Գլուխ 10

 

1․ Եւ յարեաւ յետ Աբիմելէքա փրկել զԻսրայէլ, Թովդա որդի Փուայ. որդի հաւր եղբաւր նորա, այր յԻսաքարայ. եւ նա բնակէր ի Սամարիա, ի լերինն Եփրեմայ:

2․ Եւ դատեաց զԻսրայէլ ամս քսան եւ երիս, եւ մեռաւ` եւ թաղեցաւ ի Սամարիա:

3․ Եւ յարեաւ յետ նորա Յայիր Գաղաադացի, եւ դատեաց զԻսրայէլ ամս քսան եւ երկուս:

4․ եւ եղեն նորա որդիք` երեսուն եւ երկու, որ հեծանէին յերեսուն եւ երկու յաւանակս. եւ երեսուն եւ երկու քաղաք նոցա: եւ կոչեաց զնոսա աւանս Յայիրայ մինչչեւ ցայսաւր, որ են ի Գաաղադ:

5․ Եւ մեռաւ Յայիր` եւ թաղեցաւ ի Կամովն:

6․ Եւ յաւելին որդիքն Իսրայէղի առնել չար առաջի Տեառն, եւ պաշտել զԲահաղիմսն, եւ զԱստարովթ, եւ աստուածս Ասորոց, եւ զաստուածս Սիդովնայ, եւ զաստուածս Մովաբայ, եւ զաստուածս որդւոցն Ամովնայ, եւ զաստուածս որդւոցն այլազգեաց: եւ թողին զՏէր, եւ ոչ ծառայեցին նմա:

7․ Եւ սրտմտեցաւ բարկութեամբ Տէր Իսրայէղի, եւ մատնեաց զնոսա ի ձեռս այլազգացն, եւ ի ձեռս որդւոցն Ամմովնա:

8․ եւ խախտեցին եւ խորտակեցին զորդիսն Իսրայէղի ի ժամանակին յայնմիկ ամս ութ եւ տասն զամենայն Իսրայէլացիս յայնկոյս Յորդանանու, յերկրի Ամուրհացւոցն ի Գաղաադ:

9․ Եւ անցին որդիք Իսրայէղի Ամմովնա ընդ Յորդանան տալ պատերազմ ընդ Յուդայ եւ ընդ Բենիամին, եւ ընդ տանն Եփրեմայ. եւ նեղեցան յոյժ որդիքն Իսրայէղի:

10․ Եւ աղաղակեցին որդիքն Իսրայէղի առ Տէր` եւ ասեն. Մեղաք քեզ, զի թողաք զԱստուած մեր` եւ պաշտեցաք զԲահաղիմս:

11․ Եւ ասէ Տէր ցորդիսն Իսրայէղի. Ո՞չ ապաքէն Եգիպտացիք եւ Ամուրհացիք, եւ որդիքն Ամովնա, եւ Մովաբա, եւ այլազգիք,

12․ եւ Սիդովնացիք, եւ Ամաղէկ եւ քանան` նեղեցին զձեզ, եւ աղաղակեցէք առ իս` եւ փրկեցի զձեզ ի ձեռաց նոցա:

13․ Եւ դուք թողէք զիս` եւ ծառայեցէք աստուածոց աւտարաց. վասն այնորիկ ոչ յաւելից փրկել զձեզ:

14․ երթայք աղաղակեցէք առ աստուածսն զոր ընտրեցէք ձեզ. եւ նոքա փրկեսցեն զձեզ ի ժամանակի նեղութեան ձերոյ:

15․ Եւ ասեն որդիքն Իսրայէղի ցՏէր. արա դու ընդ մեզ զամենայն, որ ինչ հաճոյ թուի առաջի քո. բայց Տէր` միայն ապրեցո զմեզ յաւուր յայսմիկ:

16․ Եւ մերժեցին զաստուածսն աւտարոտիս ի միջոյ իւրեանց. եւ պաշտեցին զՏէր միայն: եւ ոչ հաճեցաւ ընդ ժողովրդեանն: եւ յոգիս ապաստան եղեւ յաշխատութենէ Իսրայէղի:

17․ Եւ ելին որդիքն Ամմովնա, եւ բանակեցան ի Գաղաադ: եւ ելին որդիքն Իսրայէղի, եւ բանակեցան ի դիտանոցին:

18․ Եւ իշխանք ժողովրդեանն Գաղաադու` այր ցնկեր իւր ասեն. Այր որ սկիզբն առնիցէ պատերազմել ընդ որդիսն Ամմովնա, եղիցի գլուխ ամենայն բնակչացս Գաղաադու: