1. Զայս ասէ այր ցհաւատացեալս Աստուծոյ. եթէ լուռ եղէց` զի անմտագոյն եմ քան զամենայն մարդիկ.
2. եւ իմաստութիւն մարդոյ ոչ գոյ յիս:
3. Աստուած ուսոյց ինձ իմաստութիւն. եւ գիտութեան սրբոց խելամուտ եղէ, եւ ճանաչեմ զսրբութիւնս:
4. Ո՞վ ել յերկինս` եւ էջ. ո՞վ ժողովեաց զհողմս ի գոգ իւր. ո՞վ ամփոփեաց զջուրս ի ձորձս իւր. ո՞վ կալաւ զծագս երկրի: Զի՞նչ անուն է նորա. կամ զի՞նչ անուն որդւոյ նորա. զի գիտասցես
5. թէ ամենայն բանք Աստուծոյ ընտրեալք են, եւ վերակացու է նա երկւղածաց իւրոց:
6. Մի յաւելուցուս ի բանս նորա` զի մի յանդիմանեսցէ զքեզ, եւ սուտ լինիցիս:
7.Երկուս ինչս խնդրեմ ի քէն, մի հաներ յինէն զշնորհս մինչչեւ մեռեալ իցեմ:
8.Զբան զուր եւ սուտ` հեռի արա յինէն: Մեծութիւն եւ տնանկութիւն մի տար ինձ. այլ կշռեա ինձ զարժանն բաւականութեամբ:
9. Զի մի մեծացայց` եւ ստեցից. եւ ասիցեմ, թէ ո՞վ տեսանիցէ զիս. կամ աղքատացայց եւ գողացայց, եւ երդուայց յանուն Աստուծոյ իմոյ:
10. Մի մատներ զծառայ ի ձեռս տեառն իւրոյ. զի մի երբէք անիծանիցէ զքեզ` եւ ապականիցիս:
11. Ծնունդ չար` զհայր իւր անիծանէ, եւ զմայր իւր ոչ աւրհնէ:
12. Ծնունդ չար` առ արդարս ունի զանձն իւր. եւ զելս անձին իւրոյ ոչ լուացաւ:
13. Ծնունդ չար` ամբարտաւան աչս ունի. եւ յարտեւանունս իւր հպարտանայ:
14. Ծնունդ չար` իբրեւ զսուսեր ունի զատամունս իւր. եւ զժանիս իւր իբրեւ զկտրոցս: մաշել եւ ուտել զխոնարհս երկրի, եւ զտնանկս ի մարդկանէ:
15. Տզրկի` երեք դստերք էին սիրով սիրեցեալք, եւ երեքին սոքա` ոչ յագեցուցին զնա. եւ չորրորդն ոչ լցաւ ասել շատ:
16. Դժոխք` եւ կորուստ` եւ սէր կանանց` եւ տարտարոսն. եւ երկիր` ոչ յագի ջրով, եւ ջուր եւ հուր` ոչ երբէք ասեն շատ:
17.Ակն որ արհամարհէ զհայր, եւ անարգէ զծերութիւն մաւր. խլեսցեն զնա ագռաւք ձորոց. եւ գէշ գէշ արասցեն զնա ձագք արծուեաց:
18.Երեք են` զորս անհնար է ինձ իմանալ, եւ զչորրորդն ոչ ճանաչեմ:
19.Զհետս արծուոյ թռուցելոյ. եւ զճանապարհս աւձի ի վերայ վիմի. եւ զշաւիղս նաւի ընդ ծով գնացելոյ. եւ զճանապահս առն երիտասարդի:
20.Նոյնպիսի եւ ճանապարհ կնոջ շնացողի. զի յորժամ գործէ ինչ` լուանայ եւ ասէ, իմ չիք ինչ գործեալ:
21.Երիւք շարժի երկիր, եւ չորրորդին ոչ կարէ հանդարտել:
22.Եթէ ծառայ թագաւորեսցէ. եւ անմիտն` եթէ յագեսցի հացիւ.
23. եւ աղախին` եթէ հանէ զտիկին իւր. եւ կին ատելի` եթէ դիպեսցի առն բարւոյ:
24.Չորք են որ փոքր են յերկրի. եւ նոքա իմաստնագոյնք են քան զիմաստունս:
25. Մրջիւն` որոյ ոչ գոյ զաւրութիւն, եւ պատրաստէ ամարայնոյ զկերակուր իւր:
26.Եւ ճագար` ազգ անհզաւր, որ արարին ի վէմս զդադարս իւրեանց:
27. Առանց թագաւորի է մարախ, եւ զաւրաժողով լինի իբրեւ ի միոջէ հրամանէ աւրինաւք:
28.Եւ սարդ` կռուեալ ձեռաւք յորմ, որ դիւրին է առ որսալ, բնակէ ի յարկս թագաւորաց:
29.Երեք են որ պարծ շրջին, եւ չորրորդն գեղեցիկ ճեմի:
30. Կորիւն առիւծու հզաւր է քան զանասունս, որ ոչ զանգիտէ եւ ոչ թիկունս դարձուցանէ յանասնոց:
31. եւ աքաղաղ` որ շրջի ի մէջ մարեաց սիգալով: եւ նոխազ` առաջնորդ հաւտի: եւ թագաւոր` որ հպարտախաւս լինի ի մէջ ազգաց:
32. Եթէ զանձն դիւրութեան տացես, եւ ձեռն ի բերան կռուով ձգիցես` անարգեսցիս:
33. Կթեա կաթն` եւ եղիցի եւղ. ապա թէ կարի ճմլեսցես զպըտկունսն, ելանէ արիւն: Եւ եթէ ձգեսցես զբանս, ելցեն դատաստանք եւ կռիւք:
Հաղորդում կայքում սխալի վերաբերյալ
Տվյալ հատվածում առկա է սխալ: