1. Եւ եղեւ ի յաւուրսն յայնոսիկ, եւ թագաւոր ոչ գոյր Իսրայէլի: Եւ էր այր Ղեւտացի պանդխտեալ ի լերինն Եփրեմայ ի կողմանս: եւ առ իւր այրն կին հարճ ի Բեթղէեմէ Յուդայ:
2. Եւ սարտեաւ ի նմանէ հարճն իւր. եւ գնաց ի նմանէ ի տուն հաւր իւրոյ ի Բեթղէէմ Յուդայ. եւ եղեւ անդ երէք ամիս:
3. Եւ յարուցեալ այրն չոգաւ զհետ նորա, խաւսել ի սիրտ նորա հաշտեցուցանել զնա ընդ իւր, եւ ածեալ զնա միւսանգամ առ ինքն. եւ պատանի իւր ընդ իւր, եւ զոյգ իշոց: եւ չուաւ մինչչեւ ցտուն հաւր նորա: Եւ իբրեւ ետես զնա հայր աղջկանն, ել ընդ առաջ նորա.
4. եւ տարաւ զնա ի ներքս աներն իւր հայր աղջկանն, եւ նստաւ առ նմա աւուրս երեք. եւ կերան, արբին եւ ննջեցին:
5. Եւ եղեւ յաւուրն չորորդի, կանխեցին ընդ առաւաւտն, եւ յարեաւ ի գնալ: եւ ասէ հայր աղջկանն ցփեսայն իւր. Հաստատեա զսիրտ քո պատառ միով հացիւ, եւ ապա գնասջիք:
6. եւ նստան` կերան եւ արբին երկոքին ի միասին: Եւ ասէ հայր աղջկանն ցայրն. Արդ` սկսեալ աստէն իսկ ագիր. եւ զուարճասցի սիրտ քո:
7. եւ յարեաւ այրն ի գնալ. եւ բռնադատեաց զնա աներն իւր, եւ նստաւ, եւ անդէն ագաւ:
8. Եւ կանխեաց ընդ առաւաւտն յաւուրն հինգերորդի գնալ. եւ ասէ հայր աղջկանն. Հաստատեա զսիրտ քո հացիւ, եւ զբաւսիր, մինչչեւ շրջեսցի աւրս. եւ կերան եւ արբին երկոքեան:
9. Եւ յարեաւ այրն գնալ, ինքն եւ հարճն` եւ պատանին իւր: եւ ասէ ցնա աներն իւր.
Ահա դարձաւ աւրս յերեկս, աստէն ագիր` եւ զուարթասցի` սիրտ քո, եւ կանխեսջիր վաղիւ ի ճանապարհս ձեր, եւ երթիցես ի յարկս քո:
10. Եւ ոչ կամեցաւ ագանել այրն անդ, եւ յարեաւ եւ գնաց. եւ եկն էհաս մինչչեւ ցհանդէպ Յեբուսայ, այն է Երուսաղէմ. եւ ընդ նմա զոյգ իշոյ համետելոյ. եւ հարճն իւր ընդ նմա:
11. նոքա հանդէպ Յեբուսայ. եւ աւրն խոնարհեալ յոյժ: Եւ ասէ պատանին ցտէրն. Եկ խոտորեսցուք ի քաղաք Յեբուսացւոցն, եւ ագցուք ի նմա:
12. Եւ ասէ ցնա տէրն իւր. Ոչ խոտորեսցուք ի քաղաք աւտարոտւոց, յորում ոչ գուցէ յորդւոցն Իսրայէղի, այլ անցցուք մինչ ցԳաբաա:
13. Եւ ասէ ցպատանին իւր. Եկ մերձեսցուք ի մի ուրեք ի տեղեաց եւ ագցուք ի Գաբա կամ ի Ռամայ: եւ անցին գնացին:
14. Եւ եմուտ նոցա արեգակն մերձ ի Գաբաա, որ է Բենիամենի:
15. Եւ խոտորեց անդ ի մտանել ագանել ի Գաբաա. եւ եմուտ եւ նստաւ ի հրապարակի քաղին. եւ ոչ էր այր որ ժողովէր զնոսա ի տուն իւր ագանել:
16. Եւ ահա այր մի ծեր, եմուտ ի գործոյ իւրմէ յանդոյ անագանի. Եւ այրն ի լեռնէ Եփրեմայ, եւ ինքն պանդխտեալ էր ի Գաբաա: եւ արք տեղւոյն` որդիք Բենիամենի:
17. եւ ամբարձեալ զաչս իւր ետես զայրն ուղեւոր ի մէջ քաղաքին հրապարակի: Եւ ասէ այրն ծեր. Յո՞ երթաս` կամ ուստի գաս:
18. Եւ ասէ ցնա. Անցանեմք մեք ի Բեթղէեմէ Յուդայ, մինչ ցկողմանս լերինն Եփրեմայ. քանզի անտի եմ ես. եւ չոգայ մինչչեւ ցԲեթղաէմ Յուդայ, եւ ի տուն հաւր իմոյ երթամ. եւ չիք այր որ ժողովիցէ զմեզ ի տունս.
19. եւ յարդ` եւ խոտ կայ իշոց մերոց, եւ հաց եւ գինի ինձ եւ աղջկանդ եւ պատանոյդ. եւ չէ ինչ պակասութիւն ամենայն իրաց ծառայից քոց:
20. Եւ ասէ այրն ծեր. Խաղաղութիւն ընդ քեզ. ամենայն պակասութիւն քո զինեւ`
բայց դու ի հրապարակիդ մի ագանիցիս:
21. եւ տարաւ զնա ի տուն իւր, եւ արկ գարի իշոցն. եւ լուացին զոտս նոցա, եւ կերան եւ արբին:
22. Եւ ի զուարթանալ սրտից նոցա. Ահա արք քաղաքին, արք` որդիք անաւրինաց պատեցին զտունս եւ բախեցին զդուրսն, եւ խաւսեցան ընդ առն ծերոյն ընդ տեառն տանն` եւ ասեն. Հան զայրդ մտեալ ի տուն քո, զի գիտասցուք զդա:
23. Եւ ել առ նոսա այրն տէր տանն, եւ ասէ ցնոսա. Քաւ լիցի ձեզ եղբարք, մի ինչ անզգամ էք յետ մտանելոյ առնդ այդորիկ ի տուն իմ. մի առնէք զանզգամութիւնդ զայդ:
24. ահաւասիկ դուստր իմ կոյս, եւ հարճ նորա, հանից զնոսա արտաքս, եւ լլկեցէք զնոսա, եւ արարէք ընդ նոսա` զինչ հաճոյ է յաչս ձեր. եւ առնս այսմիկ մի առնէք ըստ բանիդ անզգամութեան այդորիկ:
25. եւ ոչ կամեցան արքն անսալ: Եւ առ այրն զհարճն իւր, եւ էհան առ նոսա արտաքս. եւ գիտացին զնա, եւ լլկեցին զգիշերն ողջոյն մինչչեւ ցառաւաւտն. եւ արձակեցին զնա ընդ ելանել առաւաւտուն:
26. Եւ եկն կինն ընդ առաւաւտն, եւ անգաւ առ դրանդոց դրան առնն, ուր էր տէր նորա. եւ մինչչեւ էհան զոգին:
27. Եւ յարեաւ Տէր նորա ընդ առաւաւտն, եւ եբաց զդուրս տանն, եւ ել գնաց զճանապարհ իւր, եւ ահա կինն հարճ նորա անկեալ կայր առ դրանն. եւ ձեռն իւր ի վերայ դրանդոցն:
28. Եւ ասէ ցնա. Արի եւ գնասցուք. եւ ոչ ետ նմա պատասխանի` քանզի մեռեալ էր. եւ առ էհան
զնա յէշն, եւ յարեաւ այրն եւ չոգաւ ի տեղի իւր:
29. Իբրեւ եմուտ ի տուն իւր, առ սուր, եւ բուռն էհար զհարճէն իւրմէ, եւ յաւշեաց զնա ըստ ոսկերաց իւրոց յերկոտասան մասն. եւ առաքեաց զայն ընդ ամենայն ցեղսն Իսրայէղի:
30. Եւ եղեւ ամենայն որ տեսանէր` ասէր, թէ ոչ եղեւ, եւ ոչ երեւեցաւ այսպէս յաւուրց ելանելոյ որդւոցն Իսրայէղի յերկրէն եգիպտացւոց մինչչեւ ցայսաւր. արդ` առէք ձեզ վասն այսորիկ խորհուրդ, եւ խաւսեցարուք:
Հաղորդում կայքում սխալի վերաբերյալ
Տվյալ հատվածում առկա է սխալ: