Գլուխ 10

1․ Ի ժամանակի յայնմիկ ասէ ցիս Տէր. Կոփեա դու քեզ երկուս տախտակս քարեղէնս իբրեւ զառաջինսն, եւ ել ի լեառնն. եւ արասցես դու քեզ տապանակ փայտեղէն.

2․ եւ գրեցից ի տախտակսն զնոյն պատգամսն` որ էին յառաջին տախտակին զորս դու խորտակեցեր. եւ դիցես զնոսա ի ներքս ի տապանակին:

3․ Եւ արարի տապանակ յանփուտ փայտից. եւ կոփեցի երկուս տախտակս քարեղէնս իբրեւ զառաջինսն. եւ ելի ի լեառնն, եւ երկու տախտակքն յերկոսին ձեռս իմում:

4․ Եւ գրեաց յերկոսին տախտակսն ըստ առաջին գրոյն զտասն պատգամսն զոր խաւսեցաւ ընդ ձեզ Տէր ի լերինն ի միջոյ հրոյն. եւ ետ զնոսա ցիս Տէր:

5․ Եւ դարձայ իջի ի լեռնէն, եւ եդի զտախտակսն ի ներքս ի տապանակին. եւ էին անդ որպէս պատուիրեաց ինձ Տէր:

6․ Եւ որդիքն Իսրայէղի չուեցին ի Բերովթայ որդւոցն Յակիմայ ի Սադաի. եւ անդ մեռաւ Ահարովն եւ անդէն թաղեցաւ: եւ քահանայացաւ Եղիազար որդի նորա ընդ նմա:

7․ Անտի չուեցին ի Գադգադա, եւ ի Գադգադ Յետեկա երկիր վտակաց ջուրց:

8․ Յայնմ ժամանակի զատոյց Տէր զցեղն Ղեւեայ բառնալ զտապանակ ուխտին Տեառն, կալ առաջի Տեառն` պաշտել եւ աղաւթս մատուցանել յանուն նորա մինչչեւ ցայսաւր:

9․ Վասն այսորիկ ոչ գոյ Ղեւտացւոցն բաժին եւ ժառանգութիւն ի մէջ եղբարց իւրեանց. զի Տէր ինքնին ժառանգութիւն նոցա` որպէս եւ ասաց նոցա:

10․ Եւ ես կայի ի լերինն զքառասուն տիւ եւ զքառասուն գիշեր. եւ լուաւ ինձ Տէր ի ժամանակին յայնմիկ. եւ ոչ կամեցաւ սատակել զձեզ:

11․ Եւ ասէ ցիս Տէր. Գնա չուեա առաջի ժողովրդեանդ այդորիկ զոր երդուայ հարցն դոցա տալ դոցա:

12․ Եւ արդ` Իսրայէլ, զի՞նչ խնդրէ ի քէն տէր Աստուած քո. այլ երկնչել ի տեառնէ Աստուծոյ քումմէ. եւ գնալ յամենայն ճանապարհս նորա, եւ սիրել զնա. եւ պաշտել զտէր Աստուած քո յամենայն սրտէ քումմէ, եւ յամենայն անձնէ քումմէ:

13․ եւ պահել զպատուիրանս տեառն Աստուծոյ քո, եւ զիրաւունս նորա` զոր ես պատուիրեմ քեզ այսաւր, զի բարի լինիցի քեզ:

14․ Ահաւասիկ տեառն Աստուծոյ քո երկինք` եւ երկնից երկինք, երկիր եւ ամենայն որ է ի նոսա:

15․ բայց ընդ հարսն ձեր յառաջագոյն հաճեցաւ Տէր սիրել զնոսա, եւ ընդրեաց զզաւակ նոցա յետ նոցա զձեզ քան զազգս ամենայն ըստ աւուրս ըստ այսմիկ:

16․ Եւ թլփատեցէք զխստասրտութիւն ձեր, եւ զպարանոցս ձեր մի եւս խստացուցանէք:

17․ զի տէր Աստուած մեր, նա է Աստուած աստուծոց` եւ Տէր տէրանց. Աստուած մեծ հզաւր ահաւոր. որ ոչ աչառի երեսաց, եւ ոչ առնու կաշառ:

18․ Եւ առնէ իրաւունս եկին եւ որբոյ եւ այրոյն. եւ սիրէ զնժդեհն, տալ նմա հաց եւ հանդերձ:

19․ Եւ սիրեցէք զպանդուխտն, զի եւ դուք պանդուխտք էիք յերկրին Եգիպտացւոց:

20․ Ի տեառնէ Աստուծոյ քումմէ երկնչիցիս, եւ զնա միայն պաշտեսցես, եւ ի նա յարեսցիս, եւ յանուն նորա երդնուցուս:
21․ զի նա է պարծանք քո, եւ նոյն Աստուած քո, որ արար ի քեզ զմեծամեծս եւ զփառաւորս` զոր տեսին աչք քո:

22․ Եւթանասուն ոգւովք իջին հարքն քո յԵգիպտոս, եւ արդ` ահա արար զքեզ տէր Աստուած քո իբրեւ զաստեղս երկնից բազմութեամբ: