ, զի որդի կնոջ պոռնկի ես դու:
3․ Եւ փախեաւ Յեփթաեա յերեսաց եղբարց իւրոց, եւ բնակեցաւ յերկրին ի Տովբ: եւ ժողովէին առ Յեփթայեա արք սրիկայք. ելանէին ընդ նմա:
4․ Եւ եղեւ յետ աւուրց, եւ պատերազմեցան որդիքն Ամմովնա ընդ Իսրայէղի` չոգան ծերքն Գաղաադու առնուլ զՅեփթայէ յերկրէն Տուբայ:
6․ եւ ասեն զցՅեփթայէ. Եկ եւ եղիցիս մեզ ի զաւրավարս. եւ տացուք պատերազմ ընդ որդիսն Ամմովնա:
7․ Եւ ասէ Յեփթայէ ցծերս Գաղաադու. Ո՞չ ապաքէն դուք ատեցէք, եւ հանէք զիս ի տանէ հաւր իմոյ, եւ արձակեցէք զիս ի ձէնջ. եւ արդ` զի՞ եկէք առ իս յորժամ նեղեցայքդ:
8․ Եւ ասեն ծերքն Գաղաադու ցՅեփթայէ. Ոչ այդպէս է. այլ եկաք առ քեզ, եւ երթիցես ընդ մեզ, եւ տացուք պատերազմ ընդ որդիսն Ամմովնայ: եւ եղիցիս մեզ ի գլուխ ամենայն բնակչաց Գաղաադու:
9․ Եւ ասէ Յեփթայէ ցծերսն Գաղաադու. էթէ դարձուցանիցէք զիս պատերազմել առ որդիսն Ամմովնայ, եւ մատնեսցէ զնոսա Տէր առաջի իմ, ես եղէ՞ց քեզ իշխան:
10․ Եւ ասեն ծերքն Գաղաադու ցՅեփթայեայ. Տէր կացցէ լսաւղ ի միջի մերում, էթէ ոչ ըստ բանի քում արասցուք:
11․ Եւ գնաց Յեփթայէ ընդ ծերսն Գաղաադու. եւ կացուցին զնա ժողովուրդն իւրեանց գլուխ եւ առաջնորդ: եւ խաւսեցաւ Յեփթայէ զամենայն զբանս իւր առաջի Տեառն եւ Մասեփա:
12․ Եւ առաքեաց Յեփթայէ հրեշտակս առ թագաւոր որդւոցն Ամմովնա` եւ ասէ. Զի՞ կայ իմ եւ քո, զի եկեալ ես պատերազմել յերկրի իմում:
13․ Եւ ասէ արքայ որդւոցն Ամմովնա ցհրեշտակսն Յեփթայեայ. Ընդէ՞ր առ Իսրայէլ զերկիր իմ յելանելն իւրում յԵգիպտոսէ` յԱռնովնայ մինչ ցԱրբոկ, եւ մինչչեւ ցՅորդանան. եւ արդ` դարձո զնա առ իս խաղաղութեամբ` եւ գնացից: եւ դարձան հրեշտակքն առ Յեփթայէ:
14․ Եւ յաւել եւս Յեփթայէ առաքել հրեշտակս առ արքայ որդւոցն Ամմովնա,
15․ եւ ասէ ցնա. Այսպէս ասէ Յեփթայէ. Ոչ առ Իսրայէլ զերկիրն Մովաբայ եւ զերկիր որդւոցն Ամմովնայ
16․ յելանելն իւրեանց յԵգիպտոսէ. այլ գնաց Իսրայէլ ընդ անապատն մինչչեւ ցծովն Կարմիր, եւ եկն մինչչեւ ցԿադէս.
17․ եւ առաքեաց Իսրայէլ հրեշտակս առ արքայ Եդովմա` եւ ասէ. Թող` անցից ընդ երկիր քո: եւ ոչ անսաց արքայն Եդովմայ: եւ առաքեաց առ արքայն Մովաբու, եւ ոչ կամեցաւ: Եւ նստաւ Իսրայէլ ի Կադէս.
18․ եւ շրջեցաւ ընդ անապատն, եւ պատեցաւ զերկրաւն Եդոմայ, եւ զերկրաւն Մովաբու: եւ եկն առ երեւելիւք յերկիրն Մովաբու. եւ բանակեցան յայնկոյս Առնովնայ, եւ ոչ մտին ի սահմանս Մովաբու. Քանզի Առնովն էր սահման Մովաբու:
19․ Եւ առաքեաց Իսրայէլ հրեշտակս առ Սեհովն արքայ Ամուրհացւոցն` թագաւոր Եսեբոնեա եւ Ամուրհացւոց, եւ ասէ ցնա Իսրայէլ. Թող` անցից ընդ երկիր քո մինչչեւ ցտեղ իմ:
20․ Եւ ոչ կամեցաւ Սեհովն զԻսրայէլ անցանել ընդ սահմանս իւր: եւ ժողովեաց Սեհովն զամենայն ժողովուրդ իւր, եւ բնակեցաւ Յասսա. եւ ետ պատերազմ ընդ Իսրայէղի:
21․ Եւ մատնեաց Տէր Աստուած Իսրայէղի զՍեհովն` եւ զամենայն ազգ նորա ի ձեռսն Իսրայէղի. եւ եհար զնոսա, եւ ժառանգեաց Իսրայէլ զերկիրն Ամուրհացւոց բնակելոյ յերկրին յայնմիկ:
22․ եւ ժառանգեաց Իսրայէլ զամենայն սահմանս Ամուրհացւոցն յԱռնովնա մինչչեւ ցՅաբոկ, եւ յանապատէն մինչչեւ ցՅորդանան:
23․ Եւ արդ` Տէր Աստուած Իսրայէղի եբարձ զԱմուրհացին յերեսաց ժողովրդեան իւրոյ Իսրայէղի. եւ դո՞ւ ժառանգիցես զնա:
24․ Ոչ ապաքէն զոր ժառանգեցոյց քեզ Քամովն աստուածն քո` զայն ժառանգեսցես. եւ զամենայն զոր ժառանգեցոյց Տէր Աստուած մեր յերեսաց ձերոց` զայն ժառանգեսցուք:
25․ Իսկ արդ` միթէ լա՞ւ ինչ ես դու քան զԲաղակ որդի Սեպփովրեայ զարքա Մովաբայ. միթէ մարտի՞ւ մարտեաւ ընդ Իսրայէլի, կամ պատերազմաւ պատերազմեցաւ՞ ընդ նոսա:
26․ ի բնակելն Իսրայէղի Յեսեբովն եւ ի դստերս նորա, եւ յամենայն քաղաքս որ առ եզերբ Յորդանանու ամս երեք հարիւր. զի՞ է զի ոչ թափեցին զնոսա ի ժամանակին յայնմիկ:
27․ եւ ես ոչ ինչ մեղայ քեզ` եւ դու առնես ընդ իս չարութիւն, տալ ընդ իս պատերազմ: Դատեսցէ Տէր որ դատելոցն է այսաւր` ի մէջ որդւոցն Իսրայէղի եւ ի մէջ որդւոցն Ամմովնայ:
28․ Եւ ոչ անսաց արքայ որդւոցն Ամմովնա բանիցն Յեփթայեայ` զորս առաքեացն առ նա:
29․ Եւ եղեւ ի վերայ Յեփթայեայ հոգի Տեառն, եւ անց ընդ Գաղաադ եւ ընդ Մանասէ, եւ անց ընդ դիտանոցսն Գաղաադու, եւ ի դիտանոցէն Գաղաադու յայնկոյս որդւոցն Ամմովնա:
30․ Եւ ուխտեաց Յեփթայէ ուխտ Տեառն` եւ ասէ. Էթէ մատնելով մատնեսցես զորդիսն Ամմովնայ ի ձեռս իմ.
31․ եւ եղիցի որ ելանելով ելանիցէ ի դրանց տան իմոյ ընդ առաջ իմ, ի դառնալն իմում խաղաղութեամբ յորդւոցն Ամմովնա, եղիցի` զի մատուցից զնա Տեառն յողջակէզ:
32․ Եւ անց Յեփթայեա առ որդիսն Ամմովնայ պատերազմել ընդ նոսա. եւ մատնեաց զնոսա Տէր ի ձեռս նորա.
33․ եւ եհար զնոսա Յարուերայ մինչչեւ ի մուտս Սեմէննիթայ, ի քաղաք, եւ մինչչեւ ցյԱբէղ այգեստանեացն` հարուածս մեծամեծս յոյժ: եւ վանեցան որդիքն Ամմովնա յերեսաց որդւոցն Իսրայէղի:
34․ Եւ եկն Յեփթայէ ի Մասեփա ի տուն իւր: եւ ահա դուսր իւր ելանէր ընդ առաջ նորա թմբկաւք եւ պարուք. եւ նա էր միամաւր սիրելի նորա, եւ ոչ գոյր բաց ի նմանէ նմա ուստր կամ դուստր:
35․ Եւ եղեւ իբրեւ ետես զնա` պատառեաց զհանդերձս իւր եւ ասէ. Վայ է ինձ դուստր իմ, ընգճեցեր զիս, խոչիյակն ելեր ինձ. զի ես բացի զբերան իմ վասն քո առ Տէր, եւ ոչ կարացից դարձուցանել:
36․ Եւ ասէ ցնա. Էթէ վասն իմ բացեր զբերան քո առ Տէր, արա զիս որպէս ել ի բերանւոյ քումմէ. փոխանակ զի արար քեզ Տէր վրէժխնդրութիւն ի թշնամեաց քոց յորդւոցն Ամմովնա:
37․ Եւ ասէ ցհայր իւր. Արա ինձ զբանս զայս, թողացո ինձ երկու ամիսս, եւ երթայց շրջեցայց ի լերինս, եւ լացից զկուսութիւնս իմ. ես եւ ընկերք իմ:
38․ Եւ ասէ` Երթ, եւ արձակեաց զնա զերկուս ամիսս: եւ չոգաւ ինքն եւ ընկերք իւր, եւ ելաց զկուսութիւն իւր ի վերայ լերանց:
39․ Եւ եղեւ յետ կատարելոյ երկուց ամսոցն, դարձաւ առ հայր իւր: եւ արար նովաւ զուխտն զոր ուխտեաց: եւ նա ոչ գիտէր զայր: Եւ եղեւ ի կրաւնս ի մէջ Իսրայէղի
40․ աւուրց յաւուրս: ժողովէին դստերք Իսրայէղի` ողբալ զդուստրն Յեփթայեայ Գաղաադացւոյ չորս աւուրս ի տարւոջն:
Հաղորդում կայքում սխալի վերաբերյալ
Տվյալ հատվածում առկա է սխալ: