1․ Եւ դարձաք չուեցաք ընդ անապատ ընդ ճանապարհ Կարմիր ծովուն. զոր աւրինակ խաւսեցաւ Տէր ընդ իս. եւ պատեցաք զՍէիր լերամբ աւուրս բազումս:
2․ Եւ ասէ ցիս Տէր.
3․ Շատ լիցի ձեզ պատել զլերամբդ. արդ` դարձարուք ընդ կողմ հիւսւսոյ:
4․ եւ ժողովրդեանն պատուէր տուր` եւ ասասցես. Դուք աւադիկ անցանէք առ սահմանաւք եղբարցն ձերոց` որդոցն Եսաւայ, որ բնակեալ են ի Սէիր. եւ երկնչիցին ի ձէնջ:
5․ Եւ զգուշանայցէք յոյժ. մի գրգռիցէք ընդ նոսա պատերազմաւ, զի ոչ տաց ձեզ յերկրէ նոցա` եւ ոչ քայլ մի ոտին. քանզի վիճակաւ ետու Եսաւեա զլեառն Սէիր:
6․ Կերակուրս գնեսջիք ի նոցանէ եւ կերիջիք. եւ ջուր չափով արծաթոյ առջիք ի նոցանէ` եւ արբջիք:
7․ Զի տէր Աստուած աւրհնեսցէ զքեզ յամենայն գործս ձեռաց քոց: Ծանիր զիարդ անցեր ընդ անապատն մեծ եւ ահագին. ահա քառասուն ամ տէր Աստուած քո ընդ քեզ է. եւ ոչ իւիք կարաւտացար:
8․ Եւ անցաք առ եղբարբք մերովք որդւովքն Եսաւայ բնակելովք ի Սէիր, առ ճանապարհաւն Արաբացւոց յԵղովմա, եւ ի Գասիովն Գաբերայ: Եւ դարձեալ անցաք ընդ ճանապարհ անապատին Մովաբու.
9․ եւ ասէ ցիս Տէր. Մի թշնամիցիք ընդ Մովաբացիսն, եւ մի գրգռիցիք ընդ նոսա ի պատերազմ. զի ոչ տաց ձեզ յերկրէ նորա վիճակ. քանզի որդւոցն Ղովտայ ետու զՍէիր ի ժառանգութիւն:
10․ Եւ Ոմմինք նախ բնակեալ էին ի նմա` ազգ մեծ եւ բազում եւ հզաւր, որպէս Ենակիմքն.
11․ ընդ Ռափաինս համարիցին, նոյնպէս եւ նոքա իբրեւ զԵնակիմսն. եւ Մովաբացիքն անուանեն զնոսա Ոմմինս:
12․ Եւ ի Սէիր նախ բնակեալ էր Քոռեցին. եւ որդիքն Էսաւա կորուսին զնոսա, եւ սատակեցին զնոսա յերեսացն իւրեանց, եւ բնակեցան փոխանակ նոցա. զոր աւրինակ արար Իսրայէղ զերկիր ժառանգութեան իւրոյ` զոր ետ նոցա Տէր:
13․ Եւ արդ` արիք չուեցէք ընդ ձորն Զարեդ:
14․ Եւ աւուրք որչափ անկան մեզ ի գնալն մեզ ի Կադէսբառնեայ, մինչչեւ անցաք ընդ ձորն Զարեդ, երեսուն եւ ութ ամ. մինչչեւ անկաւ ամենայն ազգք արանց պատերազմողաց ի բանակէ անտի, որպէս երդուաւ նոցա Աստուած.
15․ եւ ձեռն Աստուծոյ էր ի վերայ նոցա սատակել զնոսա ի բանակէն մինչչեւ անկան:
16․ Եւ եղեւ իբրեւ անկան ամենայն արք պատերազմողք մեռեալք ի միջոյ ժողովրդեանն,
17․ խաւսեցաւ ընդ իս Տէր` եւ ասէ.
18․ Դու անցանես այսաւր առ սահմանաւք Մովաբու ի Սէիր.
19․ եւ մաւտ հասանիցէք յորդիսն Ամովնա, մի թշնամիցիք ընդ նոսա, եւ մի գրգռիցէք ընդ նոսա ի պատերազմ. զի ոչ տաց ձեզ զերկիր որդւոցն Ամովնա ի վիճակ. քանզի որդւոցն Ղովտայ ետու զնա վիճակաւ:
20․ Երկիր որ Ռափայան համարեսցի. քանզի նախ` Ռափայինք բնակէին ի նմա. եւ Ամովնացիք անուանեն զնոսա զՈմինս,
21․ ազգ մեծ եւ բազում եւ զաւրաւոր իբրեւ զԵնակիմսն. եւ կորոյս զնոսա Տէր յերեսաց նոցա. եւ ժառանգեցին եւ բնակեցին փոխանակ նոցա:
22․ Որպէս արար որդւոցն Էսաւա բնակելոցն ի Սէիր, զոր աւրինակ սատակեաց Տէր զՔոռեցին յերեսաց նոցա, եւ ժառանգեցին եւ բնակեցին փոխանակ նոցա մինչչեւ ցայսաւր:
23․ Եւ խեւացիքն որ բնակեալ էին յԱսերովթ մինչչեւ ցԳազայ: եւ գամիրքն որ ելեալ էին ի Գամրաց` սատակեցին զնոսա, եւ բնակեցին փոխանակ նոցա:
24․ Արդ` արիք չուեցէք եւ անցիք ընդ ձորն Առնովնայ, ահա մատնեցի ի ձեռս քո զՍեհովն արքայ Եսեբովնա զԱմուրհացի. եւ զերկիրն նորա սկսիր ժառանգել. եւ գրգռել ընդ նոսա պատերազմ:
25․ Յաւրէ յայսմանէ սկսիր տալ զահ եւ զերկիւղ քո առաջի ամենայն ազգաց որ են ի ներքոյ երկնից. զի որք լուիցենն զանուանէ քումմէ` խռովեսցին, եւ երկունք կալցին զնոսա յերեսաց քոց:
26․ Եւ առաքեցի հրեշտակս յանապատէն Կեդմովթայ առ Սեհովն արքայ Եսբովնեա բանիւք խաղաղութեամբ, եւ ասեմ.
27․ Անցից ընդ երկիր քո, զճանապարհն գնացից. ոչ խոտորեցայց յաջ եւ ոչ յահեակ:
28․ Կերակուր` արծաթոյ վաճառեսցես ինձ եւ կերայց. եւ ջուր` արծաթոյ վաճառեսցես ինձ եւ արբից. բայց զի ոտիւք եւ եթ անցից.
29․ որպէս արարին ինձ որդիքն Եսաւայ բնակեալք ի Սէիր, եւ Մովաբացիքն բնակեալն յարուէր. Մինչչեւ անցից ընդ Յորդանան յերկիրն զոր տէր Աստուած տալոց է մեզ:
30․ Եւ ոչ կամեցաւ Սեհոն արքայ Եսբովնի անցանել մեզ առ նովաւ. զի խստացոյց տէր Աստուած մեր զոգի նորա, եւ կարծրացոյց զսիրտս նորա` զի մատնեսցի ի ձեռս քո յաւուրս յայսմիկ:
31․ Եւ ասէ ցիս Տէր. Ահա սկսեալ եմ մատնել առաջի երեսաց քոց զՍեհովն արքայ Եսբովնի զԱմուրհացի` եւ զերկիր նորա. սկսիր վիճակաւ ժառանգել:
32․ Եւ ել Սեհովն ընդ դէմ մեր, ինքն եւ ժողովուրդ իւր պատերազմաւ ի Սիասար.
33․ եւ մատնեաց զնա տէր Աստուած մեր ի ձեռս մեր. եւ հարաք զնա եւ զորդիս նորա, եւ զամենայն ժողովուրդ նորա.
34․ եւ յաղթեցաք ամենայն քաղաքացն ի ժամանակին յայնմիկ. եւ զկանայս նոցա, եւ զմանկունս իւրեանց. եւ ոչ թողաք ի նոցանէ ապրեալ:
35․ Բայց զխաշինս ածաք յաւարի, եւ զկապուտ քաղաքացն զոր առաք յարոէրա.
36․ որ է առ եզերբ ձորոյն Առնովնայ: եւ զքաղաքն որ է ի ձորն, եւ մինչչեւ ցսահմանն Գաղաադու. եւ ոչ էր քաղաք որ ապրեցաւ ի մէնջ. այլ զամենայն մատնեաց Աստուած մեր ի ձեռս մեր:
37․ Բայց յերկիր որդւոցն Ամովնա յոր ոչ մերձեցաք` զամենայն արուարձանս ձորոյն Յաբովբա, եւ զամենայն քաղաքս լեառնականս` որպէս պատուիրեաց տէր Աստուած մեր մեզ:
Հաղորդում կայքում սխալի վերաբերյալ
Տվյալ հատվածում առկա է սխալ: