Գլուխ 29

1․ Այս բանք են ուխտին զոր պատուիրեաց Տէր Մովսէսի. հաստատել որդւոցն Իսրայէղի յերկրին Մովաբու. թող զայն ուխտ` զոր ուխտեաց նոցա ի Քորեբ:

2․ Եւ կոչեաց Մովսէս զամենայն որդիսն Իսրայէղի` եւ ասէ ցնոսա. Դուք ձեզէն տեսէք զամենայն ինչ զոր արար Տէր յԵգիպտոս առաջի ձեր, ընդ փարաւովն եւ ընդ ծառայս նորա, եւ ընդ ամենայն երկիր նորա:

3․ Զփորձանս մեծամեծս` զորս տեսին աչք ձեր. զնշանս եւ զարուեստս մեծամեծս զայնոսիկ, զձեռն հզաւր, եւ զբազուկ բարձր:

4․ Եւ ոչ ետ ձեզ տէր Աստուած սիրտ գիտելոյ, եւ աչ տեսանելոյ. եւ ականջ լսելոյ մինչչեւ ցայսաւր:

5․ եւ ած զձեզ քառասուն ամ ընդ անապատն: Ոչ հնացան ձորձք ձեր, եւ ոչ մաշեցան կաւշիկք յոտս ձեր:

6․ Հաց ոչ կերայք, եւ գինի եւ ցքի ոչ արբէք. զի ծանիջիք թէ ես եմ տէր Աստուած ձեր.

7․ եւ եկիք մինչչեւ ցտեղիս այս: Եւ ել Սեհովն թագաւոր Եսբովնեա, եւ Ովգ թագաւոր Բասանու ընդ դէմ ձեր պատերազմաւ. եւ հարաք զնոսա,

8․ եւ առաք զերկիրն նոցա. եւ ետու զնա ի ժառանգութիւն Ռովբենի եւ Գադայ եւ կիսոյ ցեղին Մանասէի:

9․ Եւ զգոյշասջիք առնել զամենայն բանս ուխտիս այսորիկ. զի իմանայցէք զամենայն զոր առնիցէք:

10․ Դուք կայք աւադիկ այսաւր ամենեքեան առաջի տեառն Աստուծոյ ձերոյ. ցեղապետք ձեր, եւ ծերակոյտք ձեր, եւ դատաւորք ձեր, եւ ատենադպիրք ձեր, եւ ամենայն այր Իսրայէղի,

11․ եւ կանայք ձեր, եւ որդիք ձեր, եւ եկն որ ի միջի բանակիդ ձերում. ի փայտակոտորէ ձերմէ մինչչեւ ցջրբեր ձեր:

12․ Յանցանել քեզ զուխտիւ տեառն Աստուծոյ քո եւ զնզովիւք նորա զոր տէր Աստուած քո ուխտէ քեզ այսաւր:

13․ զի կացուսցէ զքեզ իւր ժողովուրդ, եւ նա եղիցի քեզ Աստուած` որպէս եւ ասաց քեզ. եւ զոր աւրինակ երդուաւ հարցն քոց` Աբրահամու եւ Սահակայ եւ Յակովբա:

14․ Եւ ոչ ձեզ միայն ուխտեմ ես զուխտս զայսոսիկ, եւ զնզովս զայս,

15․ այլ եւ որոց աստ ընդ մեզ իցեն այսաւր առաջի տեառն Աստուծոյ մերոյ, եւ որոց չիցենն ընդ մեզ այսաւր:

16․ Զի դուք ինքնին գիտէք` որպէս բնակեցաք յերկրին Եգիպտացւոց, եւ ո՞րպէս անցաք ընդ մէջ ազգացն. ընդ որս անցէք դուք.

17․ եւ տեսէք զսքանչելիս նոցա եւ զկուռս իւրեանց, զփայտն եւ զքար, զարծաթ եւ զոսկի. որ է առ նոսա:

18․ Մի ոք իցէ ի ձէնջ այր կամ կին, կամ ազգ, կամ ցեղ` որոյ միտք իւր խոտորեալ իցեն ի տեառնէ Աստուծոյ մերմէ, երթալ պաշտել զդիս ազգացն այնոցիկ: Մի ոք իցէ ի ձէնջ արմատ ի վեր բուսեալ դառնութեան եւ դաժանութեան.

19․ եւ եղիցի էթէ լուիցէ զպատգամս նզովիցս այսոցիկ, եւ խոկասցի ի սրտի իւրում` եւ ասիցէ. Քաւութիւնք եղիցին ինձ. զի եթէ ես ըստ մոլորութեան սրտի իմոյ գնայցեմ. զի մի կորուսանիցէ մեղաւորն զանմեղն:

20․ Եւ ոչ հաճեսցի Աստուած ներել նմա. այլ յայնժամ բորբոքեսցի բարկութիւն նորա, եւ նախանձ նորա ի մարդն յայն. եւ հասցեն նմա ամենայն նզովք ուխտիս այսորիկ, գրեալք ի գիրս աւրինացս այսոցիկ. եւ ջնջեսցէ Տէր զանուն նորա ի ներքոյ երկնից.

21․ եւ զատուսցէ զնա Տէր ի չարիս յամենայն որդւոցն Իսրայէլէ. ըստ ամենայն նզովից ուխտիս գրելոց ի գրի աւրինացս այսոցիկ:

22․ Եւ ասասցեն ազգքն միւս` եւ որդիք ձեր որ յառնիցեն յետ ձեր, եւ աւտարոտի որ գայցէ յերկրէ Հեռաստանէ` տեսանիցեն զհարուածս երկրին այնորիկ. եւ զախտս նոցա զոր առաքեաց Տէր ի վերայ նոցա.

23․ եւ զծծումբն եւ զաղն այրեցեալ, յամենայն հող նորա մի սերմանեսցի եւ մի բուսցի, եւ մի ելցէ ի վերայ նորա ամենայն դեղ դալար: Որպէս կործանեցան Սոդոմ եւ Գոմոր, Ադամա եւ Սեբոյիմ, զորս կործանեաց Տէր սրտմտութեամբ եւ բարկութեամբ:

24․ Եւ ասասցեն ամենայն ազգքն. Ընդէ՞ր արար Տէր այնպէս երկրին այնմիկ, զի՞նչ իցէ սրտմտութիւն մեծ բարկութեանն այնորիկ:

25․ Պատասխանի տացեն եւ ասասցեն. Զի թողին զուխտ տեառն Աստուծոյ հաւրն իւրեանց, զոր ուխտեաց հարցն նոցա, յորժամ էհան զնոսա յերկրէն Եգիպտացւոց.

26․ եւ գնացեալ պաշտեցին զաստուածս աւտարս, եւ երկիր պագին նոցա զորս ոչն ճանաչէին, եւ ոչ բաժանեաց նոցա:
27․ եւ բարկացաւ սրտմտութեամբ Տէր ի վերայ երկրին այնորիկ, ածել ի վերայ նորա ըստ ամենայն նզովից ուխտիս գրեալս ի մատենի աւրինացս այսոցիկ:

28․ Եւ եբարձ զնոսա Տէր յերկրէ իւրեանց, բարկութեամբ եւ սրտմտութեամբ եւ զայրմամբ մեծաւ յոյժ. եւ մերժեաց զնոսա յերկիր աւտար մինչչեւ ցայժմ:

29․ Ծածուկքն տեառն Աստուծոյ մերում, եւ յայտնիքն մեզ եւ որդւոց մերոց յաւիտեան` առնել զամենայն պատգամս աւրինացս այսոցիկ: