Գլուխ 18

   
1. Եւ յաւուրս յայնոսիկ ցեղն Դանայ խնդրէր իւր ժառանգութիւն բնակելոյ. զի ոչ էհաս նմա մինչչեւ յաւուրսն յայնոսիկ ի մէջ ցեղիցն Իսրայէղի ժառանգութիւն:

2. Եւ առաքեցին որդիքն Դանայ ի տոհմից իւրեանց արս հինգ, այր ըստ ցեղից իւրեանց որդիս զաւրութեան ի Սարա եւ յԵսթաողայ, լրտես զերկիրն, եւ հետազաւտել զնա: եւ ասեն ցնոսա. Երթայք եւ որոնեցէք զերկիրն: եւ չոգան ի լեառնն Եփրեմայ մինչչեւ ցտունն Միքայ, եւ հանգեան անդ:

3. Եւ մինչ դեռ էին նոքա ի տանն Միքայ, ծանեան զձայն պատանեկին Ղեւտացւոյ, եւ խոտորեցան անդր. Եւ ասեն ցնա. ո՞վ զքեզ այսր, եւ զի՞նչ գործես դու աստր, եւ կամ զի՞նչ կայ քո աստ:

4. Եւ ասէ ցնոսա. Այսպէս եւ այսպէս արար ինձ Միքա, եւ կալաւ զիս ի վարձու, եւ եղէ նմա ի քահանայ:

5. Եւ ասեն ցնա. Աղէ` հարց զԱստուած` եւ գիտասցուք էթէ աջողեսցի մեզ ճանապարհք մեր զոր երթիցուք:

6. Եւ ասէ ցնոսա քահանայն. Երթայք ի խաղաղութիւն. առաջի Տեառն է ճանապարհդ ձեր զոր երթայք:

7. Եւ գնացին հնգեքին արքն, եւ չոգան ի Ղաիսա. եւ տեսին զժողովուրդն, որ բնակեալ ի նմա նստէր յուսով, ըստ նմանութեան Սիդովնացւոց հանդարտելոցն յուսով. եւ ոչ բաւական է լինելոյ խաւսելոյ ումեք բան մի յերկրի գանձուցն ժառանգաւորի. քանզի հեռի էին ի Սիդովնէ. եւ բանք ինչ ոչ գոյի նոցա ընդ Ասորիս:

8. Եւ եկին հնգեքին արքն առ եղբարս իւրեանց ի Սարաա եւ յԵսթաող. եւ ասեն ցնոսա եղբարք իւրեանց. Զի՞ նստիք դուք:

9. Եւ ասեն. Արիք եւ ելցուք ի վերայ նոցա, զի մտաք եւ շրջեցաք ընդ երկիրն մինչչեւ ցՂաիսա, եւ տեսաք ժողովուրդ բնակել ի նմա յուսովն, հանգւոյն Սիդովնացւոց, եւ հեռի են ի Սիդովնէ, եւ բանք ինչ ոչ գոն նոցա ընդ Ասորիս: արիք եւ ելցուք ի վերայ նոցա. Զի ահա տեսաք զերկիրն, եւ բարի է յոյժ. եւ դուք դադարեա՞լ կայք: արդ` մի վատանայք երթալ մտանել ժառանգել զերկիրն:

10. եւ եղիցի յորժամ երթիցէք ունիք զազգն յուլացեալ, եւ զերկիրն ընդարձակ. զի մատնեաց զնոսա Աստուած ի ձեռս ձեր: տեղի յորում ոչ գոյ պակասութիւն ամենայն բանի որ ինչ իցէ յերկրի:

11. Եւ խաղացին անտի յազգականութենէ տոհմիցն Դանայ` ի Սարայա եւ յԵսթայողա, արք վեց հարիւրք վառեալք զինու պատերազմ.

12. եւ ելին եւ բանակեցան ի Կարիաթարիմ Յուդայ. վասն այսորիկ կոչեցաւ տեղին Բանակետղ Դանայ` մինչչեւ ցայսաւր. որ է ի թիկանց Կարիաթարիմայ:

13. Եւ անցին անդի, եւ եկին մինչչեւ ցլեառն Եփրեմայ. եւ հասին մինչչեւ ի տունն Միքայի:

14. Պատասխանի ետուն արքն հինգեքին որ երթեալ էին լրտեսել զերկիրն Գաիսայ, եւ ասեն ցեղբարս իւրեանց. Էթէ գիտիցէ՞ք` զի է զի է ի տունս յայսոսիկ Եփուդ, եւ Թերափ, եւ դրաւշեալ, եւ ձուլածու. արդ` գիտասջիք զինչ առնիցէք:

15. Եւ խոտորեցան անդ, եւ մտին ի տուն պատանեկին Ղեւտացւոյ, որ էր ի տան Միքայի, եւ հարցին զողջունէ նորա:

16. եւ վեց հարիւր արք վառեալք պատերազմական զինու իւրեանց արձանացեալք կային առ մուտս դրանն, որ էին յորդւոցն Դանայ:

17. Եւ ելին հինգեքին արքն որ երթեալ էին լրտեսել զերկիրն. յարձակեցան եւ առին զդրաւշեալն, եւ զԵփուդն, եւ զձուլածոյ. եւ քահանայն արձակեալ կայր ի մուտս դրացն. եւ վեց հարիւր այրք վառեալք պատերազմական զինու,

18. եւ նոքա մտին ի տունն Միքայ. եւ առին զդրաւշեալն, եւ զԵփուդ, եւ զԹերափ, եւ զձուլածոյ: Եւ ասէ ցնոսա քահանայն. Զի՞նչ գործիցէք դուք:

19. եւ ասեն ցնա. Կարկեաց, ափիբերան լեր, եւ եկ ընդ մեզ, եւ լեր մեր ի հայր եւ ի քահանայ, միթէ լա՞ւ իցէ քեզ լինել քահանայ տան միոյ առն, քան լինել քահանայ ցեղի միոյ` եւ ազգի յԻսրայէլ:

20. Եւ զուարթացաւ սիրտ քահանային. եւ առ զԵփուդն, եւ զԹերափն, եւ զդրաւշեալն, եւ զձուլածոյ, եւ եմուտ ի մէջ զաւրուն:

21. եւ դարձան եւ գնացին. եւ հարին համաւրէն զտունն, եւ զստացուածս վայելչութեան նորա առաջի նոցա:

22. Եւ ի հեռանալ նոցա ի տանէն Միքայ. եւ ահա Միքա եւ արքն որ ի տանէ նորա էին ընդ Միքայ, բողոք բարձին եւ հասին որդւոցն Դանայ:

23. Եւ դարձուցին զերեսս իւրեանց որդիքն Դանայ, եւ ասեն ցՄիքա. Զի՞ է քեզ, զի՞ աղաղակես:

24. Եւ ասէ Միքա. Զի զԱստուածսն իմ զոր արարի ինձ` առէք եւ զքահանայն` եւ գնացէք. եւ զի՞նչ կայ այսուհետեւ ինձ. եւ զի՞նչ է այդ զոր ասացէք ցիս` թէ զի՞ աղաղակես:

25. Եւ ասեն ցնա որդիքն Դանայ. Մի լուիցի ձայն քո զկնի մեր, գուցէ պատահեսցեն քեզ արք դառնացեալք հոգւովք, եւ դնիցեն զանձն քո եւ զանձն տան քոյ:

26. եւ գնացին որդիքն Դանայ զճանապարհ իւրեանց: Եւ իբրեւ ետես Միքա, էթէ բռնագոյն քան զնա են, դարձաւ ի տուն իւր:

27. Եւ նոքա առին զոր ինչ արար Միքա, եւ քահանայն նորա, եւ չոգան ի Լաիսայ, ի ժողովուրդն հանդարտացեալ եւ վստահացեալ յուսով: եւ հարին զնոսա սրով սուսերի, եւ զքաղաքն այրեցին:

28. եւ ոչ ոք էր որ փրկէր. զի հեռի էին ի Սիդովնէ, եւ բանք ինչ ոչ էին նոցա ընդ ումեք ի մարդկանէ: եւ նա կայ ի հովտի տանն Ռոովբայ: Եւ շինեցին զքաղաքն` եւ բնակեցին ի նմա.

29. եւ կոչեցին զանուն նորա Դան, ըստ անուան հաւրն իւրեանց` որ եղեւ Իսրայէլ. եւ էր անուն քաղաքին Լայիսա յառաջագոյն:

30. Եւ կանկնեցին որդիքն Դանայ իւրեանց զդրաւշեալն Միքայ: Եւ Յովնաթան որդի Գերսովնի որդւոյ Մանասէի, ինքն եւ որդիք իւր էին քուրմք ցեղին Դանայ, մինչչեւ ցաւր ցերութեան երկրին:

31. Եւ կանկնեցին իւրեանց զդրաւշեալն զոր արար Միքայ, զամենայն աւուրս զորս էր տուն Աստուծոյ ի սելով: