1․ Եւ պատուիրեաց Մովսէս եւ ծերակոյտն Իսրայէղի` եւ ասեն. Պահեցեք զամենայն պատուիրանս զոր ես պատուիրեմ քեզ այսաւր:
2․ Եւ եղիցի յաւուր յորում անցանիցէք ընդ Յորդանան, յերկիրն զոր տէր Աստուած քո տացէ քեզ. կանկնեսցես անդ քարինս մեծամեծս, եւ բռեսցես զնոսա բռով:
3․ եւ գրեսցես ի վերայ նոցա զամենայն պատգամս աւրինացս այսոցիկ յորժամ անցանիցէք ի Յորդանան, ի ժամանակի իբրեւ մտանիցէք յերկիրն` զոր տէր Աստուած հարցն ձերոց տացէ ձեզ, երկիր որ բղխէ զկաթն եւ զմեղր. որպէս խոստացաւ տէր Աստուած հարցն քոց տալ քեզ:
4․ Եւ եղիցի յորժամ անցանիցեք ընդ Յորդանան, կանկնեսջիք զքարինսն զայնոսիկ զոր ես պատուիրեմ ձեզ այսաւր` ի լերինն Գեբաղ, եւ բռեսջիք զնոսա բռով:
5․ Եւ շինեսցես անդ սեղան տեառն Աստուծոյ քում. սեղան ի քարանց. եւ մի հպեսցես ի նա երկաթ:
6․ բոլորակ վիմաւք շինեսցես զսեղանն տեառն Աստուծոյ քո. եւ հանցես ի վերայ նորա ողջակէզս տեառն Աստուծոյ քում:
7․ Եւ զենցես անդ զենումն փրկութեան տեառն Աստուծոյ քում. եւ կերիցես եւ յագեսցիս անդ. եւ ուրախ լիցիս առաջի տեառն Աստուծոյ քում.
8․ եւ գրեսցես ի վերայ քարանցն զամենայն աւրէնս զայսոսիկ յայտնապէս յոյժ:
9․ Եւ խաւսեցաւ Մովսէս, եւ քահանայքն` ղեւտացիք` ընդ ամենայն Իսրայէղի եւ ասեն. Լուռ լեր եւ լուր Իսրայէլ: Յաւուր յայսմիկ եղեր ժողովուրդ տեառն Աստուծոյ քո.
10․ եւ լուիցես ձայնի տեառն Աստուծոյ քո. եւ արասցես զամենայն պատուիրանս նորա եւ զիրաւունս նորա` զոր ես պատուիրեմ քեզ այսաւր:
11․ Եւ պատուիրեաց Մովս ժողովրդեանն յաւուր յայնմիկ` եւ ասէ.
12․ Սոքա կացցեն աւրհնել զժողովուրդն ի լերինն Գարիզին, յորժամ անցանիցէք ընդ Յորդանան: Շմաւովն. Ղեւի. Յուդայ. Իսաքար. Յովսէփ. եւ Բենիամին:
13․ Եւ սոքա կացցեն ի վերայ անիծիցն ի լերինն Գեբաղ: Ռովբէն. Գադ. եւ Ասեր. Զաբաւղովն. Դան. եւ Նեփթաղին:
14․ Եւ պատասխանի տուեալ ղեւտացւոցն` ասիցեն մեծաձայն ամենայն Իսրայէլացւոցն:
15․ Անիծեալ լիցի մարդն, որ արասցէ դրաւշեալ եւ ձուլածոյ. զի պիղծ է առաջի Տեառն ձեռագործ ճարտարի, եւ դնիցէ զնա ի թագստեան: Եւ պատասխանի տուեալ ժողովրդեանն, ասասցեն. Եղիցի:
16․ Անիծեալ որ անարգեսցէ զհայր իւր կամ զմայր իւր: Եւ ասասցէ ամենայն ժողովուրդն. Եղիցի:
17․ Անիծեալ որ խոտորեսցէ զիրաւունս` եկին եւ որբւոյն եւ այրւոյն: Եւ ասասցէ ամենայն ժողովուրդն. Եղիցի:
18․ Անիծեալ` որ փոխեսցէ զսահմանս ընկերի իւրոյ: Եւ ասասցէ ամենայն ժողովուրդն. Եղիցի:
20․ Անիծեալ` որ ննջեսցէ ընդ կնոջ հաւր իւրոյ: Եւ ասասցէ ամենայն ժողովուրդն. Եղիցի:
21․ Անիծեալ` որ ննջեսցէ ընդ ամենայն անասնոյ: Եւ ասասցէ ամենայն ժողովուրդն. Եղիցի:
22․ Անիծեալ` որ ննջեսցէ ընդ քեռ իւրոյ, որ առ ի հաւրէ իցէ, կամ առ ի մաւրէ: Եւ ասասցէ ամենայն ժողովուրդն. Եղիցի:
24․ Անիծեալ` որ հարցէ զընգեր իւր նենգութեամբ: Եւ ասասցէ ամենայն ժողովուրդն. Եղիցի:
25․ Անիծեալ ամենայն որ ոչ կայցէ յամենայն գրեալս ի գիրս աւրինացս այսոցիկ` առնել զսոսա: Եւ ասասցէ ամենայն ժողովուրդն. Եղիցի եղիցի:
Հաղորդում կայքում սխալի վերաբերյալ
Տվյալ հատվածում առկա է սխալ: