Գլուխ 1

   
1․ Եւ եղեւ յետ վախճանելոյն Յեսուայ, հարցանէին որդիքն Իսրայէլի զՏէր` եւ ասէին. Ո ելցէ մեզ առ Քանանացին առաջնորդ` պատերազմել ընդ նմա:

2․ Եւ ասէ Տէր` Յուդայ ելցէ. զի ետու զերկիրն ի ձեռս նորա:

3․ Եւ ասէ Յուդայ ցՇմաւոն եղբայր իւր. Ել ընդ իս ի վիճակիս իմում, եւ տացուք պատերազմ ընդ Քանանացիսն. Եւ եկից ես ընդ քեզ ի քում վիճակին: Եւ գնաց ընդ նմա Շմաւոն:

4․ Եւ ել Յուդայ. եւ ետ Տէր զՔանանացին եւ զՓերեզացին ի ձեռս նորա. եւ եհար զնոսա ի Բեզեկ տասն հազար արանց:

5․ Եւ գտին զԱդոնիբեզեկ ի Բեզեկ, եւ ետուն պատերազմ ընդ նմա. եւ հարին զՔանանացին եւ զՓերեզացին:

6․ Եւ փախեաւ Ադոնիբեզեկ, եւ պնդեցան զհետ նորա, եւ հասին նմա. եւ կտրեցին զծայրս ձեռաց նորա, եւ զծայրս ոտից նորա:

7․ Եւ ասէ Ադոնիբեզեկ. Եւթանասուն թագաւորք ծայրակտուրք ձեռաւք եւ ոտիւք էին, որ քաղէին զփշրանս ի ներքոյ սեղանոյ իմոյ. արդ` որպէս արարի, նոյնպէս հատոյց ինձ Աստուած: Եւ ածին զնա յԵրուսաղէմ, եւ անդ մեռաւ:

8․ Եւ պատերազմէին որդիքն Յուդայ ընդ Երուսաղէմի, եւ առին զնա, եւ հարին զնա սրով սուսերի. եւ զքաղաքն այրեցին հրով:

9․ Եւ յետ այնորիկ իջին որդիքն Յուդայ պատերազմել ընդ Քանանացւոյն, բնակելոյ ի լեռնակողման, եւ ի հարաւ, եւ ի դաշտավայրս:

10․ Եւ գնաց Յուդայ ի վերայ Քանանացւոյն բնակելոյ ի Քեբրոն, եւ ել Քեբրոն ընդդէմ. եւ էր անուն Քեբրոնի յառաջ` Կարիաթարբոկ Սէփեր. եւ հարին զՍէսի, եւ զԱքիման, եւ զԹողմի, զծնունդսն Ենակայ:

11․ Եւ ելին անտի ի վերայ բնակչացն Դաբիրայ, եւ անուն Դաբիրայ էր յառաջագոյն քաղաք Նամակաց:

12․ Եւ ասէ Քաղէբ. Որ ոք հարցէ զքաղաք Նամակաց` եւ առցէ զնա, տաց նմա զԱսքա զդուստր իմ կնութեան:

13․ Եւ առ զնա Գոդոնիէղ որդի Կենեզի եղբայր Քաղեբայ` կրտսեր քան զնա: Եւ ետ նմա Քաղէբ զԱսքա զդուստր իւր կնութեան:

14․ Եւ եղեւ ի գնալ նորա, յորդորեաց զնա Գոդոնիէղ խնդրել ի հաւրէ իւրմէ ագարակ: Եւ տրտնջեաց` եւ աղաղակեաց յիշոյ անտի` եւ ասէ. Յերկիր հարաւոյ ետուր զիս: Եւ ասէ ցնա Քաղէբ. Զի՞ է քեզ:

15․ Եւ ասէ ցնա Ասքա. Տուր ինձ աւրհնութիւն, զի յերկիր հարաւոյ ետուր զիս. եւ տացես ինձ զբաւսանս ջրոց: Եւ ետ նմա Քաղէբ ըստ սրտի նորա զբաւսանս բարձանց, եւ զբաւսանս հովտաց:

16․ Եւ որդիքն Յոբաբայ Կինեցւոյ աներոյն Մովսիսի, ելին ի քաղաքէն Արմաւենեաց` առ որդիսն Յուդայ ի հարաւոյ Յուդայ, առ զառիվայրին Արադայ. Եւ գնացին բնակեցան ընդ ժողովրդեանն:

17․ Եւ գնաց Յուդայ ընդ Շմաւովնի եղբաւր իւրոյ, եւ հարին զՔանանացին

բնակեալ Յեփաթ. եւ նզովեցին զնա. եւ կոչեցին զանուն քաղաքին Սատակումն:

18․ Եւ ոչ ժառանգեաց Յուդա զԳաղա եւ զսահմանս նորա, եւ զԱկարովն եւ զսահմանս, եւ զՍակալոն եւ զսահմանս նորա. եւ զԱզովտոս եւ զանդաստանս նորա:

19․ Եւ էր Տէր ընդ Յուդայի, եւ ժառանգեաց զլեառնն. զի ոչ կարացին ժառանգել զբնակիչս հովտացն. զի Ռեքաբ` զատոյց զնոսա. եւ կառք երկաթիք էին նոցա:

20․ Եւ ետուն Քաղեբայ զՔեբրովն որպէս եւ խաւսեցաւ Մովսէս. Եւ ժառանգեաց անդի զերիս քաղաքս որդւոցն Ենակայ. եւ եբարձ անտի զերիս որդիսն Ենակայ:

21․ Եւ զՅեբուսացին զբնակեալն յԵրուսաղէմ ոչ ժառանգեցին որդիքն Բենիամենի: եւ բնակեաց Յեբուսացին ընդ որդիսն Բենիամենի յԵրուսաղէմ մինչչեւ ցայսաւր:

22․ Եւ ելին որդիքն Յովսեփա, եւ ինքեանք ի Բեթէլ. եւ Տէր ընդ նոսա:

23․ եւ բանակեցան տունն Իսրայէլի ի Բեթէղ. եւ անուն քաղաքին էր յառաջ Լուզայ:

24․ Եւ տեսին պահապանքն զայր մի ելեալ ի քաղաքէ անտի, եւ կալան զնա` եւ ասեն. Ցոյց մեզ զմուտ քաղաքիդ եւ արասցուք ընդ քեզ ողորմութիւն:

25․ եւ եցոյց նոցա զմուտ քաղաքին, եւ հարին զքաղաքն սրով սուսերի. եւ զայրն եւ զազգատոհմն իւր արձակեցին:

26․ Եւ գնաց այրն յերկիրն Քեթթիիմ, եւ շինեաց անդ քաղաք, եւ կոչեաց զանուն նորա Լուզա. եւ այն է անուն նորա մինչչեւ ցայսաւր:

27․ Եւ ոչ ժառանգեաց Մանասէ զԲեթան` որ է ի Սկիթոպաւլիս. եւ ոչ զդստերս նորա, եւ ոչ զանդաստանս նորա. եւ ոչ զԹանաք եւ զդստերս նորա: Եւ ոչ զբնակիչսն Դովրայ. եւ ոչ շուրջ զբնակեալսն զնովաւ, եւ ոչ զդստերս նորա: եւ ոչ զբնակիչսն Բաղակայ, եւ ոչ շուրջ զբնակեալսն զնովաւ. եւ զդստերս նորա: Եւ ոչ զբնակիչսն յՄակեդովա, եւ ոչ զբնակեալսն զնովաւ, եւ զդստերս նորա, եւ ոչ զբնակիչսն յԵբդամա, եւ ոչ շուրջ զբնակեալսն զնովաւ, եւ ոչ զդստերս նորա: եւ սկսաւ Քանանացին բնակել յերկրին յայնմիկ:

28․ Եւ եղեւ իբրեւ զաւրացաւ Իսրայէլի, եդ զՔանանացին ընդ հարկաւ, եւ բառնալով ոչ եբարձ զնա:

29․ Եւ Եփրեմ` ոչ եբարձ զՔանանացին զբնակեալն ի Գազեր. եւ բնակեաց Քանանացին ի մէջ նորա ի Գազեր, եւ եղեւ նմա հարկատու:

30․ Եւ Զաբուղովն` ոչ եբարձ զբնակիչսն Կեդրովնի, եւ զբնակիչսն Ամանայ. եւ բնակեաց Քանանացին ի մէջ նորա. եւ եղեւ նմա հարկատու:

31․ Եւ ասեր` ոչ եբարձ զբնակիչսն Ակքովայ, եւ եղեւ նմա հարկատու. եւ զբնակիչսն Դովրայ, եւ զբնակիչսն Սիդովնի, եւ զբնակիչսն Գաղափա, եւ զԱքազիբ, եւ զԵղբա, եւ զԱփեկ, եւ զՌովբ:

32․ եւ բնակեաց ասեր ի մէջ Քանանացւոյն բնակելոյն յերկրին. քանզի ոչ կարացին բառնալ զնա: 33 Եւ Նեփթաղիմ` ոչ եբարձ զբնակիչսն Բեթանաթայ. եւ բնակեաց Նեփթաղիմ ի մէջ Քանանացւոյն բնակելոյ յերկրին. եւ բնակիչքն Բեթսամիսա եւ Բենանաթա եղեն նմա հարկատուք:

34․ Եւ նեղեաց Ամուրհացին զորդիսն Դանայ ի լերինն. զի ոչ տայր նոցա թոյլ իջանել ի հովիտսն:

35․ Եւ սկսաւ Ամուրհացին բնակել ի լերինն Մուրտաստանսն. ուր արջքն եւ աղուէսքն եւ ի սաղաբին: Եւ ծանրացաւ ձեռն Յովսեփու ի վերայ Ամուրհացւոյն. եւ եղեն նոցա հարկատու.

36․ զի սահման Ամուրհացւոյն Եդոմայեցին էր. ի վերայ զառիվերին Ակրաբինա ի վիմէն եւ ի վեր: