1 Եւ եղիցի եթէ մտանիցես յերկիրն զոր տէր Աստուած քո տացէ քեզ ի ժառանգութիւն եւ ժառանգեսցես զնա, եւ բնակեսցես ի նմա:
2 Առցես զառաջին պտղոց զերկրին քո զոր տէր Աստուած քո տացէ քեզ. եւ արկցես ի կողոփ. եւ գնասցես ի տեղին` զոր ընդրեսցէ տէր Աստուած քո անուանել զանուն իւր անդ:
3 Եւ երթիցէ առ քահանայն, որ կայցէ յաւուրսն յայնոսիկ, եւ ասասցէ ցնա. Գոհանամ այսաւր զտեառնէ Աստուծոյ իմմէ, զի մտի յերկիրն զոր երդու Տէր հարցն մերոց տալ մեզ:
4 եւ առցէ քահանայն զկողոփն ի ձեռաց քոց. եւ դիցէ զնոսա առաջի սեղանւոյն տեառն Աստուծոյ քո:
5 Եւ պատասխանի տուեալ, ասասցես առաջի տեառն Աստուծոյ քո. զԱսորիս եթող հայր իմ եւ էջ յԵգիպտոս, եւ պանդխտեցաւ անդ սակաւ ինչ թուով.
6 եւ չարչարեցին զմեզ Եգիպտացիքն, եւ լլկեցին զմեզ եւ եդին ի վերայ մեր գործ խստութեան:
7 Եւ աղաղակեցաք առ տէր Աստուած հարցն մերոց. եւ լուեալ Տէր ձայնի մերում, եւ ետես զտառապանս մեր եւ զաշխատութիւնս մեր, եւ զնեղութիւնս մեր.
8 եւ էհան զմեզ Տէր յԵգիպտոսէ ինքնին զաւրութեամբ մեծաւ, եւ հզաւր ձեռամբ, եւ բարձր բազկաւ, եւ մեծամեծ տեսլեամբ, եւ նշանաւք եւ արուեստիւք.
9 եւ էած զմեզ ի տեղիս յայս. եւ ետ մեզ զերկիրս զայս. երկիր` որ բղխէ զկաթն եւ զմեղր:
10 Եւ արդ` աւասիկ բերի զպտուղ արդեանց երկրին զոր ետ ինձ Տէր, երկիր` որ բղխէ զկաթն եւ զմեղր: Եւ երկիր պագցես անդ առաջի տեառն Աստուծոյ քո:
11 եւ ուրախ լիցիս յամենայն բարութիւնսն` զոր ետ քեզ տէր Աստուած քո, ի տան քում. դու եւ ղեւտացին եւ պանդուխտն որ ի քեզ:
12 Եւ եթէ տասանորդել կատարեսցես զամենայն տասանորդս երկրի քո. եւ յամին երկրորդի կրկին տասանորդեսցես ղեւտացւոցն, եւ եկին, եւ որբւոյն, եւ այրւոյն. եւ կերիցեն ի քաղաքս քո եւ յագեսցին:
13 Եւ ասասցես առաջի տեառն Աստուծոյ քո. Սրբեսցի ի բաց զսրբութիւնսն ի տանէ իմմէ. եւ ետու զայն ղեւտացւոյն, եւ եկին, եւ որբւոյն, եւ այրւոյն, ըստ ամենայն պատուիրանաց տեառն Աստուծոյ իմոյ` զոր պատուիրեալ էր ինձ. ոչ անցի զպատուիրանաւ քով եւ ոչ մոռացայ:
14 եւ ոչ կերայ ի վիշտս ի նոցանէ. եւ ոչ ընծայեցի ի նոցանէ պղծւոյն. եւ ոչ ետու ի նոցանէ մեռելւոյն: Լուայ ձայնի տեառն Աստուծոյ իմոյ. եւ արարի որպէս պատուիրեաց ինձ:
15 Արդ` հայեաց ի սրբոյ բնակութենէ քումմէ յերկնից, եւ աւրհնեա զժողովուրդ քո զԻսրայէլ, եւ զերկիրն զոր ետուր նոցա. որպէս երդուար հարցն մերոց, տալ մեզ զերկիրն որ բղխէ զկաթն եւ զմեղր:
16 Յաւուր յայնմիկ պատուիրեաց քեզ տէր Աստուած քո առնել զամենայն իրաւունս զայսոսիկ, եւ զդատաստանս. եւ պահեսջիք եւ արասջիք զնոսա յամենայն սրտէ ձերմէ, եւ յամենայն անձնէ ձերմէ:
17 Զտէր Աստուած քո ընդրեալ այսաւր լինել քեզ Աստուած, եւ գնասջիք ի ճանապարհս նորա, եւ պահեսջիք զիրաւունս եւ զդատաստանս նորա` լսել ձայնի տեառն Աստուծայ ձերոյ:
18 Եւ Տէր ընդրեաց զքեզ այսաւր լինել նմա ժողովուրդ սեպհական` որպէս եւ խոստացաւ քեզ. պահել զամենայն պատուիրանս նորա.
19 եւ լինել քեզ ի վեր քան զամենայն ազգս. որպէս արար զքեզ անուանի եւ բարգաւաճ եւ փառաւոր` լինել քեզ ժողովուրդ սուրբ տեառն Աստուծոյ քում. որպէս եւ խաւսեցաւ:
Հաղորդում կայքում սխալի վերաբերյալ
Տվյալ հատվածում առկա է սխալ: