1․ Եւ դարձաք ելաք ընդ ճանապարհն Բասանու. եւ ել Ովգ արքայ Բասանու ընդ դէմ մեր. ինքն եւ ամենայն ժողով նորա պատերազմաւ ի Սեդրային:
2․ Եւ ասէ ցիս Տէր. Մի երկնչիք ի նմանէ. զի ի ձեռս քո մատնեցից զնա, եւ զամենայն զժողովուրդ նորա, եւ զամենայն զերկիրն նորա. եւ արասցես նմա որպէս արարեր Սեհովնի արքայի Ամուրհացւոց` որ բնակեալ էր յԵսեբովն:
3․ Եւ մատնեաց զնա տէր Աստուած մեր ի ձեռս մեր. Զովգ արքայ Բասանու, եւ զամենայն ժողովուրդ նորա. եւ հարաք զնա մինչ ոչ թողուլ նմա զաւակ:
4․ Եւ յաղթեցաք ամենայն քաղաքացն նորա ի ժամանակին յայնմիկ. եւ ոչ էր քաղաք` զոր ոչ առաք ի նոցանէն. վաթսուն քաղաք զամենայն շուրջ զգաւառաւն Արգովբա թագաւորին Ովբա ի Բասան.
5․ ամենայն քաղաքք ամուրք պարսպաւորք բարձր, դրամբք եւ դռնափակաւք. թող ցքաղաքսն Փերեզացւոց բազումս յոյժ:
6․ Եւ սատակեցաք զնոսա` որպէս սատակեցաք զամենայն քաղաքսն մի ըստ միոջէ, եւ զկանայս եւ զմանկունս. եւ ոչ թողաք մազապուր:
7․ եւ զամենայն զանասուն եւ զկապուտակ քաղաքացն ածաք մեզ յաւարի:
8․ Եւ առաք ի ժամանակին յայնմիկ զերկիրն ի ձեռաց երկուց թագաւորացն Ամուրհացւոց. որ էին յայնկոյս Յորդանանու, յԱռնովնայ մինչչեւ ցՀերմովն:
9․ եւ փիւնիկեցիք անուանեցին զՀերմովն Սանիովր: եւ ամուրհացին անուանեաց զնա Սանիր:
10․ Ամենայն քաղաք Միսովրայ, եւ ամենայն Գաղաադ, եւ ամենայն Բասան, մինչչեւ ցԵղքա, եւ ցԵդրային. քաղաք թագաւորութեան էին Ովգայ ի Բասան:
11․ Զի Ովգ միայն արքայ Բասանու մնաց յՌափայնոց անտի. եւ գահոյք նորա գահոյք երկաթիք. եւ ահա է այն յամրոցի որդւոցն Ամովնա` ինն կանկուն երկայնութիւն նորա եւ չորք կանկուն լայնութիւն նորա, սկայից կանկնով:
12․ Եւ զերկիրն զայն ժառանգեցէք ի ժամանակին յայնմիկ, յարոէրա որ է առ եզերբ ձորոյն Առնովնայ: Եւ զկէս ձորոյն Գաղաադու եւ զքաղաքս նորա ետու Ռովբենի եւ Գադայ.
13․ եւ զաւելորդն Գաղաադու եւ զամենայն զԲասան` զթագաւորութիւնն Ովգայ` ետու կիսոյ ցեղին Մանասէի. Եւ զամենայն գաւառն Արբակա, եւ զամենայն զԲասանն, որ երկիր Ռափայնոցն համարիցի:
14․ Եւ յայիր` որդի Մանասէի առ զամենայն գաւառն Արգովբա մինչչեւ ի սահմանս Գարգասեայ եւ Ոմքատեայ. եւ անուանեաց զնա յիւր անուն, զԲասան` Աւովթիէր, մինչչեւ ցայսաւր ժամանակի:
15․ Եւ Մաքիրայ ետու զԳաղաադ.
16․ եւ Ռովբենի եւ Գադայ ետու ի Գաղաադէ, մինչչեւ ցձորն Առնովնի ընդ մէջ ձորոյն սահման մինչչեւ ցՅաբոկ, ձորն սահման որդւոցն Ամովնա.
17․ եւ Արաբա, եւ Յորդանան սահման Մաիք Անարաթա մինչչեւ ցծովն Արաբա ծով աղի: յԱսեդովթայ յարեւելի Փասգայ:
18․ Եւ պատուիրեցի ձեզ ի ժամանակին յայնմիկ` եւ ասեմ. Տէր Աստուած մեր ետ մեզ զերկիրս զայս ի վիճակ. վառեցարուք անցէք առաջի եղբարց ձերոց` որդւոցն Իսրայէղի ամենայն զաւրաւոր:
19․ Բայց կանայք ձեր եւ մանկունք ձեր, եւ անասունք ձեր, գիտեմ զի անասուն բազում է ձեր, բնակեսցեն ի քաղաքս ձեր` զոր ետու ձեզ,
20․ մինչչեւ զետեղեսցէ տէր Աստուած մեր զեղբարս ձեր, որպէս եւ զձեզդ. զի ժառանգեսցեն եւ նոքա զերկիրն` զոր տէր Աստուած մեր տացէ նոցա յայնկոյս Յորդանանու. եւ դարձջիք այսրէն յիւրաքանչիւր ժառանգութիւն իւր` զոր ետու ձեզ:
21․ Եւ Յեսուայ պատուիրեցի ի ժամանակին յայնմիկ` եւ ասեմ. Աչք ձեր իսկ տեսին զամենայն զոր արար տէր Աստուած քո ընդ երկուս թագաւորսն ընդ այնոսիկ. նոյնպէս արասցէ տէր Աստուած ընդ ամենայն թագաւորութիւնս` յորոց վերայ դիմեսցես դու.
22․ մի զանգիտիցէք. զի տէր Աստուած ձեր ինքնին պատերազմեսցի փոխանակ ձեր:
23․ Եւ աղաչեցի զտէր Աստուած ի ժամանակի յայնմիկ` եւ ասեմ.
24․ Տէր` Տէր, դու սկսար ցուցանել ծառայի քում զսաստկութիւն քո եւ զզաւրութիւն քո, զձեռն հզաւր եւ զբազուկ բարձր. քանզի ո՞վ է Աստուած յերկինս կամ յերկրի` որ առնիցէ որպէս դու արարեր ըստ զաւրութեան քում:
25․ Արդ` անցեա՞լ տեսից զերկիրն բարի` որ է յայնկոյս Յորդանանու, զլեառն բարի եւ զերկրորդն Լիբանան:
26․ Եւ անտես արար զիս վասն ձեր, եւ ոչ լուաւ ինձ. եւ ասէ ցիս Տէր. Շատ լիցի քեզ` մի եւս յաւելուցուս խաւսել այլ զբանդ զայդ:
27․ Ել ի կատար կոփածոյին, եւ հայեցեալ աչաւք քով ընդ ծովակողմն, եւ ընդ Հիւսիւսի, եւ ընդ Հարաւ, եւ ընդ Արեւելս, տես աչաւք քովք. քանզի ոչ անցանիցես ընդ այդ Յորդանան:
28․ Եւ պատուիրեա Յեսուայ եւ զաւրացուսցես զնա, եւ մխիթարեսցես զնա. զի նա անցցէ առաջի ժողովրդեանդ իմոյ այդորիկ. եւ ժառանգեցուսցէ դոցա զերկիրն զոր տեսեր:
29․ Եւ նստէաք ի հովիտսն մերձ ի տունն Փոգովրայ:
Հաղորդում կայքում սխալի վերաբերյալ
Տվյալ հատվածում առկա է սխալ: