1․ Եւ եղիցի էթէ լսելով լսիցես ձայնի տեառն Աստուծոյ մերոյ, զգուշանալ առնել զամենայն պատուիրանս նորա, զոր ես պատուիրեմ քեզ այսաւր, եւ տացէ զքեզ տէր Աստուած քո ի վեր քան զամենայն ազգս երկրի.
2․ եւ եկեսցեն ի վերայ քո ամենայն աւրհնութիւնքս այսոքիկ. եւ գտցեն զքեզ, եթէ լուիցես ձայնի տեառն Աստուծոյ քում: 3 Աւրհնեալ լիցիս դու ի քաղաքի, եւ աւրհնեալ յանդի:
4․ Աւրհնեալ լիցին ծնունդք որովայնի քո, եւ արարք երկրի քո, անդեայք արջառոց քոց, եւ հաւտք ոչխարաց ձերոց:
5․ Աւրհնեալ լիցին շտեմարանք քո, եւ համբարք քո:
6․ Աւրհնեալ լիցիս դու յելանել եւ ի մտանել քում:
7․ Մատնեսցէ տէր Աստուած քո զթշնամիս քո եւ զհակառակորդս քո խորտակեսցէ առաջի երեսաց քոց: ընդ մի ճանապարհ ելցեն առ քեզ, եւ ընդ եւթն ճանապարհ փախիցեն յերեսաց քոց:
8․ Առաքեսցէ Տէր ի վերայ քո աւրհնութիւն, ի շտեմարանս քո, եւ յամենայն ինչ ուր մխեսցես զձեռն քո եւ ի վերայ երկրին` զոր տէր Աստուած քո տացէ քեզ:
9․ Կանկնեսցէ զքեզ տէր Աստուած քո իւր ժողովուրդ սուրբ. որպէս երդուաւ հարցն քոց. եւ եթէ լուիցես ձայնի տեառն Աստուծոյ մերոյ, եւ գնասցես ի ճանապարհս նորա:
10․ եւ տեսցեն ամենայն ազգ երկրի զի անուն Տեառն կոչեցեալ է ի վերայ քո. եւ երկիցեն ի քէն:
11․ Եւ բազմացուսցէ զքեզ տէր Աստուած քո ի բարութիւնս, ծննդեամբք որովայնի քո, եւ արդեամբք երկրի քո, եւ ծննդեամբք խաշանց քոց. ի վերայ երկրին զոր երդուաւ Տէր հարցն քոց տալ քեզ ըստ աւուրց երկնից ի վերայ երկրի:
12․ Բացցէ քեզ Տէր զգանձս բարութեան իւրոյ զերկինս, տալ անձրեւ երկրի քում ի ժամանակի իւրում, աւրհնել զամենայն գործս ձեռաց քոց. եւ տացես փոխ ազգաց բազմաց, եւ դու ոչ առնուցուս փոխ.
13․ եւ իշխեսցես ազգաց բազմաց, եւ քեզ` մի իշխեսցեն: Հաստատեսցէ զքեզ տէր Աստուած քո ի գլուխ եւ ոչ ի վերջ. եւ եղիցես ի վեր, եւ ոչ ի խոնարհ. էթէ լուիցես պատուիրանաց տեառն Աստուծոյ քո, զոր ես պատուիրեմ քեզ այսաւր յաջ եւ յահեակ ոչ. երթալ զհետ աստուածոց աւտարաց պաշտել զնոսա:
15․ Եւ եղիցի էթէ ոչ լուիցես ձայնի տեառն Աստուծոյ քո, պահել եւ առնել զամենայն պատուիրանս նորա զոր ես պատուիրեմ քեզ այսաւր, եկեսցեն ի վերայ քո անէծքս այս` եւ հասցեն քեզ:
16․ Անիծեալ լիջիր դու ի քաղաքի, եւ անիծեալ յանդի:
17․ Անիծեալ ի շտեմարանք քո եւ համբարք քո:
18․ Անիծեալ ծնունդք որովայնի քո եւ արդւեայք երկրի քո, անդեայք արջառոց քոց, եւ հաւտք ոչխարաց քոց:
19․ Անիծեալ լիջիր դու ի մտանել` եւ անիծեալ յելանել:
20․ Առաքեսցէ քեզ Տէր զնուազութիւն եւ զկարաւտութիւն. եւ ծախս ի վերայ ամենայնի յոր մխեսցես զձեռն քո, եւ զոր ինչ առնիցես. մինչչեւ սատակեսցէ զքեզ, մինչչեւ կորուսցէ զքեզ վաղվաղակի վասն չարութեան գնացից քոց` զի թողեր դու զիս:
21․ Խանձեցուսցէ ի քեզ Տէր մահ, մինչչեւ սատակեսցէ զքեզ Տէր յերկրէն յոր դու մտանելոց ես ժառանգել զնա:
22․ Հարցէ զքեզ Տէր տարակուսանաւք, եւ ջերմամբ, եւ սարսռով, եւ խթիւք, եւ երկիղիւ, եւ խորշակաւ, եւ գունով. եւ հալածեսցեն զքեզ մինչչեւ կորուսցեն զքեզ:
23․ Եւ եղիցին ի վերայ գլխոյ քո երկինք պղնձի, եւ երկիր ի ներքոյ քո երկաթի:
24․ Եւ տացէ Տէր զանձրեւ երկրի քո փոշի. եւ հող յերկնից իջցէ ի վերայ քո. մինչչեւ սատակեսցէ զքեզ մինչչեւ կորուսցէ զքեզ:
25․ Տարցէ զքեզ Տէր ի պարտութիւն առաջի թշնամեաց քոց. ընդ մի ճանապարհ ելցես ի վերայ նոցա, եւ ընդ եւթն ճանապարհ փախիցես յերեսաց նոցա. եւ եղիցիս ցրուեալ ընդ ամենայն թագաւորութիւնս երկրի:
26․ եւ եղիցին մեռեալք ձեր կերակուր թռչնոց երկնից եւ գազանաց երկրի. եւ ոչ ոք իցէ որ ընդոստուցանիցէ:
27․ Հարցէ զքեզ Տէր կեղւով Եգիպտացւոցն, եւ թանչիւք, եւ զայրացեալ քոսով` եւ մունով. զի մի կարասցես բժշկել:
28․ Հարցէ զքեզ Տէր յիմարութեամբ, եւ շլայցութեամբ, եւ ապշութեամբ մտաց.
29․ եւ խարխափեսցես ի մէջաւրէի որպէս խարխափիցէ կոյր ի խաւարի: Եւ ոչ ուղղեսցես զճանապարհս քո, եւ եղիցես զրկեալ եւ յափշտակեալ զամենայն աւուրս. եւ ոչ ոք իցէ որ աւգնիցէ քեզ:
30․ Առնուցուս կին` եւ այլ այր հանիցէ զնա ի քէն: շինեսցես տունս` եւ մի բնակեսցես ի նոսա: տնգեսցես այգիս` եւ մի կթեսցես զնա:
31․ Արջառ քո` սպանեալ առաջի քո, եւ մի կերիցես ի նմանէ: էշ քո` յափշտակեալ ի քէն, եւ մի դարձցի առ քեզ: ոչխար քո` մատնեալ թշնամեաց քոց, եւ ոչ ոք իցէ որ աւգնիցէ քեզ:
32․ Ուստերք քո եւ դստերք քո` մատնեալ ազգի աւտարի, եւ աչք քո կկոցեալ հայիցին ի նոսա, եւ ոչ հասանիցէ ձեռն քո:
33․ Զբերս երկրի քո, եւ զամենայն վաստակս քո կերիցէ ազգ, զոր դու ոչ գիտիցես: Եւ եղիցիս զրկեալ եւ խորտակեալ զամենայն աւուրս:
34․ եւ եղիցիս յիմարեալ վասն տեսլեանց աչաց քոց` զոր տեսանիցես:
35․ Հարցէ զքեզ Տէր չարաչար կեղւով ի ծունկս եւ սրունս. եւ ոչ կարասցես բժշկել ի թաթից ոտից քոց մինչչեւ ցգլուխ քո:
36․ Տարցի զքեզ Տէր եւ զիշխանս քո զոր կացուսցես ի վերայ քո` յազգ զոր ոչ գիտիցես դու` եւ ոչ հարք քո. եւ պաշտեսցես զաստուածս աւտարս անդ, զփայտեղէնս եւ զքարեղէնս.
37․ եւ եղիցես յառակ եւ ի ցոյց եւ ի զրոյցս ի մէջ ամենայն ազգաց` յոր տանիցի զքեզ անդր:
38․ Սերմն բազում հանցես յանդի, եւ սակաւ ժողովեսցես. զի կերիցէ զայն մարախ:
39․ Այգիս տնգեսցես եւ գործեսցես, եւ գինի ոչ արբցես, եւ մի ուրախ լինիցիս ի նմանէ. զի կերիցէ զայն` որդն:
40․ Եւ եղիցին ձիթենիք ի սահմանս քո, եւ եւղով ոչ աւծցիս, զի թափեսցին ձիթենիքն քո:
41․ Ուստեր, եւ դստերս ծնցիս, եւ ոչ լինիցին քո. քանզի երթիցեն ի գերութիւն:
42․ Զամենայն ծառատունկ քո եւ զարդիւնս երկրի քո հարցէ թրթուր:
43․ Եկն որ ի քեզ իցէ, ելցէ քան զքեզ ի վեր ի վեր, եւ դու իջցես ի վայր ի վայր:
44․ նա տացէ քեզ փոխ, եւ դու ոչ տացես նմա փոխ: նա եղիցի գլուխ, եւ դու եղիցես վերջ:
45․ Եւ եկեսցեն ի վերայ քո անէծքս այսոքիկ, եւ հալածեսցեն զքեզ. եւ հասցեն քեզ մինչչեւ սատակեսցէ զքեզ, եւ մինչչեւ կորուսցէ զքեզ: զի ոչ լուար ձայնի տեառն Աստուծոյ քո, պահել զպատուիրանս նորա եւ զիրաւունս նորա զոր պատուիրեաց քեզ:
46․ Եւ եղիցին ի քեզ նշանք եւ արուեստք, եւ զաւակի քո մինչչեւ ցյաւիտեան.
47․ փոխանակ զի ոչ պաշտեցեր զտէր Աստուած ուրախութեամբ եւ ճշմարիտ սրտիւ: վասն բազմութեանդ ամենեցունց
48․ պաշտեսցես զթշնամիս քո` զորս առաքեսցէ ի վերայ քո Տէր, ի սով եւ ի ծարաւ եւ ի մերկութեան` եւ ի նուազութեան ամենայնի: եւ դիցէ անուր երկաթի ի պարանոցի քում մինչչեւ սատակեսցէ զքեզ:
49․ Ածցէ ի վերայ քո ազգ ի Հեռաստանէ ի ծագաց երկրի իբրեւ զխոյանալ արծւոյ. ազգ` որոյ ոչ լսիցես զձայն նորա.
50․ ազգ` ժպիրհ երեսաւք. որ ոչ աչառիցի երեսաց ծերոց, եւ ոչ ողորմեսցի տղայւոյ.
51․ եւ կերիցէ զծնունդս խաշանց քոց, եւ զարդիւնս երկրի քո. եւ ոչ թողուցու քեզ ցորեան, եւ գինի, եւ եւղ, զանդեայս արջառոց քոց, եւ զհաւտս ոչխարաց քոց, մինչչեւ կորուսցէ զքեզ:
52․ Եւ նեղեսցէ զքեզ յամենայն քաղաքս քո, մինչչեւ կործանեսցին պարիսպք քո բարձրացեալք եւ ամուրք` յորս դու յուսացեալ իցես յամենայն երկրին քում: եւ նեղեսցէ զքեզ յամենայն քաղաքս քո` զոր ետ քեզ տէր Աստուած քո:
53․ Եւ կերիցես զծնունդս որովայնի քո. զմիս ուստերաց քոց եւ զդստերաց քոց` զորս ետ քեզ Տէր, յանձկութեան քում եւ ի նեղութեան քում, որով նեղեսցէ զքեզ թշնամին քո:
54․ Գիրգն որ ի քեզ եւ փափուկ յոյժ, չարակնեսցէ յեղբայր իւր եւ ի կին ծոցոյ իւրոյ, եւ ի մնացեալ որդիսն` որ մնայցեն նմա,
55․ տալ միում ի նոցանէ ի մարմնոց որդւոց իւրոց յորոց ուտիցէք. վասն չմնալոյ նմա մինչչեւ. յանձկնութեանն քում եւ ի նեղութեան, որով նեղիցեն զքեզ թշնամիքն քո յամենայն քաղաքս քո:
56․ Եւ գիրգն որ ի քեզ եւ փափուկն յոյժ, որոյ ոչ իցէ ոտին իւրոյ առեալ զփորձ գնալոյ ի վերայ երկրի վասն փափկութեան եւ գրգութեան, չարակնեսցէ յայր ծոցւոյ իւրոյ: եւ զուստր իւր, եւ զդուստր իւր.
57․ եւ զաղտն ելեալ ի միջւոյ իւրմէ, եւ զծնունդն զոր ծնանիցի` խորովեսցէ ի նմանէ` եւ կերիցէ. վասն նուազութեանն յամենայնէ թագուսցէ յանձկութեան եւ ի նեղութեան. որով նեղեսցէ զքեզ թշնամին յամենայն քաղաքս քո:
58․ Եթէ ոչ լուիցէք առնել զամենայն բանս աւրինացս այսոցիկ, զգրեալս ի գիրս յայսմիկ, երկնչել ի պատուական եւ ի սքանչելի անուանէ տեառն Աստուծոյ քո.
59․ եւ նորանշան արասցէ Տէր զհարուածս զաւակի քո, զհարուածս մեծամեծս զարմանալիս, եւ զցաւս չարաչարս եւ զկարեւորս:
60․ Եւ ածցէ ի վերայ քո զամենայն ախտս չարաչարս զԵգիպտացւոցն` յորմէ սոսկաիր յերեսաց նոցա, եւ մերձեսցին ի քեզ:
61․ Եւ զամենայն հիւանդութիւնս. եւ զամենայն հարուածս գրեալս ի գիրս աւրինացս այսոցիկ, ածցէ Տէր ի վերայ քո` մինչչեւ սատակեսցէ զքեզ:
62․ եւ մնասջիք թուով սակաւք. փոխանակ զի էիք դուք իբրեւ զաստեղս երկնից բազմութեամբ. եւ ոչ լուարուք ձայնի տեառն Աստուծոյ ձերոյ:
63 Եւ եղիցի որպէս ուրախ եղեւ ի ձեզ Տէր բարի առնել ձեզ, եւ բազմացուցանել զձեզ, նոյնպէս ուրախ լինիցի Տէր ի ձեզ` սատակել զձեզ. եւ բարձջիք յերկրէն յոր մտանելոց էք ժառանգել զնա:
64․ Եւ ցրուեսցէ զքեզ տէր Աստուած քո ընդ ամենայն ազգս, ի ծագաց երկրի մինչչեւ ի ծագս երկրի. եւ ծառայեսցես անդ աստուածոց աւտարաց, փայտից եւ քարից` զորս ոչ գիտէիր դու եւ հարք քո:
65․ Այլ եւ յազգսն յայնոսիկ ոչ հանգուսցէ զքեզ, եւ ոչ լինիցի կայ թաթից ոտից քոց. եւ տացէ քեզ անդ սիրտ տրտմեալ, եւ աչս սորեալս, եւ անձն հարեալ:
66․ Եւ եղիցին Կեանք քո կախեալ առաջի աչաց քոց, եւ զարհուրեսցիս զցայգ եւ զցերեկ. եւ ոչ հաւատասցես կենացն քոց:
67․ Եւ ընդ երեկոյս ասիցես. Ե՞րբ լիցի առաւաւտ, եւ ընդ առաւաւտս ասիցես. թէ ե՞րբ լիցի երեկոյ, ի զարհուրանաց սրտի քո զոր երկնչիցիս, եւ ի տեսլեանց աչաց քոց զորս տեսանիցես:
68․ Եւ դարձուսցէ զքեզ Տէր յԵգիպտոս նաւաւք. եւ ընդ ճանապարհ ընդ նոյն` ոչ յաւելուցուք տեսանել զնա. եւ վաճառեսջիք անդ թշնամեաց ձերոց ի ծառայս եւ յաղախնեայս. եւ ոչ ոք իցէ որ գնիցէ:
Հաղորդում կայքում սխալի վերաբերյալ
Տվյալ հատվածում առկա է սխալ: