Գլուխ 8

   
1․ Ամենայն պատուիրանաց զոր ես պատուիրեմ քեզ այսաւր, զգուշ լինիջիք առնելոյ. զի կեցցէք եւ բազմապատիկք լինիցիք, եւ մտանիցէք եւ ժառանգիցէք զերկիրն զոր երդուաւ Տէր հարցն մերոց:

2․ Եւ յիշեսցես զամենայն ճանապարհն զոր ած զքեզ Տէր ընդ անապատն. զի լլկիցէ զքեզ` եւ փորձիցէ զքեզ, եւ ճանաչիցէ թէ զինչ կայցէ ի սրտի քում, էթէ պահեսցես զպատուիրանս նորա եւ էթէ ոչ:

3․ Եւ չարչարեաց զքեզ, եւ սովաբեկ արար զքեզ, եւ կերակրեաց զքեզ մանանաիւ զոր ոչ գիտէիր, եւ ոչ գիտէին հարք քո. զի յայտ արասցէ թէ ոչ հացիւ միայն կեա մարդ, այլ ամենայն բանիւ, որ ելանէ ի բերանւոյ Աստուծոյ` կեցցէ մարդ:

4․ Հանդերձք քո` ոչ մաշեցան ի քէն, եւ ոտք քո ոչ փապարեցան զայն ամս քառասուն:

5․ եւ ծանիցես ի սրտի քում. թէ որպէս այր ոք` որ խրատէ զորդի իւր, այնպէս տէր Աստուած քո խրատեսցէ զքեզ:

6․ Եւ պահեսցես զպատուիրանս տեառն Աստուծոյ քո. գնալ ի ճանապարհս նորա, եւ երկնչել ի նմանէ:

7․ Զի տէր Աստուած քո տարցի զքեզ յերկիրն բարի եւ ի յաղթ. ուր վտակք ջուրց, եւ աղբերք անդնդոց բղխեն ընդ դաշտս եւ ընդ լերինս.

8․ երկիր ցորենւոյ, եւ գինւոյ, այգեաց եւ նռնենեաց. երկիր ձիթենեաց, եղւու եւ մեղու:

9․ երկիր` յորում ոչ աղքատութեամբ ուտես զհաց քո, եւ ոչ կարաւտանայցես իմիք ի նմա: Երկիր` որոյ քարինք իւր երկաթ, եւ ի լերանց նորա հատանիցես պղինձ:

10․ եւ կերիցես եւ յագեսցիս. եւ աւրհնեսցես զտէր Աստուած քո ի վերայ երկրին բարութեան զոր ետ քեզ:

11․ Հայեաց յանձն քո. գուցէ մոռանայցես զտէր Աստուած քո, չպահել զպատուիրանս նորա եւ զիրաւունս նորա եւ զդատաստանս նորա` զոր ես քեզ պատուիրեմ:

12․ Գուցէ յորժամ ուտիցես եւ յագեսցիս, եւ տունս գեղեցիկս շինեսցես, եւ բնակեսցես ի նոսա.

13․ եւ բազմանայցէ արջառ եւ ոչխար քո. եւ յաճախիցէ քեզ արծաթ եւ ոսկի, եւ ամենայն որ ինչ իցէ քո` բազմանայցէ:

14․ հպարտանայցես ի սրտի քում, եւ մոռասցիս զտէր Աստուած քո` որ էհան զքեզ յերկրէն Եգիպտացւոց ի տանէ ծառայութեան.

15․ եւ էած զքեզ ընդ անապատ մեծ եւ ընդ ահագին. ուր աւձն խածանէր, եւ կարիճն. եւ ծարաւ, եւ ոչ գոյր ջուր.

եւ էհան քեզ յապարաժ վիմէն աղբեր ջուրց:

16․ Որ կերակրեաց զքեզ մանանաիւ յանապատին, զոր ոչ գիտէին հարք քո. զի չարչարեսցէ զքեզ, եւ փորձեսցէ զքեզ. եւ բարի արասցէ քեզ ի վախճանի քում:

17․ Մի ասիցես ի սրտի քում, եթէ զաւրութիւն իմ, եւ ուժգնութիւն ձեռին իմոյ արար ինձ զզաւրութիւնն զայն զմեծ.

18․ այլ յիշեսցես զտէր Աստուած քո. զի նա տայ քեզ ուժ առնել զաւրութիւն. եւ հաստատեսցէ զուխտն իւր որպէս երդուաւ հարցն քոց, որպէս եւ այսաւր:

19․ Եւ եղիցի էթէ մոռանալով մոռասցիս զտէր Աստուած քո. եւ երթիցես զհետ աստուածոց աւտարաց, եւ պաշտեսցես զնոսա, եւ երկիր պագանիցես նոցա. Ունիմ ձեզ վկա այսաւր զերկինս եւ զերկիր, զի կորստեամբ կորընչիջիք:

20․ որպէս եւ ազգն զորս Տէր կորուսցէ յերեսաց ձերոց, այնպէս կորնչիջիք. փոխանակ զի ոչ լուարուք ձայնի տեառն Աստուծոյ ձերոյ: