Գլուխ 4

1. Եւ այժմ Իսրայէլ` լուր աւրինաց եւ դատաստանաց, զոր ես ուսուցանեմ քեզ այսաւր առնել. զի կեցջիք, եւ մտանիցէք ժառանգիցէք զերկիրն` զոր տէր Աստուած մեր տացէ ձեզ:

2. Եւ մի յաւելուցուք ինչ ի բանն` զոր ես պատուիրեմ ձեզ, եւ մի հատանիցէք ի նմանէ: պահեսջիք զպատուիրանս տեառն Աստուծոյ մերոյ զոր ես պատուիրեմ ձեզ:

3. Աչք ձեր տեսին` զոր ինչ արար տէր Աստուած ընդ Փեղբեգովր. Զի ամենայն մարդ որ չոգաւ զհետ Փեղբեգովրայ` սատակեաց տէր Աստուած մեր ի ձէնջ:

4. Բայց դուք` որ յարեցայք ի տէր Աստուած ձեր, կենդանի էք դուք ամէնեքին յաւուրս յայսմիկ:

5. Տեսէք զի ուսուցի ձեզ զդատաստանս եւ զիրաւունս` որպէս պատուիրեաց ինձ Տէր առնել զայն յերկրին յոր դուք մտանիցէք ժառանգել զնա:

6. Եւ պահեսջիք եւ արասջիք. զի այն է իմաստութիւն ձեր եւ հանճար առաջի ամենայն ազգացն, որ լսիցեն զամենայն իրաւունս զայսոսիկ եւ ասիցեն. Ահա ժողովուրդ իմաստուն եւ հանճարեղ ազգս այս մեծ:

7. Քանզի ո՞վ իցէ ազգ մեծ` որով իցէ նմա Աստուած մաւտ ի նոսա. որպէս տէր Աստուած մեր յամենայնի` որովք կարդասցուք առ նա:

8. եւ ո՞ր ազգ մեծ` որոյ իցեն իրաւունք եւ դատաստանք արդարք, ըստ ամենայնի աւրինացս այսոցիկ` զոր ես տամ առաջի ձեր այսաւր:

9. Հայեաց ի քեզ եւ զգուշ լեր անձին քում յոյժ. մի մոռանայցես զամենայն բանս` զոր տեսին աչք քո. եւ մի մերժեսցին ի սրտէ քումմէ զամենայն աւուրս կենաց քոց. եւ խելամուտ արասցես որդւոց քոց, եւ որդւոց որդւոց քոց,

10. զաւրն յորում ասացէք դուք առաջի տեառն Աստուծոյ ձերոյ ի Քորեբ յաւուրն եկեղեցւոյ. յորժամ ասաց ցիս Տէր. թէ Եկեղեցացոյ առ իս զժողովուրդդ, եւ լուիցեն զպատգամս իմ զոր ուսցին երկնչել յինէն զամենայն աւուրս` որչափ կենդանի իցեն դոքա ի վերայ երկրի, եւ ուսուսցեն զորդիս իւրեանց:

11. Եւ մատուցեալ կայիք դուք առ ստորոտով լերինն. եւ լեառն բորբոքեալ էր հրով մինչչեւ ցերկինս, եւ խաւար եւ մէգ եւ մառախուղ էր:

12. Եւ խաւսեցաւ Տէր ընդ ձեզ ի միջոյ հրոյն. զձայն պատգամացն լուարուք դուք, եւ նմանութիւն ինչ ոչ տեսէք. բայց միայն զբարբառն:

13. Եւ պատմեաց ձեզ զուխտ իւր զոր պատուիրեաց ձեզ առնել, զտասն պատգամսն: եւ գրեաց զնոսա ի վերայ երկուց քարեղէն տախտակացն:

14. Եւ պատուիրեաց ինձ ի ժամանակին յայնմիկ` ուսուցանել իրաւունս ձեզ եւ զդատաստանս. առնել ձեզ զնոսա յերկրին յոր դուք մտանելոց էք ժառանգել զնա:

15. Եւ զգուշացարուք յոյժ անձանց ձերոց. զի նմանութիւն ինչ ոչ տեսէք յաւուր յայնմիկ` յորում խաւսեցաւ Տէր ընդ ձեզ ի Քորէբ լերինն ի միջոյ հրոյն:

16. Մի անաւրինիցիք, եւ մի առնիցէք ձեզ դրաւշեալ նմանութիւն ամենայն պատկերի. նմանութիւն արուական կամ իգական:

17. նմանութիւն ամենայն անասնոց` որ իցեն յերկրի. նմանութիւն ամենայն հաւուց թռչնոց, որ թռչիցին ի ներքոյ երկնից:

18. նմանութիւն ամենայն սողնոց` որ սողին ի վերայ երկրի. նմանութիւն ամենայն ձկանց` որ իցեն ի ջուրս եւ ի ներքոյ երկրի:

19. Եւ մի հայեցեալ ընդ երկինս տեսանիցես զարեգակն եւ զլուսին եւ զաստեղս, եւ զամենայն զարդ երկնից, եւ մոլորեալ երկիր պագանիցես նոցա, եւ պաշտեսցես զնոսա. զոր բաժանեաց տէր Աստուած ամենայն ազգաց որ ի ներքոյ երկնից.
20. եւ զձեզ առ ի ձեռն Աստուած, եւ էհան զձեզ յերկաթեղէն հնոցէն յԵգիպտոսէ, լինել նմա ժողովուրդ վիճակաւ, որպէս եւ յաւուրս յայսմիկ:

21. Եւ Տէր բարկացաւ ինձ վասն բանից ասացելոց ի ձէնջ, եւ երդուաւ զի մի անցից ընդ այդ Յորդանան. եւ զի մի մտանիցեմ յերկիրն` զոր տէր Աստուած քո տացէ քեզ ի ժառանգութիւն:

22. Եւ արդ` աւասիկ մեռանիմ յերկրի յայսմիկ, եւ ոչ անցանեմ ընդ Յորդանան. բայց դուք անցանէք եւ ժառանգէք զերկիրն բարի:

23. զգուշ լերուք գուցէ մոռանայցէք զուխտ տեառն Աստուծոյ ձերոյ` զոր ուխտեաց ընդ ձեզ, եւ առնիցէք ձեզ դրաւշեալ նմանութիւն յամենայնէ` որոյ պատուիրեաց քեզ տէր Աստուած քո:

24. Զի տէր Աստուած քո հուր ծախիչ է. Աստուած նախանձոտ:

25. Եւ եթէ ծնանիցիս որդիս, եւ զորդիս որդւոց քոց, եւ յամիցէք յերկրին. եւ անաւրինիցիք, եւ առնիցէք դրաւշեալ նմանութիւն ամենայնի. եւ առնիցէք չար առաջի տեառն Աստուծոյ ձերոյ բարկացուցանել զնա:

26. Ունիցիմ ձեզ այսաւր վկա զերկինս եւ զերկիր, զի կորստեամբ կորնչիջիք յերկրէն, յոր դուք անցանէք ի Յորդանան ժառանգել զնա: եւ ոչ բազմացուցանիցէք զժամանակս ի վերայ նոցա. այլ սատակելով սատակեսջիք:

27. Եւ ցրուեսցէ զձեզ Տէր ընդ ամենայն ազգս. եւ մնայցէք սակաւ թուովք ի մէջ ազգացն` յորս տարցի զձեզ Տէր անդր:

28. Եւ պաշտիցէք անդ զաստուածս աւտարս զձեռագործս մարդկան. զփայտեղէնս եւ զքարեղէնս. որք ոչ տեսանիցեն եւ ոչ լսիցեն, եւ ոչ ուտիցեն, եւ ոչ հոտոտիցեն:

29. Եւ խնդրիցէք անդ զտէր Աստուած քո. Եւ գտանիցէք յորժամ խնդրիցէք զնա յամենայն սրտէ քումմէ, եւ յամենայն անձնէ ձերմէ, եւ յամենայն զաւրութենէ ձերմէ, եւ յամենայն մտաց ձերոց ի նեղութեանն ձերում.

30. եւ գտանիցեն զքեզ ամենայն բանքս այսոքիկ ի վախճանի աւուրց: Եւ դարձցիս դու առ տէր Աստուած քո, եւ լուիցես ձայնի նորա.

31. զի Աստուած ողորմած է, ոչ թողցէ զքեզ եւ ոչ սատակեսցէ զքեզ. եւ ոչ մոռասցի զուխտ հարցն:

32. Հարցէք զաւուրսն զառաջինս զեղեալս յառաջագոյն քան զքեզ. յաւրէ յորմէ հաստատեաց մարդ յերկրի. ի ծագաց երկնից մինչչեւ ի ծագս երկնից, էթէ եղեա՞լ իցէ ըստ բանիս մեծի այսորիկ: էթէ ազդեա՞լ իցէ լուր այսպիսի:

33. էթէ լուեա՞լ իցէ ազգ ի ձայնի Աստուծոյ կենդանւոյ բարբառեալ ի միջոյ հրոյ: որպէս դու լուար` եւ կեցեր:

34. եւ էթէ յաւժարեա՞լ իցէ Աստուծոյ մտանել առնել իւր ազգ ի միջւոյ ազգի, փորձութեամբ եւ նշանաւք եւ արուեստիւք եւ պատերազմաւ, հզաւր ձեռամբ եւ բարձր բազկաւ, եւ մեծամեծ տեսլեամբք. ըստ ամենայնի զոր արար տէր Աստուած մեր յԵգիպտոս` յանդիման քով իսկ տեսանելով:

35. Զի գիտասցես թէ տէր նա է Աստուած, եւ չիք այլ ոք բայց ի նմանէ:

36. Յերկնից լսելի եղեւ բարբառ նորա խրատել զքեզ. եւ յերկրի եցոյց քեզ զհուր իւր զմեծ, եւ զպատգամս նորա լուար ի միջոյ հրոյն,

37. վասն սիրելոյ նորա զհարսն քո: Եւ ընդրեաց զզաւակն նոցա յետ նոցա զձեզ քան զամենայն ազգս. եւ էհան զքեզ ինքնին զաւրութեամբ իւրով մեծաւ յԵգիպտոսէ.

38. սատակել քեզ զազգս մեծամեծս եւ զաւրագոյնս քան զքեզ յերեսաց քոց. տանել զքեզ եւ տալ քեզ զերկիրն նոցա ի ժառանկութիւն. որպէս եւ ունիս իսկ այսաւր:

39. Եւ ծանիցես այսաւր եւ դարձցիս մտաւք. զի տէր Աստուած քո` նա է Աստուած յերկինս ի վեր եւ յերկիր ի խոնարհ. եւ չիք այլ ոք բայց ի նմանէ:

40. Եւ պահեսցես զիրաւունս նորա, եւ զպատուիրանս նորա զոր ես պատուիրեմ քեզ այսաւր, զի բարի լինիցի քեզ եւ որդւոց քոց յետ քո. եւ երկայնակեց լինիցիս յերկրին` զոր տէր Աստուած քո տացէ քեզ զամենայն աւուրս:

41. Յայնժամ զատոյց Մովսէս երիս քաղաքս յայնկոյս Յորդանանու յարեւելից կողմանէ,

42. փախչել անդր սպանողի, որ ոք սպանանիցէ զընկեր իւր եւ ոչ գիտութեամբ. եւ ինքն ոչ ատեայր զնա յերէկն եւ յեռանդն, անկցի ի մի ի քաղաքացն այնոցիկ` եւ կեցցէ:

43. Զբոսովր յանապատին, ի դաշտին երկրին Ռովբենի. եւ զՌամովթ ի Գաղաադ զԳադայ. եւ զԳաւղոն ի Բասան զՄանասէի:

44. Եւ այս աւրէն է` զոր եդ Մովսէս առաջի որդւոցն Իսրայէղի:

45. Եւ այս են վկայութիւնք եւ իրաւունք եւ դատաստանք, զոր խաւսեցաւ Մովսէս ընդ որդիսն Իսրայէղի յելանել նոցա յերկրէն Եգիպտացւոց.

46. յայնկոյս Յորդանանու. ի ձորն որ մերձ ի տունն Փոգովրա. յերկրին Սեհովնի արքայի Ամուրհացւոց` որ բնակեալ էր յԵսեբովն. զորս էհան Մովսէս եւ որդիքն Իսրայէղի յելանել իւրեանց յերկրէն Եգիպտացւոց:

47. Եւ ժառանգեցին զերկիրն նորա. եւ զերկիրն Ովգայ թագաւորին Բասանու. զերկուց թագաւորացն Ամուրհացւոց` որ են յայնկոյս Յորդանանու յարեւելս:

48. յարոյերա` որ է առ եզերբ ձորոյն Առնովնայ, մինչչեւ ցլեառնն Սեհովնի` որ է Ահերովն:

49. Զամենայն զԱրաբա` որ է յայնկոյս Յորդանանու ընդ արեւելս, մինչչեւ ցծովն Արաբացւոց ի ներքոյ Ասեդովթայ կափուածոյն: