1․ Եւ ել Մովսէս յԱրաբովթ Մովաբայ, ի լեառնն Նաբաւ, ի կատարն Փասդայ որ է յանդիման Երեքովի. եւ եցոյց նմա Տէր զամենայն երկիր Գաղաադու մինչչեւ ցԴան.
2․ եւ զամենայն երկիրն Նեփթաղիմայ, եւ Մանասէ, եւ զամենայն երկիրն Յուդայ մինչչեւ ցծովն վերջին.
3․ եւ զանապատն, եւ շուրջ զԵրեքովիւ, զքաղաքսն Արմաւենեաց մինչչեւ ցՍեգովր:
4․ Եւ ասէ ցՄովսէս. Այս է երկիրն զոր երդուայ Աբրահամու Սահակա եւ Յակովբա` եւ ասեմ. Զաւակի ձերում տաց զդա. ի ցոյց աչաց քոց, եւ անդր մի մտանիցես:
5․ Եւ վախճանեցաւ Մովսէս ծառայ Տեառն յերկրին Մովաբու ըստ բանին Տեառն:
6․ եւ թաղեցին զնա ի գայի մերձ ի տունն յերկրին Մովաբու Փոգովրա. եւ ոչ ոք գիտաց զգերեզման նորա մինչչեւ ցայսաւր ժամանակի:
7․ Եւ Մովսէս էր ամաց հարիւր եւ քսանից ի վախճանելն իւրում. եւ ոչ վատեցին աչք նորա, եւ ոչ խոշորեցան ծնաւտք նորա:
8․ Լացին որդիքն Իսրայէղի զՄովսէս Յռաբովթ Մովաբ առ Յորդանանու յանդիման Երեքովի աւուրս երեսուն: եւ կատարեցան աւուրք սգոյ լալեացն Մովսէսի:
9․ Եւ Յեսու որդի Նաւեայ` լցաւ հոգւով իմաստութեան. զի եդ Մովսէս զձեռն իւր ի վերայ նորա. եւ հնազանդեցան նմա որդիքն Իսրայէղի, եւ արարին որպէս եւ պատուիրեաց Տէր Մովսէսի:
10․ Եւ ոչ եւս եկաց մարգարէ Իսրայէղի իբրեւ զՄովսէս, զոր ծանեաւ Տէր դէմ յանդիման:
11․ ամենայն նշանաւք եւ արուեստիւք զոր առաքեաց Տէր առնել յերկրին Եգիպտացւոց, ի փարաւովն եւ ի ծառայս նորա, եւ յամենայն երկիր նորա սքանչելիս մեծամեծս.
12․ եւ զձեռն հզաւր եւ զբազուկ բարձր` զոր արար Մովսէս առաջի ամենայն Իսրայէղի:
Հաղորդում կայքում սխալի վերաբերյալ
Տվյալ հատվածում առկա է սխալ: