Գլուխ 21

   
1. Որպէս սահանք ջրոց. նոյնպէս սիրտ թագաւորի ի ձեռս Աստուծոյ. ընդ որ կոյս կամի հայեցուցանել` դարձուսցէ զնա:

2. Ամենայն այր երեւի անձին իւրում արդար. բայց ուղղէ զսիրտս Տէր:

3. Գործել զարդարութիւն եւ խաւսել զճշմարտութիւն, հաճոյ է առաջի Տեառն քան զարիւն զոհից:

4. Մեծամիտ է ի թշնամանս այր խստասիրտ. լամպար ամպարշտաց` մեղք:

5. Խորհուրդ համառաւտ` սակայն յառաւելութիւն. եւ ամենայն վաղվաղուկ` սակայն ի նուազութիւն:

6. Որ կուտէ զգանձս ստութեամբ լեզուի` զհետ երթայ սնոտեաց. եւ հասանէ յորոգայթս մահու:

7. Սատակումն ամպարշտաց հասցէ, զի ոչ կամին առնել զիրաւունս:

8. Առ խոտորեալս` խոտորեալ ճանապարհ առաքէ Աստուած. զի սուրբ եւ ուղիղ են գործք նորա:

9. Լաւ է բնակել առ անկեան ի ներքոյ աւդոյ, քան ի բռեալս անիրաւութեամբ, եւ ի տան խառնակութեան:

10. Անձն ամպարշտի ցանկայ չարեաց. եւ ոչ գտցէ յումեքէ ողորմութիւն:

11. Ի տուժել անխրատի` խորագիտագոյն եւս լինի անմեղն: առ իմաստութեան հանճարեղն ընդունի զգիտութիւն:

12. Ի միտ առնու արդար զսիրտ ամպարշտաց. եւ ապականեն զամպարիշտս չարիք:

13. Որ խնու զլսելիս իւր զի մի լուիցէ տկարաց. եւ նա կարդասցէ առ Տէր. եւ ոչ լուիցէ նմա:

14. Տուրք գաղտնիք` դարձուցանեն զբարկութիւն. իսկ որ խնայէ ի տուրս` սաստիկ բարկութիւն յարուցանէ:

15. Ուրախութիւն արդարոց առնել զիրաւունս. եւ սուրբն` պիղծ թուի չարագործաց:

16. Այր մոլորեալ ի ճանապարհէ արդարութեան` ի ժողովս հսկայից հանգիցէ:

17. Այր կարաւտեալ սիրէ զուրախութիւն: որ սիրէ զգինի եւ զձէթ` ի մեծութիւն:

18. Ջնջան լինի արդարոյն անաւրէնն. եւ ուղղոց որ անցանեն զուխտիւ:

19. Լաւ իցէ բնակել յանապատի` քան ընդ կնոջ անզգամի լեզուանւոյ եւ բարկացողի:

20. Գանձ ցանկալի հանգիցէ ի բերան իմաստնոյ. արք տգէտք կլցեն զնա:

21. Ճանապարհք արդարութեան եւ ողորմածութեան գտցէ զկեանս, եւ զարդարութիւն եւ զփառս:

22. Ի վերայ ամուր քաղաքաց եհաս իմաստութիւն. եւ քակեաց զամուրս յորս յուսացեալ էին ամպարիշտք:

23. Որ պահէ զբերան իւր եւ զլեզու` պահէ ի նեղութենէ զանձն իւր:

24. Խիստն` եւ յանդուգն` եւ հպարտն` ժանտ կոչին. եւ որ պահէ ոխս անաւրէն է:

25. Ցանկութիւնք սպանանեն զվատ, զի ոչ  յաւժարեն ձեռք նորա գործել ինչ:

26. Ամպարիշտ ցանկանայ զամենայն աւուրս զցանկութիւն չարեաց. իսկ արդարն ողորմի եւ տայ առանց խնայելոյ:

27. Պատարագ ամպարշտաց պիղծ են առաջի Տեառն. քանզի անաւրէնութեամբ իսկ մատուցանեն զնոսա:

28. Վկայ սուտ` կորիցէ. այր հլու` զգուշութեամբ խաւսեսցի:

29. Այր ամպարիշտ յանդգնութեամբ հարկանի ի դիմի. իսկ ուղիղն ինքնին իմանայ զճանապարհս իւր:

30. Ոչ է մարդոյ իմաստութիւն` ոչ արութիւն, եւ ոչ խորհուրդ առ Աստուած:

31. Երիվար պատրաստի յաւուր պատերազմի. բայց ի Տեառնէ է աւգնականութիւն: