1․ Այս է աւրհնութիւն զոր աւրհնեաց Մովսէս այրն Աստուծոյ զորդիսն Իսրայէղի յառաջ քան զվախճանելն իւր.
2․ Եւ ասէ. Տէր ի Սինայէ եկեսցէ, եւ երեւեցաւ մեզ ի Սէիրայ, եւ փութացաւ ի լեռնէն Փառանու. բիւրաւորքն ի Կադեսա, յաջմէ նորա հրեշտակք իւր ընդ իւր.
3․ եւ խնայեաց ի ժողովուրդ իւր: եւ ամենայն սրբեալք ի ձեռին քո ներքոյ, եւ նոքա ընդ քեւ են:
4․ Եւ ընկալաւ ի պատգամաց նորա աւրէնս, զոր պատուիրեաց մեզ Մովսէս, զժառանգութիւն ժողովւոյն Յակովբա.
5․ եւ եղիցի իշխան ի մէջ սիրեցելոյն, գումարելոց իշխանաց ժողովրդեան, հանդերձ ցեղիւքն Իսրայէղի:
6․ Կեցցէ Ռովբէն եւ մի մեռցի, եւ եղիցի բազմաւոր թուով:
7․ Եւ զայս ասէ զՅուդայէ. Լուր Տէր ձայնի Յուդայի. ի ժողովուրդ նորա եկեսցեն. եւ ձեռք նորա ընդրեսցեն նմա. եւ աւգնական ի թշնամեաց եղիցես նմա:
8․ Եւ զՂեւեայ ասէ. Տուք Ղեւեայ զյայտնութիւնս նորա, եւ զճշմարտութիւն նորա առնն անարատի. զորս փորձեցին փորձանաւք, եւ բամբասեցին զնա ի վերայ ջուրցն հակառակութեան:
9․ որ ասէր ցհայր իւր եւ ցմայր իւր` թէ ոչ տեսից զքեզ. եւ զեղբարս իւր ոչ ծանեաւ, եւ զորդիս իւր ոչ գիտաց. եւ զգուշացաւ բանից քոց, եւ զուխտ քո պահեաց:
10․ պատմեսցէ զիրաւունս քո Յակովբա, եւ զաւրէնս քո Իսրայէղի. դիցեն խունկս ի բարկութեան քում հանապազ ի վերայ սեղանւոյ քո:
11․ աւրհնեա Տէր զզաւրութիւն նորա, եւ ընգալ զգործս ձեռաց նորա: խորտակեա զմէջս ի վերայ յարուցելոց թշնամեաց նորա. եւ ատելիք նորա մի կանկնեսցին:
12․ Եւ զԲենիամենէ ասէ. Սիրեցեալնի ի Տեառնէ բնակեսցէ յուսով, եւ Աստուած հովանի լիցի նմա զամենայն
աւուրս. եւ ի մէջ ուսոց նորա հանգեաւ:
13․ Եւ զՅովսեփայ ասէ. Յաւրհնութեան Տեառն երկիր նորա, ի ժամանակաց երկնից եւ ի ցաւղոյ, եւ յանդնդոց աղբերաց ի ներքուստ.
14․ ըստ ժամանակի արդեանց արեգական փոփոխմանց, եւ ի գումարելոյ առ միմեանս ամսւոյն:
15․ ի գագաթանց լերանց սկիզբն, եւ ի գլխոյ բլրոց մշտնջենաւորաց:
16․ Եւ ըստ ժամանակս երկրի լիութեան, եւ ընդունելութիւնք երեւելոյ ի մորենոջն եկեսցեն ի վերայ գլխոյն Յովսեփայ` եւ ի վերայ գագաթանն փառաւորելոյ ի մէջ եղբարց:
17․ անդրանիկ ցլու գեղ նորա, եւ եղջեւրք միեղջեւրւոյ եղջերք նորա. խեթկեսցէ նոքաւք միանգամայն զազգս մինչչեւ ի ծագս երկրի: այս են բիւրաւորք Եփրեմի. եւ սոքա հազարաւորք Մանասէի:
18․ Եւ զԶաբողովնէ ասէ. Ուրախ լեր Զաբողովն յելս քո: Եւ զԻսաքարայ ասէ. Ի բնակութիւնս նոցա ազգ նահատակեսցին,
19․ եւ անդր կոչեսջիք եւ զոհեսջիք զոհ արդարութեան. զի զմեծութիւն ծովու դիեցուսցէ քեզ. եւ զշահս վաճառաց առ ծովեզերբ բնակելոյ:
20․ Եւ զԳադայ ասէ. Աւրհնեալ որ ընդարձակեաց զԳադա, հանգեաւ իբրեւ զառիւծ. եւ խորտակեաց զբազուկս, եւ զիշխանս,
21․ եւ ետես զիշխանութիւն իւր. զի անդ բաժանեցաւ երկիր իշխանաց ժողովելովք իշխանաց հանդերձ ազգապետաւք ազգաց ցեղիւքն Իսրայէղի, զարդարութիւն Տեառն արար, եւ զդատաստան իւր ընդ Իսրայէղի:
22․ Եւ զԴանայ ասէ. Դան` կորիւն առիւծւու, եւ յարձակեսցի Բասանայ:
23․ Եւ զՆեփթաղիմայ ասէ. Նեփթաղիմ յագուրդ եւ ընդունելութեանց, եւ լցցի աւրհնութեամբ ի Տեառնէ, եւ զծով եւ զհարաւ ժառանգեսցէ:
24․ Եւ զԱսերայ ասէ. Աւրհնեալ յորդւոց Ասեր, եւ եղիցի ընդունելութիւն եղբարց, եւ մխեսցէ յեւղ զոտն իւր.
25․ երկաթ եւ պղինձ եղիցին կըշիռք նորա. ըստ աւուրց քոց եւ զաւրութիւն քո:
26․ Ոչ գոյ իբրեւ զԱստուած սիրեցելոյն, որ ելանէ յերկինս աւգնական քո, եւ մեծամեծարն հաստատութեան.
27․ եւ ծածկոյթ Աստուծոյ իշխանութեանն. եւ ի զաւրութենէ բազկաց մշտնջենաւորաց. եւ մերժեսցէ յերեսաց քոց զթշնամի, եւ ասասցէ թէ կորիր:
28․ եւ բնակեսցէ յուսով յերկրին Յակովբա, ի մէջ ցորենոյ եւ գինւոյ. եւ երկինք` նմա համբարակ ցաւղոյ:
29․ Երանեալ ես դու Իսրայէլ ո նմանեսցէ քեզ ժողովուրդ փրկեալ ի Տեառնէ. պաշտպանեսցէ քեզ աւգնականն քո, եւ սուր պարծանք քո. եւ եկեսցեն թշնամիք քո, եւ դու ելցես ի վերայ պարանոցի նոցա:
Հաղորդում կայքում սխալի վերաբերյալ
Տվյալ հատվածում առկա է սխալ: