1․ Եւ կատարեաց Մովսէս խաւսել զամենայն բանս զայսոսիկ առ ամենայն որդիսն Իսրայէղի:
2․ Եւ ասէ ցնոսա. Հարիւր եւ քսան ամաց եմ ես այսաւր, ոչ եւս կարեմ մտանել եւ ելանել. քանզի ասաց ցիս Տէր. թէ Ոչ անցանես ընդ Յորդանան:
3․ Տէր Աստուած քո երթայ առաջի երեսաց քոց. նա սատակեսցէ զազգսն զայնոսիկ յերեսաց քոց, եւ ժառանգեսցես զնոսա. եւ Յեսու երթայ առաջի երեսաց քոց` որպէս խաւսեցաւ Տէր:
4․ Եւ արասցէ Տէր ընդ նոսա որպէս արար ընդ երկուս թագաւորսն Ամուրհացւոց որ էին յայնկոյս Յորդանանու, Սեհովն եւ Ովգ, եւ ընդ երկիրն նոցա.
5․ որպէս սատակեցաք զնոսա: Եւ մատնեաց զնոսա Տէր առաջի ձեր. եւ արասջիք ընդ նոսա որպէս պատուիրեցի ձեզ:
6․ Քաջ լեր եւ զաւրացիր, մի երկնչիր եւ մի զանգիտեր, եւ մի զարհուրեսցիս յերեսաց նոցա. զի տէր Աստուած քո ինքնին է որ երթա յառաջագոյն ընդ ձեզ ի միջի ձերում. ոչ թողցէ զքեզ` եւ ոչ ընդ վայր հարկանիցէ:
7․ Եւ կոչեաց Մովսէս զՅեսու` եւ ասէ ցնա առաջի ամենայն Իսրայէղի. Քաջ լեր եւ զաւրացիր. քանզի դու մտանելոց ես առաջի երեսաց ժողովրդեանդ այդորիկ, յերկիրն զոր երդուաւ Տէր հարցն քո ձերոց տալ նոցա. եւ դու ժառանգեցուսցես զնոսա:
8․ եւ Տէր որ երթալոց է ընդ քեզ, ոչ թողցէ զքեզ:
9․ Եւ գրեաց Մովսէս զամենայն բանս աւրինացս այսոցիկ ի մատենի. եւ ետ զայն ցքահանայսն ցորդիսն Ղեւեայ, որ բառնային զտապանակ ուխտին Տեառն, եւ ցծերսն որդւոցն Իսրայէղի:
10․ Եւ պատուիրեաց նոցա Մովսէս յաւուր յայնմիկ եւ ասէ. Յետ եւթն ամի ի ժամանակի տարւոյն թողութեան ի տաւնի տաղաւարահարացն:
11․ ի գումարել ամենայն Իսրայէղի յանդիման լինել առաջի տեառն Աստուծոյ քո, ի տեղւոջն զոր ընդրեսցէ ընթեռնուցուք զաւրէնս զայսոսիկ առաջի Իսրայէղի յականջս նոցա,
12․ եկեղեցուցեալ զժողվուրդն, զարս եւ զկանայս եւ զմանկունս, եւ զեկն որ ի քաղաքս ձեր. զի լուիցեն, եւ ուսցին երկնչել ի տեառնէ Աստուծոյ մերմէ. եւ ուսցին առնել զամենայն պատուիրանս աւրինացս այսոցիկ:
13․ Եւ որդիք նոցա որ ոչ գիտիցին, լուիցեն եւ ուսցին երկնչել ի տեառնէ Աստուծոյ մերմէ զամենայն աւուրս` որչափ եւ կեցցեն նոքա ի վերայ երկրին` յոր դուք անցանելոց էք ընդ Յորդանան ժառանգել զնա:
14․ Եւ ասէ Տէր ցՄովսէս. Ահա մերձեցան աւուրք մահուան քո. կոչեա զՅեսու` եւ կացէք առ դրան խորանին վկայութեան, եւ հրաման տաց նմա: Եւ գնացին Մովսէս եւ Յեսու ի խորանն վկայութեան, եւ կացին առ դրան խորանին վկայութեան:
15․ եւ էջ Տէր սեամբ ամպոյ, եւ եկաց առ դրան խորանին վկայութեան. եւ եկաց սիւն ամպոյն առ դրան խորանին:
16․ Եւ ասէ Տէր ցՄովսէս. Ահաւասիկ դու ննջեսցես ընդ հարս քո. եւ յարուցեալ ժողովուրդդ այդ պոռնկեսցի զհետ աստուածոց աւտարաց երկրին յոր մտանիցէ դա ի նոսա, եւ թողուցուն զիս. եւ ցրիցեն զուխտն իմ զոր ուխտեցի ընդ նոսա:
17․ Եւ բարկացայց դոցա սրտմտութեամբ յաւուր յայնմիկ, եւ լքից զդոսա, եւ դարձուցից զերեսս իմ ի դոցանէ, եւ եղիցին կերակուր թշնամեաց, եւ գտցեն զդոսա չարիք բազումք եւ նեղութիւնք. եւ ատեսցեն յաւուր յայնմիկ. քանզի չէ տէր Աստուած ընդ մեզ, գտին զիս չարիքս այսոքիկ:
18․ Եւ ես դարձուցանելով դարձուցից զերեսս իմ ի նոցանէ յաւուր յայնմիկ. վասն ամենայն չարեացն զոր արարին. զի դարձան յաստուածս աւտարոտիս:
19․ Եւ արդ` գրեցէք զբանս աւրհնութեանս այսորիկ, եւ ուսուսջիք զդոսա որդւոցն Իսրայէղի, եւ արկջիք զդոսա ի բերան նոցա: զի եղիցի ինձ աւրհնութիւնդ այդ ի վկայութիւն ի մէջ որդւոցն Իսրայէղի.
20․ քանզի տարայց զդոսա յերկիրն բարի զոր երդուայ հարցն դոցա, երկիր որ բղխէ զկաթն եւ զմեղր, եւ կերիցեն եւ լցեալ յագեսցին. եւ դառնայցեն յաստուածս աւտարս, եւ պաշտիցեն զնոսա, եւ զայրացուցանիցեն զիս. եւ ցրիցեն զուխտն իմ զոր ուխտեցի նոցա.
21․ եւ ընդ դէմ կացցէ նոցա աւրհնութիւնդ այդ` յանդիման լինել վկայ: եւ մի մոռասցի ի բերանւոյ նոցա. քանզի գիտեմ զչարութիւն նոցա զոր արարին աստ այսաւր, յառաջ քան զտանելն իմ զնոսա եւ երկիրն բարութեան զոր երդուայ հարցն նոցա:
22․ Եւ գրեաց Մովսէս զաւրհնութիւնս զայս յաւուր յայնմիկ, եւ ուսոյց զսա որդւոցն Իսրայէղի:
23․ Եւ պատուիրեաց Մովսէս Յեսուայ որդւոյ Նաւեայ` եւ ասէ. Քաջ լեր` եւ զաւրացիր. զի դու տանելոց ես զորդիսն Իսրայէղի յերկիրն զոր խոստացաւ նոցա Տէր, եւ նա եղիցի ընդ քեզ:
24․ Եւ իբրեւ կատարեաց Մովսէս գրել զբանս աւրինացս այսոցիկ ի մատենի մինչչեւ ի սպառ:
25․ եւ պատուիրեաց ղեւտացւոցն որ կրիցեն զտապանակ ուխտին Տեառն. ասէ.
26․ Առեալ զմատեան աւրինացդ այդոցիկ` դնիցէք ի կողմանի տապանակի ուխտին տեառն Աստուծոյ մերոյ. եւ եղիցի անդ ընդ քեզ ի վկայութիւն:
27․ Զի ես գիտեմ զհեստութիւն քո եւ զխիստ պարանոց քո. զի մինչդեռ ես կենդանի եմ ընդ ձեզ այսաւր,
դառնացուցիչ էք տեռնակողմանն, ո՞րպէս ոչ ապաքէն յետ մահուանն իմոյ:
28․ Արդ` ժողովեցէք առ իս զցեղապետս եւ զծերս ձեր. զի խաւսեցայց յականջս ձեր եւ նոցա զամենայն բանս զայսոսիկ. եւ կալայց ձեզ վկայ զերկինս եւ զերկիր:
29․ Քանզի գիտեմ թէ յետ վախճանի իմոյ անաւրինելով անաւրինիցիք, եւ խոտորիցիք ի ճանապարհէն զոր պատուիրեցի ձեզ. եւ պատահեսցեն ձեզ չարիքն ի վախճանի աւուրց: քանզի առնիցէք չար առաջի Տեառն, բարկացուցանել զնա գործովք ձեռաց ձերոց:
30․ Եւ խաւսեցաւ Մովսէս յականջս ամենայն եկեղեցւոյն Իսրայէղի զբանս աւրհնութեանս այսորիկ մինչչեւ ի սպառ:
Հաղորդում կայքում սխալի վերաբերյալ
Տվյալ հատվածում առկա է սխալ: