Գլուխ 10

   
1. Որդի իմաստուն` ուրախ առնէ զհայր. որդի անմիտ` տրտմութիւն է մաւր:

2. Ոչ աւգնեսցեն գանձք` անաւրինաց. այլ արդարութիւն փրկէ ի մահուանէ:

3. Ոչ սովամահ առնէ Տէր զանձն արդարոյ. եւ զկեանս ամպարշտաց կործանեսցէ:

4. Տնանկութիւն զայր խոնարհեցուցանէ ձեռք ժրաց` մեծացուցանեն:

5. Որդի խրատեալ` իմաստուն լիցի: եւ զանմիտն ի ծառայութեան վարեսցէ. Ապրեցաւ ի խորշակէ որդի իմաստուն. խորշակահար լինի ամարանի որդի անաւրէն:

6. Աւրհնութիւն Տեառն ի գլուխս արդարոց. զբերանս ամպարշտաց ծածկեսցէ սուգ տարաժամ:

7. Յիշատակ արդարոյ գովութեամբ. անուն ամպարշտաց շիջցի:

8. Սիրտ իմաստուն ընկալցի զպատուիրանս. եւ ցոփն շրթամբք գայթագղելով կործանեսցի:

9. Որ գնայ իմաստութեամբ` գնայ յուսով. իսկ որ թիւրէ զճանապարհս իւր` յայտնի լիցի:

10. Որ ակնարկէ ակամբ նենգութեամբ` ժողովէ արանց զտրտմութիւն. որ յանդիմանէ համարձակութեամբ` առնէ զխաղաղութիւն:

11. Աղբեւր կենաց յԱստուծոյ ի ձեռին արդարոյ. զբերան ամպարշտաց ծածկեսցէ կորուստ:

12. Զատելութիւն գրգռէ հակառակութիւն, եւ զամենեսին որ ոչ հակառակին ծածկէ սէր:

13. Որ ի շրթանց բղխէ զիմաստութիւն. իբրեւ գաւազանաւ հարկանէ զայր անմիտ:

14. Իմաստունք ծածկեսցեն զիմաստութիւն. բերան յանդգնելոյ մերձ է ի բեկումն:

15. Ստացուածք մեծատանց` քաղաք ամուր. բեկումն ամպարշտաց` աղքատութիւն:

16. Գործք արդարոց կեանս առնեն. եւ պտուղք ամպարշտաց մեղս:

17. զճանապարհս կենաց պահէ Տէր: Խրատ առանց յանդիմանութեան` մոլար է:

18. Ծածկեն զթշնամութիւն շրթունք արդարք. իսկ որ ի վեր հանեն զբամբասանս` անզգամք են:

19. Ի շատխաւսութենէ ոչ ապրեսցիս ի մեղաց: թէ  խնայես ի շրթունս` իմաստուն լինիս:

20. Արծաթ ընտիր է լեզու արդարոյ. սիրտ ամպարշտի նուաղեսցի:

21. Շրթունք արդարոց ճանաչեն զբարձունս. եւ անզգամք ի կարաւտութեան սատակեսցին:

22. Աւրհնութիւն Տեառն ի գլուխս արդարոց. եւ նոյն մեծացուցանէ, եւ ոչ եւս յաւելու տրտմութիւն ի սիրտ նորա:

23. Ծիծաղելով գործէ անզգամ զչար. իսկ իմաստութիւն առն նիւթէ զհանճար:

24. Ըստ կորստեան շրջի ամպարիշտ. ցանկութիւն արդարոց` ընդունելի է:

25. Յանցանել մրրկի` եղծանի ամպարիշտն. իսկ արդարոյն խոյս տուեալ` կեցցէ յաւիտեան:

26. Որպէս ազոխ` ատամանց վնասակար է` եւ ծուխ աչաց, նոյնպէս եւ անաւրէնութիւնք որոց վարին նովաւ:

27. Երկեւղ Տեառն յաւելու յաւուրս. ամք ամպարշտաց նուաղեսցին:

28. Յերկարի արդարոց ուրախութիւն. յոյս ամպարշտաց կորիցէ:

29. Ամրութիւն սրբոց երկեւղ Տեառն. եւ բեկումն այնոցիկ ոյք գործեն զչարիս:

30. Արդար` յաւիտեան ոչ դողասցէ. ամպարիշտք մի բնակեսցեն յերկրի:

31. Բերան արդարոյ բղխէ զիմաստութիւն, լեզու անիրաւի սատակեսցի:

32. Շրթունք արանց արդարոց բղխեսցեն զշնորհս. բերան ամբարշտաց կործանեսցի: