Գլուխ11

1․ Եւ սիրեսցես զտէր Աստուած քո. եւ պահեսցես զպահպանութիւնս նորա, եւ զիրաւունս նորա, եւ զպատուիրանս նորա, եւ զդատաստանս նորա զամենայն աւուրս կենաց քոց:

2․ Եւ ծանիջիք այսաւր, էթէ ոչ վասն որդւոց քոց` որք ոչ գիտեն եւ ոչ տեսին զխրատ տեառն Աստուծոյ քո. եւ զմեծամեծս նորա.

3․ եւ զնշանս նորա եւ զգործս նորա` զոր արար ի մէջ Եգիպտոսի, ի փարաւովն արքայ Եգիպտացւոց, եւ յամենայն երկիր նորա:

4․ Եւ զոր ինչ արար ընդ զաւրսն Եգիպտացւոց. զկառս նոցա եւ զերիւարս իւրեանց. որպէ՞ս ծփեաց զջուրս Կարմիր ծովուն ի վերայ երեսաց նոցա, յարձակել նոցա զկնի մեր. կորոյս զնոսա Տէր մինչչեւ ցայսաւր ժամանակի:

5․ եւ զոր ինչ արար ձեզ յանապատին, մինչչեւ եկիք ի տեղիս յայս:

6․ Եւ որ ինչ արար ընդ Դադան եւ ընդ Աբիրովն` ընդ որդիս Եղկաբու որդւոյ Ռովբենի. որոց բացեալ երկրի զբերան իւր եկուլ զնոսա, եւ զտունս նոցա, եւ զվրանս նոցա. եւ զամենայն ինչս նոցա ընդ նոսա ի միջոյ ամենայն Իսրայէղի:

7․ զի ձեր իսկ աչք տեսին զամենայն գործս Տեառն զմեծամեծս զոր արար ընդ ձեզ մինչչեւ ցայսաւր:

8․ Եւ պահեցէք զամենայն պատուիրանս նորա զոր ես պատուիրեմ ձեզ այսաւր. զի կեցցէք եւ բազմապատիկք լինիցիք. եւ մտանիցէք ժառանգիցէք զերկիրն, յոր դուք անցանէք ընդ Յորդանան ժառանգել զնա:

9․ Զի երկայնաւրեայք լինիցիք ի վերայ երկրին զոր երդուաւ Տէր հարցն ձերոց տալ նոցա, եւ զաւակի նոցա յետ նոցա, երկիր` որ բղխէ զկաթն եւ զմեղր:

10․ Քանզի երկիրն յոր մտանելոց էք ժառանգել զնա, ոչ իբրեւ զերկիրն Եգիպտացւոց է` ուստի ելէք դուք անդի. յորժամ սերմանեն սերմանս, եւ ոռոգանեն ոտիւք իբրեւ զպարտէզ բանջարոյ:

11․ Այլ երկիրն յոր մտանելոց էք ժառանգել զնա, երկիր լեռնային եւ դաշտական է. յանձրեւոյ երկնից ըմպէ ջուր.

12․ երկիր` զոր տէր Աստուած քո դարմանէ զնա, հանապազ աչք տեառն Աստուծոյ քո ի վերայ նորա, ի սկզբանէ տարոյն մինչչեւ ցկատարումն տարւոյն:

13․ Եւ եթէ լսելով լուիցես ամենայն պատուիրանաց նորա զոր ես պատուիրեմ քեզ այսաւր, սիրել զտէր Աստուած քո եւ պաշտել զնա յամենայն սրտէ քումմէ, եւ յամենայն անձնէ քումմէ եւ յամենայն զաւրութենէ քումմէ:

14․ Եւ տացէ անձրեւ երկրին քում ի ժամանակին իւրում զկանուխ եւ զանագան. եւ ժողովեսցես զցորեան քո եւ զգինի քո եւ զեւղ քո:

15․ եւ տացէ խոտ յանդս քո անասնոյ քում. եւ կերիցես եւ յագեսցիս:

16․ Հայեցարուք յանձինս ձեր, գուցէ յուլանայցեն սիրտք ձեր եւ յանցանիցէք, եւ պաշտիցէք զաստուածս աւտարս. եւ երկիր պագանիցէք նոցա:

17․ Եւ սրտմտեալ բարկանայցէ Տէր ի վերայ ձեր, եւ արգելուցու զերկինս` եւ չլինիցի անձրեւ, եւ երկիր ոչ տացէ զպտուղ իւր. եւ կորնչիք արագ արագ յերկրէն բարութեան` զոր Տէր ետ ձեզ:

18․ Եւ դիջիք զբանս զայսոսիկ ի սիրտս ձեր, եւ յանձինս ձեր, եւ արկջիք զսոսա նշան ի ձեռս ձեր. եւ եղիցին անշարժ առաջի աչաց ձերոց:

19․ Եւ ուսուսջիք որդւոց ձերոց խաւսել զսոսա ի նստել ի տան, եւ գնալ ի ճանապարհի, ի ննջել եւ ի յառնել:

20․ Եւ գրեսջիք զսոսա ի վերայ Սեմոց տանց ձերոց եւ ի դրունս ձեր:

21․ զի բազմաւրեայք լինիցիք, եւ աւուրք որդւոց ձերոց ի վերայ երկրի` զոր երդուաւ Տէր հարցն ձերոց տալ ձեզ, ըստ աւուրց երկնից ի վերայ երկրի:

22․ Եւ եղիցի եթէ լսելով լուիցէք ամենայն պատուիրանացս այսոցիկ` զոր ես պատուիրեմ ձեզ այսաւր առնել, սիրել զտէր Աստուած. գնալ ի ճանապարհս նորա` եւ յարել ի նա:

23․ Մերժեսցէ Տէր զազգսն զայնոսիկ յերեսաց քոց, եւ ժառանգեսջիք զազգսն մեծամեծս եւ զաւրագոյնս քան զձեզ:

24․ Զամենայն տեղի որ կոխիցեն գնացք ոտից ձերոց` ձեզ լիցի, յանապատէ անտի մինչչեւ ցաներն Լիբանանու. եւ ի գետոյն մեծ գետոյն Եփրատայ մինչչեւ ցծովն արեւմտից եղիցին սահմանք ձեր:

25․ Եւ ոչ ոք դառնայցէ ընդ դէմ ձեր, զահ եւ զերկիղ ձեր արկցէ տէր Աստուած ի վերայ երեսաց ամենայն երկրին զոր կոխիցէք, որպէս խաւսեցաւ ընդ ձեզ Տէր:

26․ Եւ ես ահաւասիկ տամ այսաւր առաջի ձեր աւրհնութիւնս եւ անէծս.

27․ աւրհնութիւնս` էթէ լսիցէք պատուիրանաց տեառն Աստուծոյ ձերոյ` զոր ես պատուիրեմ ձեզ այսաւր:

28․ Եւ անէծս` եթէ ոչ լսիցէք պատուիրանաց տեառն Աստուծոյ ձերոյ, զոր ես պատուիրեմ ձեզ այսաւր. եւ մոլորիցիք ի ճանապարհէն զոր պատուիրեցի ձեզ, երթալ պաշտել զաստուածս աւտարս` զոր ոչ ճանաչիցէք:

29․ Եւ եղիցի յորժամ տարցի զքեզ տէր Աստուած քո յերկիրն յոր անցանես ընդ Յորդանան ժառանգել զնա. եւ տացես դու զաւրհնութիւնս ի լերինն Գարիզին, եւ զանէծս ի լերինն Գեբաղ:

30․ Ոչ ապաքէն այն յայնկոյս Յորդանանու է` յետոյ ճանապարհին արեւմտից յերկրին Քանանացւոց. որոյ նիստն ընդ արեւմուտս է մերձ ի Գողգող, առ կաղնեաւն բարձու:

31․ Եւ դուք անցանէք ընդ Յորդանան ժառանգել զերկիրն` զոր տէր Աստուած տալոց է ձեզ ի ժառանգութիւն զամենայն աւուրս. եւ ժառանգեսջիք զնա` եւ բնակեսջիք ի նմա:

32․ Եւ զգուշասջիք առնել զամենայն հրամանս նորա, եւ զդատաստանս զայսոսիկ զոր ես տամ առաջի ձեր այսաւր: