1. Իմաստուն կանայք` շինեցին տունս. իսկ անզգամքն ձեռաւք իւրեանց կործանեցին:
2. Որ գնայ ուղիղ` երկնչի ի Տեառնէ. եւ որ կամակորի ի ճանապարհս իւր` անարգեսցի:
3. Ի բերանոյ անզգամաց` գաւազան թշնամանաց. շրթունք իմաստնոց զգոյշ լինիցին նոցա:
4. Ուր ոչ գոն եզինք` մսուրք սուրբ են. եւ ուր բազում արդիւնք են, յայտնի է եզին զաւրութիւն:
5. Վկայ հաւատարիմ` ոչ ստէ. բորբոքէ զստութիւն` վկայ անիրաւ:
6. Խնդրեսցես զիմաստութիւն առ ի չարաց` եւ ոչ գտցես. եւ զհանճար առ յիմաստնոց` դիւրաւ:
7.Ամենայն ինչ հակառակ է անզգամի. զէն հանճարոյ շրթունք իմաստունք:
8. Իմաստութիւն խորագիտաց` ծանիցէ զճանապարհս նոցա. անմտութիւն անզգամաց` մոլորութեամբ:
9. Տունք անաւրինաց պարտաւորեսցին ի սրբութենէ. տունք արդարոց` ընդունելի են նմա:
10. Սիրտ առն ընդմտատարի` տրտմութիւն է անձին իւրոյ. եւ յորժամ ուրախ լինի` չխառնի ընդ թշնամանս:
11. Տունք ամպարշտաց` կործանեսցին. յարկք արդարոց` հաստատեսցին:
12. Են ճանապարհք որ թուին մարդկան թէ ուղիղ իցեն. բայց կատարած նոցա երթայ յատակս դժոխոց:
13. Ընդ ուրախութիւնս` ոչ խառնի տրտմութիւն. բայց յետոյ ուրախութիւն ի սուգ գայ:
14. Յիւրոց ճանապարհաց յագեսցի խստասիրտն. եւ ի խորհրդոց իւրոց ուղղեսցի այր բարերար:
15. Անմեղն հաւատայ ամենայն բանի. իսկ խորագէտն գայ ի զղջումն:
16. Իմաստունն զարհուրեալ` խոտորեցաւ ի չարէ. իսկ անզգամն յանձնապաստան խառնակի ընդ անաւրինին:
17. Բարկասիրտ` գործէ առանց խորհրդոյ. եւ այր իմաստուն` յոյժ համբերէ:
18. Բաժանին ամպարիշտք ի չարիս. իսկ խորագէտք զաւրանան իմաստութեամբ:
19. Գայթագղեսցին չարք առաջի բարեաց. եւ ամպարիշտք կողկողեսցին առ դրունս արդարոց:
20. Բարեկամք ատեսցեն զբարեկամս աղքատս. բարեկամք մեծատանց բազումք:
21. Որ անարգէ զտնանկն` մեղանչէ. եւ որ ողորմի աղքատի` երանելի է:
22. Մոլորեալք նիւթեն զչարիս. զողորմութիւն եւ զճշմարտութիւն` նիւթեն բարիք: Ոչ գիտեն զողորմութիւն եւ զհաւատ` նիւթաւղք չարեաց, ողորմութիւն եւ հաւատք առ նիւթաւղս բարեաց:
23. Ամենայնի որ հոգայ` մի ինչ աւելի է իմաստութիւն. իսկ անձնդիւրն եւ անհոգն` ի կարաւտութեան եղիցի:
24. Պսակ իմաստնոց` խորագիտութիւն. եւ գնացք անմտաց` չարութիւն:
25. Փրկէ զանձն` վկայ հաւատարիմ. եւ բորբոքէ ստութեամբ նենգաւորն:
26. Յերկեւղ Տեառն` յոյս զաւրութեան. եւ որդւոց իւրոց թողու զհաստատութիւն խաղաղութեան:
27. Հրաման Տեառն աղբեւր կենաց. եւ առնէ խոտորել յորոգայթից մահու:
28. Ի բազում զաւրս` փառք թագաւորի. ի նուազել ժողովրդոց` բեկումն հզաւրաց:
29. Այր երկայնամիտ` բազմապատիկ է խորհրդովք. իսկ կարճամիտն` յոյժ անմիտ է:
30. Այր հեզ` բժիշկ է սրտի. ցեց ոսկերաց սիրտ հոգած:
31. Որ զրպարտէ զտնանկն` բարկացուցանէ զարարիչ նորա, եւ որ պատուէ զնա` ողորմի աղքատի:
32. Չարեաւք իւրովք մերժի ամպարիշտն, եւ որ յուսայ յանձին սրբութիւն` արդար է:
33. Ի սիրտ առատ հանգչի իմաստութիւն. եւ ի սիրտ անմտաց ոչ ծանիցի:
34. Արդարութիւն զազգ բարձրացուցանէ. նուազեցուցանեն զազգս մեղք:
35. Ընդունելի է թագաւորի սպասաւոր իմաստուն. եւ իւրով շութափութեամբ թաւթափէ զանարգանս: Բարկութիւն կորուսանէ զիմաստունս:
Հաղորդում կայքում սխալի վերաբերյալ
Տվյալ հատվածում առկա է սխալ: