1. Փախուցեալ է ամպարիշտն առանց ուրուք հալածելոյ. իսկ արդարն` իբրեւ զառեւծ յանձն ապաստան է:
2. Վասն մեղաց ամպարշտաց դատաստանք յուզին. եւ այր խորագէտ շիջուցանէ զնա:
3. Հզաւրն առ ամպարշտութեան իւրում զրպարտէ զտնանկս: Որպէս անձրեւ սաստիկ եւ անշահ. նոյնպէս եւ որ թողուն զաւրէնս, եւ գովեն զանաւրէնութիւն: իսկ որ սիրեն զաւրէնս` պատեն զինքեամբ պարիսպ:
5. Արք չարք ոչ առնուն ի միտ զիրաւունս. իսկ որ խնդրեն զՏէր` խելամուտ լիցին ամենայնի:
6. Լաւ է աղքատ` որ գնայ ճշմարտութեամբ, քան զմեծատուն սուտ:
7. Պահէ զաւրէնս որդի իմաստուն. իսկ որ արածէ զորկորստութիւն` անարգէ զհայր իւր:
8. Որ լնու զտուն իւր ի տոկոսեաց եւ ի վաշխից, ժողովէ այնմիկ որ ողորմի աղքատաց:
9. Որ խոտորեցուցանէ զունկն իւր` չլսէ աւրինաց. եւ ինքն զիւր ուխտս պղծէ:
10. Որ մոլորեցուցանէ զուղիղս չար ճանապարհաւ, ինքն անկցի յապականութիւն: Անբիծք բաժանեսցեն զբարութիւնս. եւ անաւրէնք անցցեն առ բարութեամբք, եւ մի մտցեն ի նոսա:
11. Իմաստուն թուի անձին իւրում այր մեծատուն. եւ աղքատ հանճարեղ ստգտանէ զնա:
12.Վասն աւգնականութեան արդարոց` բազում լինին փառք, եւ ի տեղիս ամպարշտաց` սատակին մարդիկ:
13. Որ ծածկէ զամպարշտութիւնն իւր` ոչ յաջողեսցի. իսկ որ ի վեր հանէ եւ յանդիմանէ` սիրելի լիցի:
14. Երանի իցէ առն որ արհամարհիցէ զամենայն վասն երկիւղածութեան. իսկ խիստն սրտիւ, անկցի ի չարիս:
15. Առեւծ քաղցեալ եւ գայլ ծարաւի. որ աղքատ է` եւ բուռն լինիցի ազգի տնանկի:
16. Թագաւոր կարաւտ մտաւք` մեծ զրպարտաւղ. իսկ որ ատեայ զանիրաւութիւն` երկայնակեաց լիցի:
17. Այր որ զմահապարտ յերաշխի առնու, փախստական լինի եւ ոչ ի հաստատութեան: Խրատեա զորդի քո, եւ հանգուսցէ զքեզ, եւ տացէ զարդ անձին քում. եւ ոչ հնազանդի ընդ ազգի անաւրինի:
18. Որ գնայ արդարութեամբ` գտցէ աւգնականութիւն. իսկ որ ելանէ ի թեւր ճանապարհ` նովին վարակեսցի:
19. Որ գործէ զերկիր իւր` լցցի հացիւ. եւ որ զհետ երթայ դատարկութեան` լցցի տնանկութեամբ:
20. Այր հաւատարիմ աւրհնեսցի յոյժ. եւ չարագործն ի պատուհասէ մի ապրեսցի: Որ ոչ պատկառէ յերեսաց արդարոց` չէ գովելի:
21. Որ ակն ածէ զերեսս անաւրինաց յանդիմանել` չէ բարւոք: այնպիսին պատառոյ հացի վաճառէ զմարդ:
22.Փութայ մեծանալ այր չարակն, եւ ոչ գիտէ` թէ ողորմածն յաղթէ նմա:
23. Որ յանդիմանէ զայր ի ճանապարհս իւր, շնորհակալութիւն գտանէ քան զսուտակասպասն լեզուաւ:
24. Որ մերժէ զհայր կամ զմայր` եւ համարիցի չմեղանչել, կցորդ է նա արանց ամպարշտաց:
25. Այր ագահ գրգռէ զհակառակութիւն. իսկ որ յուսացեալ է ի Տէր` ընդ խնամով կեցցէ:
26. Որ յուսացեալ է ի յանդգնութիւն սրտի` նա անզգամ է. իսկ որ գնայ իմաստութեամբ` ապրեսցի:
27. Որ տայ աղքատաց` ոչ կարաւտասցի. իսկ որ դարձուցանէ զակն իւր ի նոցանէ` ի բազում կարաւտութեան եղիցի:
28. Ի տեղիս ամպարշտաց հեծեն արդարք. բայց ի նոցա կորստեան բազմանան արդարք:
Հաղորդում կայքում սխալի վերաբերյալ
Տվյալ հատվածում առկա է սխալ: