Գլուխ 1

   
1․ Զբանն առաջին զոր արարի վասն ամենայնի, ո՜ Թէոփիլէ. զոր սկսաւ Յիսուս առնե՛լ եւ ուսուցանե՛լ.

2. մինչեւ յաւրն պատուիրելոյ առաքելոցն ի ձեռն Հոգւոյն Սրբոյ, զորս ընտրեացն, եւ վերացա՛ւ:

3. Որոց յանդիմա՛ն կացոյց զինքն կենդանի՛ յետ չարչարանացն իւրոց, ի բազում արուեստս, յաւուրս քառասուն երեւել նոցա՝ եւ ասել վասն արքայութեանն Աստուծոյ:

4. Եւ ի հաղորդել ընդ նոսա հացիւ, պատուէր տայր նոցա՝ յԵրուսաղէմէ մի՛ մեկնել, այլ սպասե՛լ աւետեացն Հաւր՝ զոր լուարուքն յինէն:

5. Զի Յովհաննէս մկրտեա՛ց ի ջուր. այլ դուք մկրտիցիք ի Հոգի՛ն Սուրբ, ո՛չ յետ բազում ինչ աւուրցս այսոցիկ:

6. Եւ նոքա մատուցեալ հարցանէի՛ն զնա՝ եւ ասէին. Տէ՛ր՝ եթէ ի ժամանակի՞ աստ յայսմիկ հասուցանելոց իցես զարքայութիւնն Իսրայէլի:

7. Ասէ՛ ցնոսա. Ո՛չ է ձեզ գիտել զժամս եւ զժամանակս, զոր Հայր եդ յիւրո՛ւմ իշխանութեան:

8. Այլ առջիք զաւրութիւն ի հասանել Հոգւոյն Սրբոյ ի վերայ ձեր. եւ եղիջիք ինձ վկա՛յք յԵրուսաղէմ, եւ յամենայն Հրէաստանի, եւ ի Սամարիա՛յ, եւ մինչեւ ի ծագս երկրի:

9. Եւ զայս իբրեւ ասաց՝ մինչդեռ հայէին նոքա՝ վերացա՛ւ. եւ ամպն կալա՛ւ զնա յաչաց նոցա:

10. Եւ մինչդեռ պշուցեալ հայէին ընդ երկինս երթալոյ նորա, եւ ահաւասիկ արք երկու երեւեցա՛ն նոցա ի հանդերձս սպիտակս,

11. որք եւ ասացինն. Ա՛րք գալիլեացիք՝ զի՞ կայք հայեցեալ ընդ երկինս. Այս Յիսուս՝ որ վերացաւն ի ձէնջ յերկինս, սոյնպէս եկեսցէ՛ զորաւրինակ տեսէք զնա երթեալ յերկինս:

12. Ապա դարձա՛ն յԵրուսաղէմ յանուանեալ լեռնէն Ձիթենեաց. որ է մե՛րձ յԵրուսաղէմ ըստ շաբաթո՛ւն ճանապարհի:

13. Եւ իբրեւ մտին՝ ելին ի վերնատունն ուր վա՛նքն իսկ էին. Պե՛տրոս, եւ Յա՛կովբոս, եւ Յովհաննէս, եւ Անդրէ՛աս, Փիլի՛պպոս, եւ Թո՛վմաս, Բարթողոմէ՛ոս, եւ Մատթէ՛ոս, Յա՛կովբոս Ալփեան, եւ Շմաւոն նախանձայոյզ, եւ Յո՛ւդա Յակովբեան:

14. Սոքա ամենեքեան էին հանապազորդեա՛լ միաբան յաղաւթս հանդերձ կանամբք, եւ Մարեմաւ մա՛րբն Յիսուսի՝ եւ եղբարբք նորա:

15. Բ. Եւ յաւուրսն յայնոսիկ յարուցեալ Պետրոս ի մէջ եղբարցն՝ ասէ. եւ էր անդ բազմութիւն անուանց իբրեւ հարեւր եւ քսանից:

16. Ա՛րք եղբարք՝ պարտ էր կատարե՛լ գրոյն. զոր յառաջագոյն ասա՛ց Հոգին Սուրբ ի բերանոյ Դաւթի, վասն Յուդայի՝ որ եղեւ առաջնո՛րդ ունելեացն Յիսուսի.

17. զի ի թիւս մեր է՛ր ընդ մեզ, եւ հասեա՛լ էր նմա վիճա՛կ պաշտամանս այսորիկ:

18. Սա՝ ստացաւ գեաւղ ի վարձո՛ւց անիրաւութեան. եւ ուռուցեալ հերձա՛ւ ընդ մէջ՝ եւ հեղա՛ւ ամենայն փոր նորա:

19. Եւ յայտնի՛ եղեւ ամենեցուն որ բնակեալ են յԵրուսաղէմ. մինչեւ կոչե՛լ գեաւղջն այնմիկ բարբառովն իւրեանց Ակեղդամա. ա՛յսինքն է՝ գեաւղ արեան:

20. Զի գրեա՛լ է ի գիրս Սաղմոսաց. Եղիցի բնակութիւն նորա աւերակ, եւ մի՛ ոք իցէ որ բնակիցէ ի նմա. եւ զկա՛րգ նորա առցէ ա՛յլ:

21. Արդ՝ պա՛րտ է յարանցս յայսցանէ եկելոցս ընդ մեզ յամենայն ժամանակի, յորում մո՛ւտ եւ ե՛լ առ մեզ Տէր Յիսուս.

22. սկսեալ ի մկրտութենէն Յովհաննու մինչեւ յաւրն՝ յորում վերացաւ ի մէնջ, վկա՛յ յարութեան նորա ընդ մեզ լինել միում ի սոցանէ:

23. Եւ կացուցին երկո՛ւս. զՅովսէփ՝ որում Բարսաբա՛յն կոչէին, որ անուանեցաւն Յուստո՛ս. եւ զՄատաթեա՛յ:

24. Եւ կացեալ յաղաւթս՝ ասեն. Դո՛ւ Տէր՝ սրտագէ՛տ ամենայնի՝ յայտնեա՛ զմի ոք զոր ընտրեցեր ի սոցանէ յերկոցունց,

25. առնուլ զվիճակ պաշտամա՛նս այսորիկ՝ եւ զառաքելութեան, յորմէ անկա՛ւ Յուդաս գնա՛լ ի տեղի իւր:

26. Եւ ետուն վիճակս նոցա, եւ ելանէր վիճակն Մատաթեայ: Եւ համարեցա՛ւ ընդ մետասան առաքեալսն: