1. Եւ էթէ ելանիցես ի պատերազմ ընդ դէմ թշնամեաց քոց. եւ տեսանիցես երիւարս եւ հեծեալս, եւ ազգք բազում քան զքեզ. մի երկնչիցիս ի նոցանէ, զի տէր Աստուած քո ընդ քեզ է` որ էհան զքեզ յերկրէն Եգիպտացւոց:
2. Եւ եղիցի յորժամ մերձանայցես ի պատերազմ. մատուցեալ քահանայն խաւսեսցի ընդ ազգիդ.
3. եւ ասասցէ ցնոսա. Լուր Իսրայէլ, դուք դիմեալ երթայք աւադիկ այսաւր ի պատերազմ ի վերայ թշնամեաց քոց. մի լքանիցին սիրտք ձեր, եւ մի երկնչիցիք. եւ մի զարհուրիցիք, եւ մի խուսիցէք յերեսաց նոցա.
4. զի տէր Աստուած մեր երթայ առաջի ձեր ընդ ձեզ, տալ պատերազմ վասն ձեր ընդ թշնամիս ձեր, ապրեցուցանել զձեզ:
5. Եւ խաւսեսցին դպիրքն ընդ ժողովրդեանն, եւ ասասցեն. Այր ոք` որոյ շինեալ իցէ տուն նորաշէն, եւ ոչ իցէ արարեալ նմա նաւակատիս, գնասցէ եւ դարձցի ի տուն իւր. գուցէ մեռանիցի ի պատերազմի, եւ այլ այր ուրախ լիցի ի նմաէ:
6. Եւ այր ոք` որոյ տնկեալ իցէ այգի, եւ չիցէ ուրախ լեալ ի նմա, գնասցէ եւ դարձցի անդրէն ի տուն իւր. գուցէ մեռանիցէ ի պատերազմի, եւ այլ այր ուրախ լիցի ի նմանէ:
7. Եւ այր ոք` որոյ խաւսեալ իցէ կին, եւ չիցէ առեալ զնա, գնասցէ ի տուն իւր. գուցէ մեռանիցի ի պատերազմի, եւ այլ այր առնուցու զնա:
8. Եւ յաւելցեն դպիրքն խաւսել ընդ ժողովրդեանն` եւ ասասցեն. Այր ոք որ երկնչիցի, եւ վատասիրտ սրտիւ իցէ, գնասցէ եւ դարձցի ի տուն իւր. եւ մի զանգիտեցուսցէ զսիրտ եղբաւր իւրոյ իբրեւ զիւրն:
9. Եւ եղիցի յորժամ դադարեսցեն դպիրքն ի խաւսելոյ ընդ ժողովրդեանն, կացուսցեն իշխանս զաւրուն առաջնորդս ժողովրդեանն:
10. Եւ եթէ մերձանայցես ի քաղաք տալ պատերազմ ընդ նմա, կոչեսցես զնա ի խաղաղութիւն:
11. եւ եղիցի էթէ տայցեն խաղաղութեան պատասխանի, եւ բայցցեն քեզ, եղիցի ամենայն ժողովուրդն որ գտանիցի ի նմա հարկատուք եւ հնազանդեալք քեզ:
12. Ապա թէ ոչ հնազանդեսցին քեզ, եւ արասցեն ընդ քեզ պատերազմ, պաշարեսցես զնա:
13. եւ մատնեսցէ զնա տէր Աստուած քո ի ձեռս քո. եւ հարցես զամենայն արու նոցա կոտորմամբ սրոյ:
14. բայց ի կանանց եւ ի կահուէ եւ յամենայն անասնոց. եւ զամենայն ինչ զինչ գտանիցի ի քաղաքին, եւ զամենայն աղխ` առցես քեզ յաւարի. եւ կերիցես զամենայն աւար թշնամեաց քոց` զոր տէր Աստուած քո տացէ քեզ:
15. Նոյնպէս արասցես ընդ քաղաքսն յոյժ հեռաւորս, որք ոչ ի քաղաքաց ազգացն այնոցիկ իցեն:
16. Բայց ի քաղաքաց ազգացն այնոցիկ` զոր տէր Աստուած քո տացէ քեզ զերկիրն նոցա ի ժառանգութիւն, մի ապրեցուցանիցէք ի նոցանէ զամենայն շնչաւոր,
17. այլ նզովելով նզովեսջիք զնոսա. զՔետացին, եւ զԱմուրհացին, եւ զՔանանացին, եւ զՓերեզացին, եւ զԽեւացին, եւ զՅեբուսացին, եւ զԳերգեսացին. զոր աւրինակ պատուիրեաց տէր Աստուած քո:
18. զի մի ուսուցանիցեն զձեզ առնել զամենայն գարշութիւնս իւրեանց. եւ մեղանչիցէք առաջի տեառն Աստուծոյ մերոյ:
19. եւ էթէ նստեալ պաշարիցես զքաղաք` աւուրս բազումս մարտնչել ընդ նմա առնուլ զնա, մի հարկանիցես զծառատունկ նորա արկանելով ի նա յերկաթ. այլ կերիցես ի նմանէ, եւ զնա մի հարկանիցես: միթէ մա՞րթ իցէ ծառատունկն որ յանդի անդ իցէ` մտանել յերեսաց քոց ի պատնէշ:
20. Այլ զփայտ զոր գիտիցես թէ չիցէ պտղաբեր, զայն հարկանիցես եւ կոտորեսցես. եւ շինեսցես եւ շինեսցես պատնէշ շուրջ զքաղաքաւն որ տայցէ ընդ քեզ պատերազմ մինչչեւ մատնեսցի:
Հաղորդում կայքում սխալի վերաբերյալ
Տվյալ հատվածում առկա է սխալ: