1. Յայնժամ գիտացաք եթէ Մելիտինէ էր անուն կղզւոյն: Բայց բարբարոսքն շնորհեցին ո՛չ սակաւ մարդասիրութիւն մեզ:
2. Քանզի լուցին խարոյկ՝ եւ ընկալան զամենեսեան զմեզ, վասն անձրեւին որ ստիպէր՝ եւ վասն ցրտոյն:
3. Եւ ի ժողովել Պաւղոսի խռի՛ւ ինչ բազում՝ եւ դնել ի վերայ խարուկին, իժ մի ի ջերմութենէն ելեալ կալա՛ւ զձեռանէն նորա:
4. Եւ իբրեւ տեսին բարբարոսքն կախեա՛լ զգազանն զձեռանէ նորա, ասէին ցմիմեանս. Ուրեմն սպանա՛ւղ է այրս այս. որ թէպէտ ապրեցաւ ի ծովէն, իրաւունքն ոչ ետուն կեալ:
5. Եւ նորա թաւթափեալ զգազանն ի հուրն, եղեւ նմա չար եւ ո՛չ ինչ.
6. եւ նոքա ակն ունէին նմա այտնլոյ, կամ անկանելոյ՝ եւ յանկարծակի՛ մեռանելոյ: Իբրեւ շա՛տ ակն կալեալ, եւ տեսանէին թէ ո՛չինչ վնաս եղեւ նմա, դարձեալ դարձուցին զբանսն՝ եւ ասէին թէ աստուա՛ծ ոմն է:
7. Եւ շուրջ զտեղեաւն զայնուիկ էին գեաւղք, գլխաւորի կղզւոյն որում անուն էր Պոպլիոս. որ առ զմեզ յերաշխի զերիս աւուրս՝ եւ սիրո՛վ ընկալաւ:
8. Եւ եղեւ հաւրն Պոպլեայ ի ջե՛րմ եւ յախտ թանչից հիւանդանա՛լ դնել: Առ որ մտեալ Պաւղոս՝ եւ կացեալ յաղաւթս եդ ծունր՝ եւ բժշկեա՛ց զնա:
9. Իբրեւ այս եղեւ, այլ հիւանդք որ էին ի կղզւոջն՝ գային եւ բժշկէին.
10. Որք եւ բազում պատուով պատուեցին զմեզ: Եւ իբրեւ գնացաք, ետո՛ւն որ ինչ պէտք էին:
11. Եւ յետ երից ամսոց ելաք ի նաւ մի աղեքսանդրացի՝ որ ձմերեալ էր ի կղզւոջն նշանաւորա՛ւ դիոսկորացւոց:
12. Եւ իջեալ ի Սիւրակուսաս, եղեաք աւուրս երկուս:
13. Ուստի գնացեալ հասա՛ք ի Հռեգիովն: Եւ յետ աւուր միոյ ի շնչել հարաւոյն, երկաւրեա՛յք եկաք ի Պատիոլուս:
14. Ուր եւ գտաք եղբարս, աղաչեցեալք ի նոցանէ լինել աւուրս եւթն: Եւ ապա ելաք ի Հռովմ:
15. Եւ անտի լուեալ եղբարց զմէնջ, ելին ընդ առաջ մեր մինչեւ յորդոստայն ապփեայ եւ երիցն կրպակաց. զորս տեսեալ Պաւղոսի գոհացա՛ւ զԱստուծոյ՝ եւ քաջալերեցա՛ւ:
16. Եւ իբրեւ մտաք ի Հռովմ, հրամայեցաւ Պաւղոսի լինե՛լ առանձինն հանդերձ զինուորաւն պահպանաւ իւրով:
17. Եւ եղեւ յետ երից աւուրց, կոչե՛լ նմա զհրէից գլխաւորս: Եւ իբրեւ եկին, ասէ ցնոսա. Ես՝ ա՛րք եղբարք՝ ո՛չինչ հակառակ գործեալ ժողովրդեան՝ կամ կրաւնիցն հայրենեաց, կապեալ յԵրուսաղեմէ՝ մատնեցայ ի ձեռս հռովմայեցւոց:
18. Որք իբրեւ դատեցանն զիս, կամեցան արձակե՛լ, վասն եւ ո՛չ մի ինչ վնաս մահու գտանելոյ յիս:
19. Ի հակառակել հրէիցն, հարկ եղեւ բողոքել ի կայսր. ի՛բր ո՛չ եթէ զազգէն իմմէ ունէի ինչ չարախաւսել:
20. Վասն այսր պատճառանաց աղաչեցի զձեզ՝ տեսանել եւ խաւսել. քանզի վասն յուսո՛յն Իսրայէլի կա՛մ ի շղթայս յայսոսիկ:
21. Եւ նոքա ասեն ցնա. Մեք ո՛չ թուղթս ինչ վասն քո ընկալաք ի Հրէից, եւ ո՛չ եկեալ ոք յեղբարց պատմեաց՝ կամ խաւսեցաւ ինչ վասն քո չարութիւն:
22. Բայց աղաչեմք ի քէ՛ն լսել՝ թէ զի՛նչ խորհիցիս. զի վասն հերձուածոյդ այդորիկ յա՛յտ իսկ է մեզ, զի ամենայն ուրեք հակառակութիւն կրէ:
23. Ժա՛մ եդեալ նմա աւր մի, եկին ի վանսն առ նա բազումք. որոց պատմէ՛ր վկայութեամբ զարքայութիւն Աստուծոյ. եւ հաւանեցուցանէ՛ր զնոսա վասն Յիսուսի՝ յաւրինացն Մովսիսի եւ ի մարգարէից՝ յայգուէ մինչեւ ցերեկոյ:
24. Եւ ոմանք հաւանէի՛ն բանիցն, եւ կէսք չհաւատայի՛ն:
25. Եւ անմիաբանք լիեալ միմեանց՝ արձակէի՛ն: Յասելն Պաւղոսի բան մի. թէ բարւո՛ք խաւսեցաւ Հոգին Սուրբ ի ձեռն Եսայեայ մարգարէի առ հարսն մեր,
26. եւ ասէ. Ե՛րթ առ ժողովուրդն. եւ ասասցես. լսելով լուիջի՛ք՝ եւ մի՛ իմասջիք, տեսանելով տեսջի՛ք՝ եւ մի՛ տեսջիք:
27. Զի թանձրացաւ սիրտ ժողովրդեանն այնորիկ, եւ ակընջաւք իւրեանց ծա՛նր լուան, եւ զաչս իւրեանց կափուցին, զի մի՛ երբէք տեսցեն աչաւք,
28. եւ ակընջաւք լուիցեն, եւ սրտիւքն իմասցին, եւ դարձցին եւ բժշկեցից զնոսա:
29. Եւ արդ՝ յայտնի՛ լիցի ձեզ, զի հեթանոսա՛ց առաքեցաւ փրկութիւնս Աստուծոյ նոքին եւ լուիցեն:
30. Եւ եղեւ զերկեա՛մ մի բովանդակ իւրով վարձու.
31. եւ ընդունէր զամենեսեան որ մտանէին առ նա:
32. Քարոզէր զարքայութիւնն Աստուծոյ, եւ ուսուցանէր վասն Տեառն Յիսուսի Քրիստոսի, անխափա՛ն՝ ամենայն համարձակութեամբ:
Հաղորդում կայքում սխալի վերաբերյալ
Տվյալ հատվածում առկա է սխալ: