Գլուխ 20

   
1. Եւ ելին ամենայն որդիքն Իսրայէղի, եւ եկեղեցացաւ ժողովուրդն իբրեւ զմի այր ի Դանայ մինչչեւ ցԲերսաբեէ, եւ երկիրն Գաղաադու` առ Տէր ի Մասեփա:

2. Եւ եկաց կողմն ամենայն ժողովրդեանն, եկեղեցւոջ Աստուծոյ. չորեք հարիւր հազար արանց սուսերամերկաց:

3. Եւ լուան որդիքն Բենիամենի, եթէ ելին որդիքն Իսրայէղի ի Մասեփա: Եւ ասեն որդիքն Իսրայէղի. Խաւսեցարուք` էթէ ո՞ւր եղեւ այնպիսի չարութիւն:

4. Պատասխանի ետ այրն Ղեւտացի` այր կնոջն սպանանելոյ, եւ ասէ. Ի Գաբաա Բենիամենի ի եկի ես եւ հարճ իմ ագանել:

5. եւ յարեան ի վերայ իմ արք Գաբաացիք. եւ պատեցին շուրջ զինեւ եւ զտունն զցայգ, եւ զիս կամեցան սպանանել. Եւ զհարճն իմ լլկեցին եւ հեղձուցին, եւ մեռաւ:

6. եւ առի զհարճն իմ եւ յաւշեցի զնա, եւ առաքեցի ընդ յամենայն սահմանս ժողովրդեանն Իսրայէղի. զի արարին վնաս եւ անզգամութիւն ի մէջ Իսրայէղի:

7. եւ արդ` ահաւասիկ ամենեքին մեք որդիք Իսրայէղի, տուք ձեզ բան եւ խորհուրդ:

8. Եւ յարեաւ ամենայն ժողովուրդն իբրեւ զայր մի, եւ ասեն. Ոչ մտցուք այր իւրաքանչիւր ընդ յարկաւ իւրով, եւ ոչ խոտորեսցուք այր իւրաքանչիւր ի տուն իւր:

9. Եւ արդ` այս բան է զոր արասցուք ընդ Գաբաա. ելցուք ի վերայ նորա վիճակաւ:

10. բայց առցուք տասն այր ի հարիւրոց, յամենայն ցեղիցդ Իսրայէղի, եւ հարիւր ի հազարոց. եւ հազար ի բիւրուց. առնուլ պաշար զաւրուն բովանդակ երթողաց ի Գաբաա Բենիամենի, ըստ ամենայն անզգամութեան զոր արարին ի մէջ Իսրայէղի:

11. Եւ ժողովեցաւ ամենայն այր Իսրայէլ իբրեւ զայր մի ի քաղաքն եկեալք ի քաղաքաց:

12. եւ առաքեցին ցեղք Իսրայէղի արս յամենայն ցեղն Բենամենի` եւ ասեն. Զի՞նչ է չարութիւնդ այդ եկեալ ի միջի ձերում:

13. եւ արդ տեսէք զարսն զամբարիշտսն զորդիսն Բելիարայ, եւ սպանցուք զնոսա, եւ բարձցուք զչարիսն յԻսրայէլէ: Եւ ոչ կամեցան որդիքն Բենիամենի լսել ձայնի եղբարցն իւրեանց որդւոցն Իսրայէղի:

14. Եւ ժողովեցան որդիքն Բենիամենի յաւուր յայնմիկ ի քաղաքսն իւրեանց ի Գաբաա, ելանել ի պատերազմ ընդ որդիսն Իսրայէղի:

15. Եւ հանդէս արարին որդիքն Բենիամենի յաւուր յայնմիկ յիւրաքանչիւր քաղաքաց, քսան եւ հինգ հազար արանց սուսերամերկաց. թող զբնակիչսն Գաբաացոց,

16. որ անցին ի հանդիսի եւթն հարիւր այր երիտասարդք ընդիրք յամենայն ժողովրդենէն եւթն հարիւր արք ընդիրք յերկոցունց ձեռաց աջողակք. ամենեքին նոքա պարսաւորք, որ ձգէին քարինս` եւ ի մազոյ ոչ վրիպէին:

17. Եւ ամենայն այր Իսրայէլի անցին ի հանդիսի, առանց որդւոցն Բենիամենի. չորեք հարիւր հազար արանց սուսերամերկաց, ամենեքին նոքա արք պատերազմողք:

18. Եւ յարեան ելին ի Բեդէլ: եւ հարցին զԱստուած եւ ասեն որդիքն Իսրայէղի. Ո՞ ելցէ մեզ առաջնորդ պատերազմել ընդ որդիսն Բենիամենի: եւ ասէ Տէր` Յուդայ ելցէ առաջնորդ:

19. Եւ յարեան որդիքն Իսրայէղի ընդ առաւաւտն` եւ բանակեցան զԳաբաւաւ:

20. եւ ել այր Իսրայէղի պատերազմ ընդ Բենիամենի. եւ ճակատեցան ընդ նոսա այր Իսրայէղի ի պատերազմ առ Գաբայաւ:

21. Եւ ելին որդիքն Բենիամենի ամենայն ի քաղաքէն, եւ սատակեցին յԻսրայէլէ քսան եւ երկու հազար արանց, եւ արկին տապաստ յերկրին յաւուր յայնմիկ:

22. Եւ զաւրացան դարձեալ այր Իսրայէղի` եւ յաւելին ճակատել ի պատերազմի ի տեղւոջ ուր ճակատեցան յաւուրն առաջնում:

23. Եւ ելին որդիքն Իսրայէղի եւ լացին առաջի Տեառն մինչչեւ ցերեկոյ. եւ հարցին զՏէր` եւ ասեն. Էթէ յաւելի՞ց մարտնչել ի պատերազմ ընդ Բենիամենի յաւուրն երկրորդի: եւ ասէ Տէր. Ելէք ի վերայ նորա:

24. Եւ ելին որդիքն Իսրայէղի ի պատերազմ ընդ որդիսն Բենիամենի յաւուրն երկրորդի:

25. եւ ել Բենիամին ընդդէմ նոցա ի Գաբայա յաւուրն երկրորդի: Եւ սատակեաց միւսանգամ ի ժողովրդենէ անդի ութ հազար արանց յերկիր` ամենեքին նոքա արք սուսերաձիգք:

26. Եւ ելին ամենայն որդիքն Իսրայէղի եւ ամենայն ժողովուրդն` եւ եկին ի Բեդէլ. եւ նստան եւ լացին առաջի Տեառն, եւ պահեցին յաւուր յայնմիկ, եւ մատուցին ողջակէզս փրկութեան առաջի Տեառն.

27. քանզի անդ էր տապանակ ուխտին Տեառն Աստուծոյ յաւուրսն յայնոսիկ:

28. Եւ Փենեէզ որդի Եղիազարու որդւոյ Ահարովնի, կայր առաջի նորա յաւուրսն յայնոսիկ: Եւ հարցին որդիքն Իսրայէղի զՏէր, եւ ասեն. Եթէ յաւելի՞ց միւսանգամ ելանել ի պատերազմ ընդ որդիսն Բենիամենի եղբաւր իւրոյ` էթէ դադարեսցուք: եւ ասէ Տէր. Ելէք, եւ վաղիւ տաց զնա ի ձեռս ձեր:

29. Եւ եդին որդիքն Իսրայէղի դարանակալս շուրջ զԳաբաաւ:

30. եւ ելին որդիքն Իսրայէղի ի վերայ Բենիամենի յաւուրն երրորդի. եւ ճակատեցան զԳաբաաւ որպէս միանգամ եւ միւսանգամ:

31. Եւ ելին որդիքն Բենիամենի ընդդէմ ժողովրդեանն, եւ ձգեցան ի քաղաքէ անդի, եւ սկսան հարկանել ի ժողովրդենէն անտի, որպէս միանգամ եւ միւսանգամն, առ ճանապարհաւքն` որ մին որ ելանէր իԲեդէլ, եւ միւս ելանէ ի Գաբաա, յանդի անդ իբրեւ արս երեսուն յԻսրայէլէ:

32. Եւ ասեն որդիքն Բենիամենի. Կոտորելոց են նոքա առաջի մեր իբրեւ զառաջինն: եւ որդիքն Իսրայէղի ասեն. Փախիցուք եւ մերժեսցուք զնոսա ի քաղաքէն ի ճանապարհսն:

