Գլուխ 27

   
1. Մի պարծիր առ վաղիւն, զի ոչ գիտես զինչ ծնանիցի քեզ վաղիւն:

2. Գովեսցէ զքեզ ընկերն` եւ մի քո բերան, աւտարն` եւ մի քո շրթունք:

3. Քար` ծանր է, եւ աւազ դժուարին առ ի բառնալ. բայց բարկութիւն անզգամի ծանրագոյն է քան զերկոսեան:

4. Անողորմ է սրտմտութիւն, եւ սաստիկ է բարկութիւն. այլ ոխակալն եւ ոչ իմիք ժուժկալէ:

5. Լաւ է յայտնութիւն յանդիմանութեան` քան զբարեկամութիւն ի ծածուկ:

6. Լաւ են հարուածք բարեկամի, քան զկամակոր համբոյրս թշնամւոյ:

7. Անձն յագեալ` զխորիսխ եւ զմեղր արհամարհէ. բայց անձին կարաւտելոյր եւ դառն իբրեւ զքաղցր թուի:

8. Որպէս թռչուն որ թռանի ի բունոյ իւրմէ, նոյնպէս եւ մարդ ստրկանայ` յորժամ աւտարանայ յիւրմէ տեղւոյ:

9. Իւղով եւ խնկով եւ գինւով զուարճանայ սիրտ. եւ բեկանի ի տրտմութենէ անձն:

10. Զբարեկամ քո, եւ զբարեկամ հայրենի մի թողուր. եւ ի տուն եղբաւր քոյ մի մտաներ թշուառացեալ: Լաւ է բարեկամ մերձաւոր, քան եղբայր ի հեռաստանէ բնակեալ:

11. Իմաստուն լեր որդեակ` զի ուրախ լիցի սիրտ քո. եւ դարձո ի քէն զբանս նախատանաց:

12. Խորագէտն ի գալ չարեաց ղաւղեաց. եւ անզգամք ընդ առաջ երթեալ ի տոյժս անկցին:

13. Զերծ ի նմանէ զհանդերձս նորա, զի անց թշնամանադիրն. քանզի նա զայլոյն ապականէր:

14. Որ գովէ զբարեկամ ընդ առաւաւտս բարձր ձայնիւ` քան զանիծանաւղն ոչինչ առաւել համարեսցի:

15. Կաթիլ հանէ զմարդ ի տանէ իւրմէ յաւուր ձմերայնոյ. նոյնպէս եւ կին անզգամ ի տանէ իւրմէ զայր:

16. Խիստ հողմ է հիւսւսի. բայց անուամբ աջոյ կոչի:

17. Երկաթ զերկաթ խարտէ. եւ այր գրգռէ զերեսս ընկերի:

18. Որ տնկէ թզենի` կերիցէ զպտուղ նորա, եւ որ պահէ զտէր իւր` պատուեսցի:

19. Որպէս ոչ են նման երեսք երեսաց, նոյնպէս եւ ոչ սիրտք մարդկան սրտից նման են:

20. Դժոխք եւ կորուստ` անյագ են. նոյնպէս եւ աչք` ագահք մարդոյ:   Պիղծ է առաջի Տեառն որ արձակէ զաչս, եւ անխրատ` եւ ցոփ լեզուաւ:

21. Փորձ արծաթոյ եւ ոսկւոյ ի բովս. եւ այր` փորձի ի բերանոյ գովչաց իւրոց: Սիրտ անաւրինի խնդրէ զչարիս. եւ սիրտ ուղիղ` խնդրէ զգիտութիւն:

22. Եթէ հարկանես զանզգամ ի մէջ ատենի եւ անարգես զնա, սակայն ոչ մերժես զանզգամութիւն ի նմանէ:

23. Խելամտութեամբ խելամուտ լիցես անձանց խաշանց քոց, եւ հաստատեսցես զսիրտ քո ի վերայ երամակաց քոց:

24. զի ոչ յաւիտեան է առն ոյժ, եւ զաւրութիւն, եւ իշխանութիւն. եւ ոչ տուեալ են նմա ազգաց յազգս:

25. Խնամ կալ բանջարոյ ի դաշտի, եւ հնձեսցես խոտ. եւ ժողովեա զխոտ դալար.

26. զի եղիցին քեզ ոչխարք ձորձաբերք. դարմանեա զդաշտս` զի եղիցին քեզ գառինք:

27. Որդեակ` յինէն ուսիր զպատգամս զաւրաւորս ի կեանս տան քոյ եւ ի կեանս բարեկամաց քոց: