Գլուխ 6

   
1. Որդեակ` եթէ լինիցիս երաշխաւոր բարեկամի քում, մատնեցեր զանձն քո թշնամւոյ:

2. Զի որոգայթ բուռն են առն շրթունք իւր, եւ ըմբռնի բանիւ բերանոյ իւրոյ:

3. Արդ` արա որդեակ զորինչ ես պատուիրեմ քեզ` եւ կեցցես. զի անկար ի ձեռս չարաց վասն բարեկամի քոյ: Արդ պնդեա եւ մի լքանիր. յորդորեա եւ զբարեկամն զոր առեր յերաշխի:

4. Մի տար քուն աչաց, եւ մի նինջ արտեւանաց քոց:

5. Զի ապրեսցիս որպէս զայծեամն ի հաղբից, եւ իբրեւ զհաւ ի ծուղակաց:

6. Երթ առ մրջիւն ով վատ, եւ նախանձեա ընդ ճանապարհս նորա. եւ լեր իմաստնագոյն եւս քան զնա:

7. Զի նորա ոչ գոյ հողագործութիւն, եւ ոչ հարկադիր, եւ ոչ ընդ տերամբք է:

8. Եւ պատրաստէ ամարանի զկերակուր, եւ բազում համբարս դնէ ի հունձս: Կամ երթ առ մեղուն եւ ուսիր` զիա՞րդ գործաւն է. եւ գործ նորա որպէս պարկեշտութեամբ գործի. զորոյ զվաստակն թագաւորք եւ տնանկք ի բժշկութիւն մատուցանեն: Ցանկալի է ամենեցուն եւ մեծարոյ. զի թէպէտ տկար է զաւրութեամբ, պատուեաց զիմաստութիւն` եւ յարգեցաւ:

9. Մինչչեւ յե՞րբ յորսայսեալ կաս ով վատ, կամ ե՞րբ ի քնոյ զարթիցես:

10. Փոքր մի ննջիցե՞ս. փոքր մի նստիցի՞ս. փոքր մի նիրհիցե՞ս. փոքր մի հանգուցանիցե՞ս զձեռն քո ի վերայ լանջաց:

11. Ապա հասանիցէ ի վերայ քո իբրեւ զչար ուղեւոր տնանկութիւն, եւ կարաւտութիւն իբրեւ զժիր սուրհանդակ: Ապա թէ անդանդաղ լինիցիս, հասանիցէ իբրեւ զաղբեւր ամառն քո, եւ կարաւտութիւն իբրեւ այր մի չար ինքնահալած:

12. Այր անաւրէն եւ անզգամ գնայ զճանապարհս թեւրս:

13. Քանզի նոյն ինքն ակնարկէ ակամբ, եւ նշանակէ ոտամբ, եւ ուսուցանէ նշանացի մատամբք:

14. Սիրտ խոտորեալ նիւթէ զչարիս. յամենայն ժամանակի այնպիսին խռովութիւնս առնէ քաղաքի:

15. Վասն այնորիկ յանկարծակի հասցէ նմա կորուստ իւր. հաշումն` եւ մաշումն առանց բժշկութեան:

16. Զի խնդայ ընդ ամենայն զոր ատեայ Տէր. եւ խորտակի վասն պղծութեան անձին իւրոյ:

17. Աչք թշնամանողի` լեզու անիրաւ, ձեռք` որ հեղուն զարիւն արդար:

18. Սիրտ` որ նիւթէ զխորհուրդս չարութեան: ոտք` որ փութան գործել զչարիս, սատակեսցին:

19. Բորբոքէ զստութիւն վկայ անիրաւ, եւ արկանէ գրգռութիւն ի մէջ եղբարց:

20. Որդեակ` պահեա զաւրէնս հաւր քոյ, եւ մի մերժեր զխրատ մաւր քոյ:

21. Ընկալ զնոսա յանձին եւ ի գլուխ քո հանապազ. եւ արկ իբրեւ մանեակ ի պարանոց քո.

22. Յորժամ շրջիցիս` ընդ քեզ տարջիր, եւ ընդ քեզ եղիցի. յորժամ ննջիցես` պահեսցէ զքեզ. եւ յորժամ յառնիցես` խաւսակից իցէ քեզ:

23. Զի ճրագ է պատուիրան աւրինացն` եւ լոյս, եւ ճանապարհ կենաց` յանդիմանութիւն եւ խրատ:

24. Պահել զքեզ յառնակին կնոջէ. եւ ի չարախաւսութենէ աւտար լեզուէ:

25. Որդեակ` մի յաղթեսցէ քեզ ցանկութիւն գեղոյ. եւ մի ըմբռնիցիս աչաւք քովք. եւ մի յափշտակիցիս արտեւանամբք նորա:

26. Զի գինք կնոջ պոռնկի` որչափ նկանակի միոջ հացի: քանզի կին չար` զարանց պատուականաց զհոգիս որսայ:

27. Ծրարիցէ՞ ոք հուր ի գոգ` եւ զհանդերձսն ոչ այրիցէ:

28. Կամ գնայցէ՞ ոք ի վերայ կայծականց հրոյ, եւ զոտս իւր ոչ խարշիցէ:

29. Նոյնպէս եւ որ մտանէ առ առնակին` առանց պատժի ոչ լիցի: եւ ոչ արդարասցի ամենայն որ մերձենայ առ նա:

30. Ոչինչ են զարմանք եթէ ըմբռնեսցի ոք ի գողութեան. գողանայ` զի լցուսցէ զանձն իւր քաղցեալ:

31. ապա թէ ըմբռնեսցի, եւթնպատիկ տուժեսցի. եւ զամենայն ինչս իւր տուեալ ապրեցուցանէ զանձն:

32. Իսկ որ շնայն` առ պակասութեան մտաց, կորուստ անձին իւրում ստանայ:

33. Ցաւս եւ անարգանս կրէ. եւ նախատինք նորա մի կորիցեն յաւիտեան:

34. Լի է նախանձու սրտմտութիւն առն նորա. եւ ոչ խնայեսցէ յաւուր դատաստանի:

35. Ոչ փոխանակեսցէ եւ ոչ ընդ միոյ իրիք փրկանաց զթշնամութիւն. եւ ոչ վճարիցի բազում կաշառաւք