33. Եւ ամենայն այր Իսրայէղի յարեան յիւրաքանչիւր տեղւոջէ իւրմէ, եւ ճակատեցան ի Բաաղթամար. եւ դարանակալքն Իսրայէղի կռուէին ի տեղւոջէ իւրեանց յարեւմտից Գաբաա:

34. եւ եկին հանդէպ Գաբաա տասն հազար արանց ընդրելոց յամենայն Իսրայէլէ. եւ ծանրացաւ պատերազմ, եւ նոքա ոչ գիտէին էթէ հասեալ իցէ ի վերայ նոցա չարիք:

35. Եւ վանեաց Տէր զԲենիամին առաջի որդւոցն Իսրայէղի, եւ սատակեցին որդիքն Իսրայէղի ի Բենիամենէ յաւուր յայնմիկ քսան եւ հինգ հազար եւ հարիւր այր. ամենեքին նոք սուսերաձիգք:

36. Իբրեւ տեսին որդիքն Բենիամենի` թէ ի պարտութիւն մատնեալ են, տեղի ետուն այր իսրայէլեան Բենիամենի. զի յուսացեալ էին ի դարանամուտսն որ եդին զԳաբաաւ. եւ մտին հարին զամենայն քաղաքն սրով սուսերի:

38. Եւ ժամադրութիւն էր առն Իսրայէղի առ դարանակալսն` սրով հանել նոցա զբոց ծխոյ քաղաքին:

39. եւ դարձաւ այր Իսրայէլ ի պատերազմէն: Եւ Բենիամին սկսաւ հարկանել վիրաւորս ի դարանակալացն Իսրայէղի իբրեւ արս երեսուն. զի ասացին թէ Վանելով վանին առաջի մեր այսաւր իբրեւ զպատերազմ առաջին:

40. Եւ նշանակն ամբարձաւ յորդեալ ի վերայ քաղաքին իբրեւ զսիւն ծխոյ: եւ հայեցաւ Բենիամին ի թիկունս իւր, եւ ահա ելանէր վախճան քաղաքին յերկինս:

41. Եւ այր Իսրայէլի դարձաւ անդրէն, եւ տագնապեցաւ այր Բենիամենի. զի տեսին հասեալ ի վերայ նոցա զչարիսն:

42. եւ խոյս ետուն յերեսաց առն Իսրայէղի ընդ ճանապարհ անապատին: եւ պատերազմն ժամանեաց նոցա. եւ որ ի քաղաքացն ելանէին սատակէին զնոսա ի մէջ իւրեանց:

43. Եւ հարին զԲենիամին. եւ մտին զհետ նորա ի նուայ մինչչեւ հանդէպ Գաբաայ, ընդ արեւելից կողմանէ:

44. Եւ անկան ի Բենիամենէ ութուտասն հազարաց. ամենեքեան նոքա զաւրաւորք:

45. Եւ տեսեալ մնացորդացն փախեան յանապատն ապաստան ի վէմն Ռեմմովնայ. եւ ճռաքաղ արարին ի նմանէ ի ճանապարհսն` հազարս հինգ արանց: եւ պնդեցան զհետ նոցա մինչչեւ ցԳաղաադ, եւ հարին ի նմանէ երկու հազարս արանց:

46. Եւ եղեն ամենայն անկեալքն ի Բենիամենէ` քսան եւ եւթն հազար արանց սուսերամերկաց յաւուր յայնմիկ, ամենեքին նոքա արք զաւրութեան:

47. Եւ խուսեալ մնացորդացն` փախեան յանապատն ապաստան ի վէմն Ռեմմովնայ` արք վեց հարիւր. եւ նստան ի վիմին Ռեմմովնա զչորս ամիսս:

48. Եւ այր Իսրայէղի դարձան ընդ կրուկ յորդիսն Բենիամենի. եւ հարին զնոսա սրով սուսերի ի քաղաքէ կարգաւ   մինչչեւ ցանասուն, մինչչեւ ցամենայն գտեալ յամենայն քաղաքս. եւ զքաղաքսն ապրեալսն առաքեցին եւ այրեցին հրով: