Գլուխ 8

   
1․ Եւ ասեն ցԳեդէովն այր Եփրեմի. Զի՞նչ է բանդ այդ զոր արարեր ընդ մեզ. զի ոչ կոչեցեր զմեզ յորժամ երթայիր պատերազմել ընդ Մադիամու: եւ վիճէին ընդ նմա սաստկագոյն:

2․ Եւ ասէ ցնոսա. Արդ` զի՞նչ ինչ արարի իբրեւ զձեզ. ո՞չ ապաքէն լաւագոյն է ճռաքաղութիւնդ Եփրեմի, քան զկութս Աբիեզերայ:

3․ ի ձեռն ձեր մատնեաց Տէր զիշխանսն Մադիամու` Զորեբ եւ Զզեբ. եւ զի՞նչ կարացի առնել իբրեւ զձեզ: եւ ապա դադարեաց ոգի նոցա ի նմանէ ի խաւսել նորա զբանս զայս:

4․ Եւ եկն Գեդէովն ի Յորդանան, եւ անց ինքն եւ երեք հարեւր այրն որ ընդ նմա պատրաստեալք քաղցեալք:

5․ Եւ ասէ ցարսն Սոքովթայ. Տուք աւադիկ հաց ի կերակուր զաւրուս այսմիկ որ ընդ իս է, զի քաղցեալ են. եւ ես պնդեցայց զհետ Զեբէի եւ Սաղմանայ թագաւորացն Մադիամու:

6․ Եւ ասեն իշխանքն Սոքքովթայ. Մի թէ ձեռն Զեբէի եւ Սաղմանայ իցէ ի ձեռին քում, զի տացուք հաց զաւրականիդ քում:

7․ Եւ ասէ Գեդէովն. Ոչ այդպէս է, այլ ի տան Տեառն զԶեբէէ եւ զՍաղմանայ ի ձեռս իմ. եւ ես քարշեցից զմարմինս ձեր փշովք անապատի եւ բորկոնիմաւ:

8․ Եւ ել անտի ի Փանուէլ, եւ խաւսեցաւ ընդ նոսա նոյնպէս. եւ պատասխանի արարին նմա արք Փանուելայ, զոր աւրինակ արարին նմա պատասխանի արք Սոքքովթայ:

9․ Եւ խաւսեցաւ Գեդէովն ընդ արս Փանուելի` եւ ասէ. Ի դառնալն իմում այսրէն խաղաղութեամբ, կործանեցից զաշտարակդ զայդ:

10․ Եւ Զեբէէ եւ Սաղմանա էին կարկար, եւ բանակն նոցա ընդ նոսա, իբրեւ հնգետասան հազար` ընդ ամենայն որ մնացեալ էին յամենայն բանակեն որդւոցն արեւելից: եւ անկեալքն էին հարիւր եւ քսան հազար արանց սուսերամերկաց:

11․ Եւ ել Գեդէովն ընդ ճանապարհ վրանաբնակչացն յարեւելից Նաբաէի, եւ հանդէպ Նաբերա. եւ եհար զբանակն, զի էր բանակս յանհոգս:

12․ Եւ փախեան Զեբէէ եւ Սաղմովնայ, եւ պնդեցան զհետ նոցա. եւ ձերբակալ արար զերկոսին թագաւորսն Մադիամու Զեբէէ եւ զՍաղմանէա, եւ զամենայն բանակն նոցայ դղրդեցոյց:

13․ Եւ դարձաւ Գեդէովն որդի Յովասու ի պատերազմէն ի զառիվերէ անտի Երասեայ:

14․ Եւ կալաւ պատանեակ մի յարանց Սոքովթեայ, եւ եհարց զնա. եւ գրեալ առ ինքն զիշխանսն Սոքքովթայ, եւ զծերս նորա եւթանասուն եւ եւթն այր:

15․ Եւ եկն Գեդէովն առ իշխանսն Սոքքովթայ, եւ ասէ ցնոսա. Ահաւասիկ Զեբէէ եւ Սաղմանէ, վասն որոյ նախատեցէքն զիս` եւ ասացէք. Միթէ ձեռն Զեբէի եւ Սաղմանայ այժմ ի ձեռին քում իցեն, զի տացուք արանց քոց անց քթելոց:
16․ Եւ առ զիշխանսն եւ զծերս քաղաքին, եւ փուշս յանապատէ, եւ զբորկոնիիմն. եւ քարշեաց նոքաւք զարսն Սոքքովթայ:

17․ եւ զաշտարակն Փանուելի կործանեաց, եւ կոտորեաց զարս քաղաքին:

18․ Եւ ասէ ցԶեբէէ եւ զՍաղմանա, Ո՞ւր են արքն զորս կոտորեցէք ի Թաբովր: եւ ասեն` Որպէս դու, նոյնպէս եւ նոքա նման քեզ, եւ դու նման նոցա, իբրեւ զտեսիլ որդւոյ թագաւորի:

19․ Եւ ասէ Գեդէովն, Եղբարք իմ եւ որդիք մաւր իմոյ էին. եւ երդուաւ նոցա եւ ասէ. Կենդանի է Տէր, էթէ կենդանի պահեալ էր ձեր զնոսա, ոչ սպանանէի զձեզ:

20․ Եւ ասէ ցԵթեր ցանդրանիկ իւր. Արի սպան զդոսա. եւ ոչ էհան պատանեակն զսուր իւր, զի երկեաւ` քանզի մանուկ էր:

21․ Եւ ասեն Զեբէէ եւ Սաղմանա. Արի դու եւ քեզէն պատահեա մեզ, զի ըստ առն` եւ զաւրութիւն իւր: եւ յարեաւ Գեդէովն եւ սպան Զեբէէ եւ զՍաղմանա. եւ առ զմանեակսն ի պարանոցաց ուղտուց նոցա:

22․ Եւ ասեն այր Իսրայէլ ցԳեդէովն. Իշխեա դու մեզ եւ որդի քո, եւ որդւոյ քո. զի փրկեցեր զմեզ ի ձեռաց Մադիամու:

23․ Եւ ասէ ցնոսա Գեդէովն. Ոչ իշխեցից ես ձեզ, եւ ոչ իշխեսցէ որդի իմ. այլ Տէր իշխեսցէ ձեզ:

24․ Եւ ասէ ցնոսա Գեդէովն. Խնդրեցից ի ձէնջ հայցուած ինչ, եւ տուք ինձ` առ այր գինդ մի յաւարէ անտի. զի գինդք ոսկիք էին նոցա, քանզի Իսմայէլացիք էին:

25․ Եւ ասեն` Տալով տացուք: եւ տարածեցին զհանդերձս նորա. եւ ընկեցին անդր իւրաքանչիւր այր զգինդս ոսկիս զաւարի իւրոյ:

26․ Եւ եղեւ կշիռ գնդացն ոսկեաց զոր խնդրեաց` հազար եւ եւթն հարիւր սկեղ ոսկւոյ, թող զռնչանունսն եւ զմեհեւանդս, եւ զպսակակալս, եւ զծիրանիս, եւ որ ինչ ի թագաւորսն Մադիամու. եւ թող զմանեակս ոսկիս պարանոցաց ուղտուց նոցա:

27․ Եւ արար զայն Գեդէովն յԵփուդ, եւ հաստատեաց զայն ի քաղաքին իւր յԵփրաւ: եւ պոռնկեցաւ ամենայն Իսրայէլ զկնի նորա անդր. եւ եղեւ Գեդէովնի եւ տան նորա ի գայթագղութիւն:

28․ Եւ վանեցաւ Մադիամ առաջի որդւոցն Իսրայէղի, եւ ոչ եւս յաւելին ամբառնալ զգլուխս իւրեանց. եւ դադարեաց երկիրն ամս քառասուն յաւուրս Գեդէովնէ:

29․ եւ գնաց Յերոբուաղ որդի Յովասու, եւ բնակեցան ի տան իւրում:

30․ Եւ Գեդէովնի էին որդիք եւթանասուն ելեալք յերանաց նորա. զի կանայք բազում էին նորա:

31․ Եւ հարճ նորա որ ի Սիկիմս, ծնաւ նմա եւ նա որդի. եւ եդ անուն նմա Աբիմելէք:

32․ Եւ մեռաւ Գեդէոն որդի Յովասու ի բարիոք ծերութեան, եւ թաղեցաւ ի գերեզմանի հաւր իւրոյ յԵփրա հաւրն Եսրայ:

33․ Եւ եղեւ իբրեւ մեռաւ Գեդէովն, դարձան որդիքն Իսրայէղի` եւ պոռնկեաց զհետ Բաղաամացն. եւ եդին զուխտ իւրեանց ընդ Բաաղուն Բերիթայ, լինել նոցա նմա յաստուած:

34․ եւ ոչ յիշեցին որդիքն Իսրայէղի զՏէր Աստուած իւրեանց որ փրկեաց զնոսա յամենայն ձեռաց թշնամեաց իւրեանց շուրջանակի:

35․ Եւ ոչ արարին ողորմութիւն ընդ տանն Յերովբաաղա` որ նա ինքն է Գեդէովն, ըստ ամենայն բարութեանն զոր արար ընդ Իսրայէղի: